Read Mizo Lushai CHANCHIN ṬHA MATTHAIA ZIAK 19 Bible Online

CHANCHIN ṬHA MATTHAIA ZIAK 19 - Mizo Lushai bible

CHANCHIN ṬHA MATTHAIA ZIAK 19

¹Isuan chûng thu chu a sawi zawhin Galili ram ata a chhuak a, Jordan râla Judai ramah chuan a kal ta a.

²Mipui nasa takin an zui a, chumi hmunah chuan a lo tidam hlawm a.

³Farisai-te a hnênah an lo kal a, amah fiah nân, “Eng vâng pawhin miin a nupui a mâk a thiang em?” an ti a.

⁴Ani chuan a chhâng a, “A tîr ata Siamtu chuan hmeichhia leh mipaah a siam a,

⁵‘chumi avâng chuan mipain a nu leh pa a thlah ang a, a nupui a vuan ang; tichuan, an pahnih chuan tisa pumkhat an lo ni tawh ang,’ a tih hi in chhiar lo vem ni?

⁶Chutichuan, pahnih an ni tawh lo va, tisa pumkhat an ni tawh zâwk a ni. Pathianin a zawm tawh avângin mihringin ṭhen suh se,” a ti a.

⁷Anni chuan a hnênah, “A nih leh, engati nge Mosian inmâkna lehkha pea mâk theih thu a pêk si?” an ti a.

⁸Ani chuan an hnênah, “Mosian in thinlung sak avângin in nupui mâk a phal a ni; nimahsela, a tîr ata chutiang a ni si lo.

⁹Kei chuan ka hrilh a che u, tu pawh uire vâng ni lova a nupui maa mi dang neitu chu a uire a ni. Mâk hnu nei pawh a uire a ni,” a ti a.

¹⁰Zirtîrte chuan a hnênah, “Chutiang chu nupa chungchânga mipa dinhmun a nih si chuan inneih hi a ṭha lo ve,” an ti a.

¹¹Ani erawh chuan, “Chu thu chu mi zawng zawngin an pawm thei lo, a pêkate chauh lo chuan.

¹²Mi tilreh, nu pum chhûng aṭanga chutianga piang rêng an awm a; mihring kuta reh an awm bawk a; vânram avânga tilreha insiam chawp an awm bawk a. Tu pawh a zâwm thei chuan zâwm rawh se,” a ti a.

¹³Chumi lai chuan an chunga kut nghata a ṭawngṭaisak tûrin a hnênah naupang tê tê an rawn hruai a; zirtîrte chuan an lo hnar a.

¹⁴Isua erawh chuan, “Naupangte ka hnênah han kaltîr ula, hnar suh u; vânram chu hêng ang mite ta hi a ni si a,” a ti a.

¹⁵An chungah a kut a nghat a, chuta ta chu a kal ta a.

¹⁶Mi pakhat a hnênah a lo kal a, “Zirtîrtu chatuan nun ka neih theih nân eng thil ṭha nge ka tih ang?” a ti a.

¹⁷Ani chuan, “Thil ṭha engah nge mi zawh? Ṭha chu pakhat chauh a awm, Nunnaa luh i duh chuan thupêkte chu zâwm rawh,” a ti a.

¹⁸Ani chuan, “A engte hi maw?” a ti a. Isuan, “Tual i that tûr a ni lo; i uire tûr a ni lo; i ru tûr a ni lo; dâwtin i hêk tûr a ni lo;

¹⁹i nu leh i pa chawimawi rawh, tihte leh, nangmah i inhmangaih angin i vêngte i hmangaih tûr a ni, tihte hi,” a ti a.

²⁰Tlangvâl chuan a hnênah, “Chûng zawng zawng chu ka zâwm ṭhîn, eng nge ka la bâk?” a ti a.

²¹Isuan, “Ṭhat famkim i duh chuan, kal la, i thil neihte hralh la, pachhiate pe rawh; chutichuan, vânah ro i nei dâwn nia; tin, lo kal la, mi zui ang che,” a ti a.

²²Chu thu chu a hriatin tlangvâl chuan beidawng takin a kalsan ta a, sum ngah tak a ni si a.

²³Isuan a zirtîrte hnênah chuan, “Thu dik ka hrilh a che u; mi hausa tân vânram chu luh harsa tak a ni.

²⁴Ka hrilh leh a che u, Pathian rama mi hausa an luh aiin hriau benga sanghâwngsei luh tlang a awl zâwk,” a ti a.

²⁵Zirtîrten an hriat chuan mak an ti êm êm a, “Chuti chu tu nge chhandam ni thei ang le?” an ti a.

²⁶Isuan anni chu a en reng a, an hnênah, “Chu chu mihring tân tih rual a ni lo va, Pathian tân erawh chuan engkim tih theih a ni,” a ti a.

²⁷Peteran a chhâng a, “Ngai teh, keini lahin engkim kalsanin kan zui ta che a, eng nge kan hmuh ang le?” a ti a.

²⁸Isuan an hnênah, “Thu dik ka hrilh a che u, Hun Tharah chuan, mihring Fapa a lalṭhutthlêng ropui taka a ṭhut hunah, nangni mi zuitute pawh hi Israel hnam sâwm leh pahnih chunga rorêlin lalṭhutthlêng sâwm leh pahnihah in la ṭhu ve ang.

²⁹Tu pawh ka hming avânga inte emaw, unaute emaw, farnute emaw, pa emaw, nu emaw, fate emaw, ramte emaw kalsan chuan a lêt za an hmu ang; chatuan nun an la chang bawk ang.

³⁰“Mi tam tak hmasa bera awmte chu hnuhnûng ber an la ni ang a, hnuhnûng bera awmte pawh hmasa ber an la ni ang,” a ti a.