Read Mizo Lushai CHANCHIN ṬHA MATTHAIA ZIAK 18 Bible Online

CHANCHIN ṬHA MATTHAIA ZIAK 18 - Mizo Lushai bible

CHANCHIN ṬHA MATTHAIA ZIAK 18

¹Chumi lai chuan zirtîrte chu Isua hnênah an lo kal a, “Vânramah tu nge ropui ber ang le?” an ti a.

²Ani chuan naupang tê hi a ko va, an hmaah a dintîr a,

³“Thu dik ka hrilh a che u, in inlamlêta naupang tê ang hi in nih loh chuan vânramah in lût tawp lo vang.

⁴Chutichuan, inngaitlâwma he naupang anga awm chu, vânrama ropui ber a ni ang.

⁵Tu pawh ka hming avânga hetiang naupang tê pakhat pawh lâwm chu keimah mi lâwm an ni.

⁶Amaherawhchu, tu pawh hêng mi ringtu zînga tê ber pakhat pawh titlu chu an nghâwngah chhangphut râwt lung lian pui awrhtîrin, tuifinriat thûk laia thlâk ni se an tân a hlâwk daih zâwk ang.

⁷“Tlûknate avângin khawvêl hi a va pik êm! Tlûknate hi awm tûr rêng zawng a ni; nimahsela, tlûkna awmtîrtu chung chu a pik e.

⁸I kutin emaw, i kein emaw a tihtlûk che chuan tan la, paih daih rawh; kut khing hnih emaw, ke pahnih emaw neia kumkhaw meia paih nih ai chuan, piangsualin emaw, ke baiin emaw nunnaa luh chu i tân a ṭha zâwk e.

⁹I mitin a tihtlûk che chuan kher chhuak la, paih daih rawh; mit khinghnih neia hremhmun meia paih nih ai chuan, mit khing khat chauh neia nunnaa luh i tân a ṭha zâwk e.

¹⁰“Hêng mi tête zînga pakhat pawh hi hmusit lo tûrin fîmkhur rawh u, vâna an vântirhkohten ka Pa vâna mi hmêl an hmu reng ṭhîn tih ka hrilh che u hi.

¹²“Engtin nge in ngaih? Miin berâm za nei se, an zînga pakhat chu vâk bo sela, sawmkua leh pakuate chu tlânga hnutchhiahin a bo zawng tûrin tu nge kal lo vang?

¹³Thu dik ka hrilh a che u, a hmuh leh hlauh chuan sawmkua leh pakua vâk bo lote chungah ai chuan a chungah a lâwm zâwk ang.

¹⁴Chutiang bawkin hêng mi tête zînga pakhat boral pawh hi in Pa vâna mi duhzâwng a ni lo ve.

¹⁵“I unauvin i chungah thil sual ti sela, kal la, in pahnih chauhva hriatah zilh ang che, a ngaihthlâk che chuan i unau chu i hmin a ni ang.

¹⁶A ngaihthlâk loh che erawh chuan mi dang pakhat emaw, pahnih emaw hruai ang che; chutichuan, in thu zawng zawng chu hretu pahnih emaw, pathum emaw kâa tihngheh a ni thei ang.

¹⁷Tin, anni chu a ngaihthlâk duh loh chuan kohhran hnênah thlen ang che; kohhran pawh chu a ngaihthlâk duh loh chuan ani chu i tân Jentail leh chhiahkhawntu ang ni rawh se.

¹⁸“Thu dik ka hrilh a che u, lei chungah eng pawh in phuar apiang vânah phuar a ni ang a, lei chunga eng pawh in phelh apiang vânah phelh a ni ang.

¹⁹Thu dik ka hrilh a che u, lei chungah hian in zînga mi pahnihin inrema eng thu-ah pawh an ṭawngṭai chuan, ka Pa vâna miin a tihsak ang.

²⁰Mi pahnih emaw, pathum emaw ka hminga an ṭhut khâwm apiangin an zîngah ka awm si ṭhîn a,” a ti a.

²¹Chumi lai chuan Petera a lo kal a, “Lalpa, ka unauvin vawi eng zât nge ka chungah thil tisual sela ka ngaihdam ang? Vawi sarih thleng em ni ang?” a ti a.

²²Isuan a hnênah, “Vawi sarih thlengin ka ti lo va che, vawi sarih hmun sawmsarih thlengin ka ti zâwk che a ni.

²³“Chumi avâng chuan vânram chu, lalber tu emaw a bawihte hnêna sum chungchâng tihfel tum nên chuan tehkhin a ni.

²⁴A han tihfel chuan mi pakhat, talent sîngkhat ba a hnênah an rawn hruai a;

²⁵rulhna a neih loh avângin a pu chuan amah leh a nupui nên, a fate leh a neih zawng zawng chu hralha rulh tûr thu a pe a.

²⁶Chutichuan, bawih chuan lei siin chibai a bûk a, ‘Ka chungah zahngai rih la, a za-in ka rûl vek ang che,’ a ti a.

²⁷Tichuan, chu bawih chu a pu chuan a khawngaih ta êm êm a, a thlah a, a bat chu a ngaidam ta a.

²⁸Nimahsela, chu bawih chu a kal chhuak a, a bawihpui zînga pakhat a duli za ba a va hmu a, a man a, a hrawkah a rêk a, ‘I bat kha mi pe rawh,’ a ti a.

²⁹A bawihpui chuan, ‘Ka chungah zahngai rih la, ka la rûl ang che,’ tiin kûnin a ngên chiam a.

³⁰Nimahsela, a duh lo va, a bat chu a tlâk hma zawng tân inah a khung ta a.

³¹A bawihpuite chuan a thil tih dân chu an hmuhin pawi an ti êm êm a; a thiltih zawng zawng chu an pu an va hrilh a.

³²Chu veleh a pu chuan ani chu a ko va, a hnênah, ‘Bawih sual, i ngen chiam avângin i bat zawng zawng kha ka ngaidam a,

³³ka khawngaih che ang khân i bawihpui chu i khawngaih ve tûr a ni lâwm ni?’ a ti a.

³⁴A pu chu a thinur ta a, a bat zawng zawng a tlâk hma chuan nghaisatute a pe ta a.

³⁵Mi tinin thinlung taka in unaute in ngaihdam loh chuan, ka Pa vâna mi pawhin chutiang bawkin in chungah a ti ve ang,” a ti a.