Read Mizo Lushai CHANCHIN ṬHA MATTHAIA ZIAK 17 Bible Online

CHANCHIN ṬHA MATTHAIA ZIAK 17 - Mizo Lushai bible

CHANCHIN ṬHA MATTHAIA ZIAK 17

¹Tin, ni ruk hnuah chuan Isuan Petera te, Jakoba te, Johana te a hruai hrang a, tlâng sâng takah a chhohpui a.

²An hmaah chuan a hmêl lan dân chu a lo danglam ta a; a hmêl ni angin a lo êng a, a silhfênte chu a êngin a lo vâr ta sur a.

³Ngai teh, Mosia leh Elija chu an hnênah an inlâr a, Isua nên an inbia a.

⁴Petera chuan Isua hnênah, “Lalpa, heta kan awm hi a ṭha e; i duh chuan bawktê pathum ka khawh ang e; i tân pakhat, Mosia tân pakhat, Elija tân pakhat,” a ti a.

⁵A la sawi lai mêkin chhûm vâr tak a lo zîng a, anni chu a khuh a. Chhûm aṭang chuan awin, “Hei hi ka Fapa, ka Duhtaka, ka lawm êm êma chu a ni; ama thu hi ngai rawh u,” a ti a.

⁶Zirtîrte chuan chu chu an hriatin an bawkkhup a, an hlau êm êm a.

⁷Isuan anni chu a rawn dek a, “Tho ula, hlau suh u,” a ti a.

⁸An han dâk chhuak a, Isua chauh lo chu tu mah an hmu ta lo va.

⁹Tlâng aṭanga an chhuk laiin Isuan an hnênah, “Mihring Fapa hi mitthi zîng ata a thawh leh hma chu in thil hmuh kha tu mah hrilh suh u,” tiin thu a pe ta a.

¹⁰Zirtîrte chuan a hnênah, “Dân zirtîrtuten, ‘Elija a lo kal hmasa zet tûr a ni,’ engtiziaa ti si nge an nih le?” tiin an zâwt a.

¹¹Ani chuan a chhâng a, “Elija chu lo kal tûr rêng a ni, engkim a siam ṭha ang.

¹²Nimahsela, ka hrilh a che u, Elija chu a lo kal tawh reng a; amah chu an hre lo va, a chungah an duh duhin an tih kha. Chutiang bawkin Mihring Fapa pawh hian an kut a tuar ve dâwn a ni,” a ti a.

¹³Tichuan, zirtîrte chuan Baptistu Johana thu an hnênah a sawi a ni tih an hre ta a.

¹⁴Tin, mipui hnên an zu thlen chuan mi pakhat a hnênah a lo kal a, a hmaah a ṭhingṭhi a.

¹⁵“Lalpa, ka fapa saw khawngaih ang che; thla-em-ât a ni a, a tuar nasa êm mai; vawi tam tak meiah a tlu tawh a, vawi tam tak tuiah a tlu bawk ṭhîn.

¹⁶I zirtîrte hnênah ka rawn hruai a, an tidam thei si lo,” a ti a.

¹⁷Isuan a chhâng a, “Tûnlai mi, rinna tlachham leh tihmawhte u, eng chen nge in zîngah ka awm ang a, eng chen nge ka dawhtheih dâwn che u? Ka hnênah han hruai teh u,” a ti a.

¹⁸Isuan ramhuai chu a hau va, a chhûng ata a chhuak ta a; chumi dârkâr aṭang chuan naupang chu a dam ta a.

¹⁹Zirtîrte chu a hnênah a fâlin an lo kal a, “Eng vângin nge keinin kan hnawh chhuah theih loh?” an ti a.

²⁰Ani chuan an hnênah, “In rinna a tlêm vâng a ni. Thu dik ka hrilh a che u, anṭam chi fang khat ang rinna in neih chuan, he tlâng hnênah hian, ‘Heta ṭang hian sawtah sâwn insawn rawh,’ in ti ang a, a insawn mai ang. Tih theih loh rêng in nei lo vang,” a ti a.

²²Galili ram an fan laiin Isuan an hnênah, “Mihring Fapa hi mihringte kutah mantîr a ni dâwn a, an tihlum ang a,

²³ni thum ni-ah kaihthawhin a awm ang,” a ti a. Tichuan, an lungngai ta êm êm a.

²⁴Kapernaum an lo thlen chuan Tempul chhiah khawntute chu Petera hnênah an lo kal a, “In zirtîrtu hian Tempul chhiah a chawi ve ṭhîn lâwm ni?” an ti a.

²⁵Ani chuan, “Chawi ṭhîn e,” a ti a. Ina a va luh chuan Isuan a hnênah, “Simon, engtin nge i ngaih? Leia lalten bungraw chhiah emaw, lu chhiah emaw tu lakah nge an lâk ṭhin, an fate lakah nge mi hrang lakah?” tiin a lo sawi khalh a.

²⁶Petera chuan, “Mi hrang lakah,” a tih veleh Isuan a hnênah, “Chu! An fate chuan chhiah an âwl alâwm.

²⁷Nimahsela nang, dîlah va kal la, nghakuai chiah la, sangha âwk hmasa ber chu la rawh; a kâ keu la, chêng hnih i hmu ang; chu chu la la, kei leh nanga tân anni chu pe rawh; chutilo chuan, anni chu kan tilungni lo dah ang e,” a ti a.