Read Mizo Lushai CHANCHIN ṬHA MATTHAIA ZIAK 16 Bible Online

CHANCHIN ṬHA MATTHAIA ZIAK 16 - Mizo Lushai bible

CHANCHIN ṬHA MATTHAIA ZIAK 16

¹Farisai-te leh Sadukai-te a hnênah an lo kal a, amah fiah nân vân ata chhinchhiahna thil mak entîr tûrin an rawn ngên a.

²Ani erawh chuan a chhâng a, “Tlai lam a lo nihin, ‘khua a ṭha dâwn a ni ang, kâwl a sen êm mai,’ in ti ṭhîn.

³Zîngah pawh, ‘Vawiin chu khua a chhe dâwn a ni ang, kâwl a sen a, khua a dur êm mai,’ in ti ṭhîn a; khaw awmzia in hrethiam si a, hun chhinchhiahnate erawh chu in hrethiam thei si lo.

⁴Tûnlai mi, mi sual tak leh uire hmang takte hian chhinchhiahna thil mak an zawng ṭhîn a; nimahsela, Jona chhinchhiahna chauh lo chu chhinchhiahna thil mak rêng entîr an ni lo vang,” a ti a. Anni chu a kalsan a, a kal ta daih a.

⁵Zirtîrten râl lehlam an thlen chuan chhang an lo ken theihnghilh a.

⁶Isuan an hnênah, “Farisai-te leh Sadukai-te dawidim lakah chuan invêng ula, fîmkhur rawh u,” a ti a.

⁷“Chhang kan keng hauh lo mai le,” tiin anmahni zîngah chuan an sawi ta a.

⁸Isuan chu chu a hriatin, “Rin tlêmte u, engati nge chhang in neih loh thu ngawt in buaipui tâk?

⁹Tûnah pawh in la hrethiam lo cheu maw? Mi sângnga tâna chhang panga leh a bâng in dah zât kha in la hre reng lâwm ni?

¹⁰Mi sângli tâna chhang pasarih leh a bâng in dah zât pawh kha?

¹¹Chhang thu in hnênah ka sawi lo tih engtizia nge in hriat loh? Farisai-te leh Sadukai-te dawidim lakah erawh chuan fîmkhur rawh u,” a ti a.

¹²Chu veleh, chhang dawidim lakah ni lovin, Farisai-te leh Sadukai-te zirtîrna laka fîmkhur tûrin anmahni a hrilh a ni tih an hre ta a.

¹³Isuan Filipa Kaisari bial a lo thlen chuan, “Miten Mihring Fapa hi tu nge a ni an tih?” tiin a zirtîrte chu a zâwt a.

¹⁴Anni chuan, “Ṭhenkhatin, ‘Baptistu Johana,’ an ti a, ṭhenkhatin, ‘Elija,’ an ti a, ṭhenkhatin ‘Jeremia emaw, zâwlnei tu-a emaw,’ an ti,” tiin an chhâng a.

¹⁵Ani chuan an hnênah, “A nih nangnin tu nge nia mi hriat?” a ti a.

¹⁶Simon Petera chuan a chhâng a, “Krista, Pathian nung Fapa chu i ni e,” a ti a.

¹⁷Isuan a hnênah, “Simon Barjona, i nihlawh e, mihringin an hrilh lo che a, ka Pa vâna miin a hriattîr che a ni zâwk e.

¹⁸Tin, nang, Petera i ni tih ka hrilh bawk a che; he lungpui chungah hian ka kohhran ka rem chho vang a, mitthi khaw kulh kawngkhârte chuan a ngam lo vang.

¹⁹Vânram chabite ka pe ang che a, lei chungah eng pawh i phuar apiang vânah phuar a ni ang a, lei chungah eng pawh i phelh apiang vânah phelh a ni ang,” a ti a.

²⁰Chumi zawhah chuan Krista a ni tih tu mah hrilh lo tûrin a zirtîrte chu a ti tlat a.

²¹Chumi a chinah chuan Isuan Jerusalem-a a kal tûr thu te, upate, puithiam lalte leh Dân zirtîrtute lakah thil tam tak a tuar tûr thu te, tihhluma a awm tûr leh ni thum ni-a kaihthawha a awm tûr thu te zirtîrte chu a hriattîr ṭan ta a.

²²Peteran ani chu a hruai hrang a, “Lalpa, ni lul lo ve; chûng chu i chungah thleng tawp suh se,” tiin a zilhhau ta a.

²³Ani erawh chuan Petera hnênah, “Setan, kal bo daih rawh, ka tân tlûkna i ni, Pathian duh dâna ngaihtuah lovin, mihring duh dânin i ngaihtuah a nih hi,” a ti a.

²⁴Isuan a zirtîrte hnênah chuan, “Tu pawh mi zui duh chuan, mahni inngaihtuah chang lovin, mahni kraws puin mi zui rawh se.

²⁵Tu pawh mahni nun humhim tum chuan an chân ang a, tu pawh keimah avânga nun chân chuan an hmu ang.

²⁶Miin khawvêl hi a pumin nei sela, a nun chân si se, a tân sâwtna eng nge awm ang? A nih leh, miin a nun aiah eng nge a pêk ang?

²⁷Mihring Fapa hi vântirhkohte nên, a Pa ropuina nên a lo kal dâwn si a; chumi hunah chuan mi tin an thiltih ang zêlin a rûl ṭheuh vang.

²⁸Thu dik ka hrilh a che u, heta dingho ṭhenkhat hi, Mihring Fapa a rama lo kal an hmuh hma chu thi lo tûr an awm,” a ti a.