Read Mizo Lushai CHANCHIN ṬHA MATTHAIA ZIAK 20 Bible Online

CHANCHIN ṬHA MATTHAIA ZIAK 20 - Mizo Lushai bible

CHANCHIN ṬHA MATTHAIA ZIAK 20

¹“Vânram chu in neitupa grep huana hnathawktu ruai tûra zîng taka thawk chhuak ang chu a ni.

²Hnathawktute nên ni khata duli hlawha an inrem veleh a grep huanah a tîr ta a.

³Dâr kaw vêlah a chhuak leh a, dâwrpuia mi dang ding mai mai a hmu a;

⁴an hnênah, ‘Nangni pawh grep huanah va kal ve tawh u; a âwm tâwk apiang ka pe ang che u,’ a ti a.

⁵An kal ta a. Chhûn laiah leh tlai dâr thum vêlah pawh a chhuak a, chutiang bawkin a ti leh a.

⁶Tlai dâr nga vêlah a va chhuak leh a, mi dang dingte a hmu a, an hnênah, ‘Engati nge nilênga heta in din mai mai?’ a ti a.

⁷Anni chuan, ‘Tu man min ruai hek lo,’ an ti a. Ani chuan, ‘Nangni pawh grep huanah va kal ve rawh u,’ a ti a.

⁸“Tlaiah chuan a huan enkawltu hnênah, ‘Hnathawktute kha ko la, a hnuhnûng bera ṭanin a hmasa ber thlengin an hlawh pe rawh,’ a ti a.

⁹Tlai dâr nga vêla rawihte chu an lo kal a, duli an dawng ṭheuh va.

¹⁰A hmasa berte chu an lo kal a, dawn tam deuh an inring a; nimahsela, duli bawk an dawng ta a.

¹¹An hlawh an han dawn chuan in neitupa chungah an phunnawi ta a.

¹²‘Hêng hnuhnûng berte hian dârkâr khat chauh an thawk a, keini chhûn ni sa tuara thawk nilêngte tlukin i siam si,’ an ti a.

¹³“Ani erawh chuan a chhâng a, an zînga pakhat hnênah chuan, ‘ṭhiana, i chungah ka tidik lo hlei nêm; duli hlawhah kan inrem lo vem ni?

¹⁴I ta kha la la, kal mai rawh; ka pêk che ang bawk kha hêng thawk hnuhnûng berte pawh hi ka pe duh a ni.

¹⁵Ka ta na na na chu ka duh duha ka tih a thiang lo vem ni? A nih loh leh kei ka ṭhat avângin i vui a ni maw?’ a ti a.

¹⁶Chutiangin hnuhnûng berte chu hmasa ber an la ni ang a, hmasa berte pawh hnuhnûng ber an la ni ang,” a ti a.

¹⁷Jerusalem-a a chhoh dâwn laiin Isuan a zirtîr Sâwmpahnihte chu a hruai hrang a, kalkawngah chuan an hnênah,

¹⁸“Ngai teh u, Jerusalem-ah kan chhoh dâwn hi: Mihring Fapa hi puithiam lalte leh Dân zirtîrtute hnênah an mantîr dâwn a ni.

¹⁹Anni chuan thi tûrin a chungah thu an titlu ang a, nuihza siam nâna hman tûr leh vuak tûr leh khenbeh tûrin Jentail-te hnênah an hlân ang; tin, ni thum nia kaihthawh a ni ang,” a ti a.

²⁰Chumi lai chuan Zebedaia nupui chu, a fate hruaiin Isua hnênah a lo kal a, ṭhingṭhiin chibai a bûk a, thil eng emaw a dîl a.

²¹Ani chuan, “Eng nge i duh?” a ti a. Ani chuan, “Ka fapa pahnihte hi i ramah, i ding lamah pakhat, i vei lamah pakhat an ṭhut theih nân thu pe ta che,” a ti a.

²²Isuan a chhâng a, “In thil dîl hi in hre lo va ni. Ka no in tûr chu in in thei dâwn em ni?” a ti a. Anni chuan, “Thei ang,” an ti a.

²³Ani chuan an hnênah, “Ka no chu in in ngei ang; nimahsela, ka ding lam emaw, ka vei lam emawa ṭhuttîr chu ka thu a ni lo va, ka Pa buatsaihsakte tân a ni zâwk ang,” a ti a.

²⁴Zirtîr sâwmte chuan chu chu an lo hriatin unau pahnihte chungah chuan an lungni lo ta hle a.

²⁵Isua erawh chuan anniho chu a ko va, “Jentail-te chunga rorêltute chu an intilal êm êm ṭhîn a, an miliante pawhin an chungah thu an nei êm êm ṭhîn tih in hria;

²⁶nangni zîngah zawng chutiang tûr a ni lo ve. Tu pawh in zînga mi lian nih duh chu in rawngbâwltuah a awm zâwk tûr a ni.

²⁷In zînga ropui ber nih duh pawh chu in chhiahhlawhah a awm tûr a ni.

²⁸Mihring Fapa pawh hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe zâwk tûra a lo kal ang hian,” a ti a.

²⁹Tin, Jeriko khua ata an chhuah laiin mipui nasa takin amah an zui a.

³⁰Mitdel pahnih kawng sîra lo ṭhu chuan Isua a kal tih an hriat veleh, “Lalpa, Davida Fapa, min khawngaih rawh,” tiin an au va.

³¹Mipuite chuan an hau va, ngawi tûrin an ti a, mahse anni chuan, “Lalpa, Davida Fapa, min khawngaih rawh,” tiin an au zual sauh va.

³²Isua chu a ding a, anni chu a ko va, “Eng nge tihsak che u ila in duh?” a ti a.

³³Anni chuan a hnênah, “Lalpa, mit vâr kan duh,” an ti a.

³⁴Isua chuan a khawngaih ta êm êm a, an mit a dek a; tichuan, an hmu thei ta nghâl a, amah chu an zui ta a.