Read Mizo Lushai CHANCHIN ṬHA MATTHAIA ZIAK 2 Bible Online

CHANCHIN ṬHA MATTHAIA ZIAK 2 - Mizo Lushai bible

CHANCHIN ṬHA MATTHAIA ZIAK 2

¹Heroda a lal laia, Judai rama Bethlehem khuaa Isua a lo pianin, ngai teh, khawchhak lam aṭangin mi fingte Jerusalem-ah an lo kal a.

²“Khawiah nge Juda-te lal tûr nau lo piang chu? Khawchhak lamah a arsi kan hmu a, amah chibai bûk tûrin kan lo kal a ni,” an ti a.

³Chu chu lal Herodan a hriatin a buai ta hle a, Jerusalem-a mi zawng zawng pawh an buai a.

⁴Tichuan, puithiam lalte leh vântlâng Dân zirtîrtu zawng zawng chu a ko khâwm a, Krista pianna tûr hmun a zâwt a.

⁵Anni chuan, “Judai ram Bethlehem khuaa piang tûr a ni. Hetiangin zâwlneiin a ziak kha:

⁶‘Nang, Bethlehem, Judai rama mi, Judai ram khawpui zîngah i tê ber tawp lo, I chhûng aṭangin awptu a lo chhuak dâwn si a, Ka mi Israel-te vêngtu tûr chu,’ ” an ti a.

⁷Chutichuan, Herodan mi fingte chu a rûkin a ko va, arsi lan hun lai chu ngun takin a zâwt a.

⁸Bethlehem-ah chuan a kaltîr a, “Kal ta ula, naute thu chu ngun takin zâwt chhuak ula; kei pawhin ani chu chibai ka rawn bûk ve theih nân in hmuh hunah mi rawn hrilh leh ang che u,” a ti a.

⁹Lal thu chu an hria a, an kal ta a; khawchhak lama arsi an hmuh khân naute awmna chung zâwn a thlena a din hma chu an hma a hruai zêl ta a.

¹⁰Arsi chu an hmuhin an hlim êm êm a;

¹¹in chhûnga an va luh chuan a nu Mari bula nautê chu an hmu a, lei sia kûnin chibai an bûk a; an robâwmte an hawng a, thilpêk - rangkachak te, beraw te, mura te an pe a.

¹²Heroda hnêna kîr leh lo tûra an manga hrilh an nih avângin an ram panin kawng dangah an haw ta a.

¹³An hâwn hnuin, ngai teh, Lalpa Vântirhkoh Josefan a mangah a hmu a, “Tho la, nautê leh a nu hruai la, Aigupta ramah kal bo rawh; ka hrilh leh hma che zawng chutah chuan awm reng ang che, tihboral tumin Herodan nautê hi a zawng dâwn a ni,” a lo ti a.

¹⁴Tichuan, a tho va, nautê leh a nu chu a hruai a, a zân a zânin Aigupta ramah an kal ta a.

¹⁵Heroda thih hma chu chutah chuan an awm ta a. Lalpan zâwlnei hmanga, “Ka fapa chu Aigupta ram ata ka ko chhuak a,” tia a sawi kha a lo thlen theih nân.

¹⁶Tin, mi fingten an tihder a ni tih Herodan a hriatin a thin a ur ta êm êm a, a hun thu a zawha an hrilh ang khân Bethlehem leh a vêl zawng zawnga mipa naupang kum hnih chin hnuai lam chu a va thahtîr ta vek a.

¹⁷Zâwlnei Jeremian:

¹⁸“Rama khuaah thâwm an hria, Lusûn leh ṭap chuah chuah thâwm chu; Rakili chuan a fate a ṭah a, An awm tawh loh avângin a hnem theih loh,” tia a sawi kha a lo thleng ta a ni.

¹⁹Heroda chu a thih hnuin, Aigupta ramah chuan Josefan a mangah Lalpa vântirhkoh a hmu a,

²⁰“Tho la, nautê leh a nu hruai la, Israel ramah haw tawh rawh; nautê thah tumtute kha an thi tawh e,” a ti a.

²¹Tichuan, a tho va, nautê leh a nu chu a hruai a, Israel ram chu an pan ta a.

²²Nimahsela, Arkelausa chu a pa Heroda aiawhin Judai ramah a lal tih a hriatin chuta kal chu a hlau va, a mumanga hriattîrna a dawn angin Galili ram lamah a kal ta a.

²³Khaw pakhat, Nazaret an tihah chuan a va awm a, “Ani chu, ‘Nazaret mi,’ an ti ang,” tia zâwlneite sawi kha a lo thleng ta a ni.