Read Mizo Lushai CHANCHIN ṬHA MATTHAIA ZIAK 15 Bible Online

CHANCHIN ṬHA MATTHAIA ZIAK 15 - Mizo Lushai bible

CHANCHIN ṬHA MATTHAIA ZIAK 15

¹Chumi lai chuan Jerusalem aṭangin Farisai te leh Dan zirtîrtute chu Isua hnênah an lo kal a.

²“Engati nge i zirtîrten upate thu rochhiah an bawhchhiat ṭhin? Chaw an eiin an kut an sil ngai lo,” an ti a.

³Ani chuan a chhâng a, “Nangni pawhin engati nge in thu rochhiah avânga Pathian thupêk in bawhchhiat ni?

⁴Pathian chuan, ‘I nu leh i pa chawimawi rawh; mahni nu emaw, pa emaw sawichhia chu a thi ngei tûr a ni,’ a ti a.

⁵Nangni erawh chuan ‘Tu pawh, a nu emaw, a pa emaw hnêna i mi chhawrna tûr zawng zawng chu Pathian hnêna pêk a ni tawh, titu chuan a nu leh a pa a chawimawi a ngai tawh lo’ in ti ṭhîn.

⁶Tichuan, in thu rochhiah avâng hian Pathian thu chu in bawh bo a nih hi.

⁷Vervêkte u, Isaian hetia in chungchâng thu a lo sawi lâwk hi a tidik ngawt mai:

⁸‘He mite hian an hmuiin mi chawimawi a, An thinlung erawh chuan mi hlat si.

⁹Thurin ang hrimin mihring thupêkte an zirtîr a, An mi biakna hi a thlâwn mai a ni,’ tih hi,” a ti a.

¹⁰Tin, mipui chu a ko va, an hnênah, “Ngaithla ula, hre fiah rawh u.

¹¹Kâa lût chuan mihring a tibawlhhlawh lo va, kâa chhuak chuan, chu ngei chuan mihring a tibawlhhlawh zâwk ṭhîn a ni,” a ti a.

¹²Chumi lai chuan a zirtîrte an lo kal a, a hnênah, “Farisai-ten kha thu kha an hriatin an lungnih loh hle kha i hria em?” an ti a.

¹³Ani erawh chuan a chhâng a, “Kûng eng pawh, ka Pa vâna mi phun loh chu pawh chhuah a ni ang.

¹⁴Anni chu pawisa suh u, hruaitu mitdel an ni. Mitdelin mitdel vêk a hruai chuan khuarkhurumah an tla dûn ang,” a ti a.

¹⁵Peteran a chhâng a, “Tehkhin thu kha min hrilh fiah ta che,” a ti a.

¹⁶Ani chuan, “Nangni pawh chuti êma mâwl in la ni cheu elo?

¹⁷Kâa lût apiang chu pumah a tla thla a, dailênnaah paih chhuah a ni tih in hre lâwm ni?

¹⁸Kâa chhuakte erawh chu thinlung aṭanga lo chhuak a ni a, chûng ngei chuan mihring a tibawlhhlawh ṭhîn a ni.

¹⁹Thinlung aṭang hian ngaihtuahna sual te, tualthahna te, uirena te, inngaihna te, rûkrûkna te, dâwta hêk te, Pathian pawisawina te a lo chhuak si ṭhîn a.

²⁰Chûng chu mihring tibawlhhlawhtu chu a ni; kut sil lova chaw ei erawh hi chuan mi a tibawlhhlawh lo ve,” a ti a.

²¹Chuta ṭang chuan Isua a chhuak a, Tura leh Sidon khaw bialah a kal ta a.

²²Ngai teh, chûng lai rama mi, Kanan hmeichhe pakhat a lo kal a, “Lalpa, Davida Fapa, mi khawngaih rawh, ka fanu ramhuaiin a man tlat a ni,” tiin a au va.

²³Ani erawh chuan kam khat mahin a chhâng lo. A zirtîrte chuan, “Kan hnungah a au a au si a, kaltîr mai rawh,” tiin an rawn ngên a.

²⁴Ani erawh chuan, “Berâm bo, Israel hnam hnênah lo chuan tirh ka ni lo ve,” a ti a, a chhâng a.

²⁵Nimahsela, hmeichhia chu a lo kal a, “Lalpa, mi pui rawh,” tia kûnin chibai a rawn bûk a.

²⁶Ani chuan, “Fate chaw lâksaka uite hnêna pêk chu a âwm lo ve,” a ti a.

²⁷Ani chuan, “A ni khawp mai, Lalpa; nimahsela, uite pawhin an pu dawhkân ata ei nawi tla chu an ei ṭhîn alâwm,” a ti a.

²⁸Chu veleh Isuan a chhâng a, “Hmeichhia, i ring nasa êm mai a, i duh ang takin i chungah thleng rawh se,” a ti a. Tichuan, a fanu chu chumi a chinah chuan a lo dam ta a.

²⁹Chuta ṭang chuan Isua a chhuak a, Galili dîl kam a hrût a; tlângah a chho va, chutah chuan a ṭhu ta a.

³⁰Kebai te, piangsual te, mitdel te, ṭawngtheilo te leh mi dang tam tak rawn hruaiin mipui nasa tak an lo kal a, a ke bulah an dah a; ani chuan a lo tidam ta hlawm a.

³¹Mipui chuan ṭawngtheilote chu lo ṭawnga, piangsualte chu lo ṭhaa, kebaite chu kea kala, mitdelte mit lo vâr zo ta chu an hmuhin mak an ti hle a; tichuan, Israel-te Pathian chu an fak a.

³²Isuan a zirtîrte chu a ko va, “Mipuiho hi ka khawngaih êm êm a ni, ka hnênah ni thum an awm tawh a, ei tûr lah an nei tawh si lo, rilṭâma hawtîr mai ka hreh a ni; chutilo chu, kawng lakah an ṭâmchhâwl dah ang e,” a ti a.

³³Zirtîrte chuan a hnênah, “Thlalêrah mipui heti zozai hraina khawp chhang khawi ata nge kan hmuh ang?” an ti a.

³⁴Isuan an hnênah, “Chhang eng zât nge in neih?” a ti a. Anni chuan, “Pasarih, sangha tlêm tê nên,” an ti a.

³⁵Tichuan, mipui chu leia ṭhu tûrin thu a pe a.

³⁶Chhang pasarih leh sanghate chu a la a, lâwmthu a sawi zawhin a phel a, zirtîrte a pe a, zirtîrte chuan mipui chu an pe a.

³⁷An vaiin an ei a, an tlai ta hlawm a, an sem bâng chu bâwm sarihah an dah khat a.

³⁸A eitute chu hmeichhia leh naupang tiam lovin patling ngawt pawh sângli an ni a.

³⁹Mipui chu a ṭîntîr hnuin lawngah a chuang a, Magadan ramah a kal ta a.