Read Mizo Lushai CHANCHIN ṬHA MATTHAIA ZIAK 21 Bible Online

CHANCHIN ṬHA MATTHAIA ZIAK 21 - Mizo Lushai bible

CHANCHIN ṬHA MATTHAIA ZIAK 21

¹Jerusalem an lo hnaih ta a, Oliv tlânga Bethfage khua an han thlen chuan Isuan a zirtîr pahnih a tîr a, an hnênah,

²“In hma zâwn khuaah sâwn va kal ta ula, sabengtung thlun, a kianga a no nên in hmu mai ang; phelh ula, ka hnênah han kai rawh u.

³Mi tu pawhin in hnênah eng pawh sawi sela, ‘Lalpan a mamawh a ni,’ in ti ang a, a rawn kaltîr nghâl mai ang,” a ti a.

⁴Zâwlnei hmanga a sawi kha a lo thlen theihna tûrin chûng chu a lo awm a ni:

⁵“Zion fanu chu hrilh rawh u, en teh, i lal chu i hnênah a lo kal e, Thuhnuairawlh taka sabengtung chunga chuangin, Sabengtung no chung ngeiah,” tih thu hi.

⁶Tichuan, zirtîrte chu an va kal a, Isuan thu a pêk ang ngeiin an ti a.

⁷Sabengtung leh a no chu an rawn kai a, an chungah an puante an phah a, ani chu a chuang ta a.

⁸Mipui zînga a tam zâwk chuan kalkawngah an puante an phah a, a ṭhenin hnahchhâwl an sât a, kalkawngah chuan an phah zêl bawk a.

⁹A hma lama kalte leh a hnung lama zuitu mipui chu, “Davida Fapa hnênah, Hosana, Lalpa hminga lo kal chu fakin awm rawh se; Chungnung berah khian Hosana,” tiin an au va.

¹⁰Jerusalem a lo luh chuan, a khuain, “He mi hi tu nge ni?” tiin an phu ta mur mur a.

¹¹Mipuiho chuan, “He mi hi zâwlnei Isua, Galili ram Nazaret khuaa mi a ni,” an ti a.

¹²Isua chu tempulah a va lût a, chuta englo zuartute leh leitute chu a hnawt chhuak vek a; tangka thlengtute dawhkânte leh ṭhuro zuartute ṭhutthlêngte chu a nam thlûksak a;

¹³an hnênah, “‘Ka in chu ṭawngṭaina in an ti ang,’ tih ziak a ni; nangni erawh chuan suamhmangte pûkah in siam zâwk a nih hi,” a ti a.

¹⁴Tempulah chuan mitdelte leh kebaite a hnênah an lo kal a, a lo tidam hlawm a.

¹⁵Puithiam lalte leh Dân zirtîrtuten thil mak a tihte leh Tempula, “Davida Fapa hnênah Hosana,” tia naupang aute chu an hmuhin an thinur ta hle a, “Hêngho thu sawi hi i hria em?” an ti a.

¹⁶Isuan an hnênah, “Hria e, ‘Nausênte leh hnute hne laite kâa chhuak chuan fakna i tifamkim ta,’ tih hi in chhiar ngai lo vem ni?” a ti a.

¹⁷Anni chu a kalsan a, khawpui ata a chhuak a, Bethani-ah a kal a, chutah chuan a riak ta a.

¹⁸Tin, zîngah khawpui lam a pan leh laiin a ril a lo ṭâm ta a.

¹⁹Kawng kamah chuan theipui a hmu a, a va pan a, a hnah chauh lo chu eng mah a hmu lo va, “Rah lo kumkhua tawh ang che,” a ti a; theipui chu a vuai ta nghâl mai a.

²⁰Zirtîrte chuan chu chu an hmuhin mak an ti hle a, “Engtizia nge theipui hi a vuai nghâl tâk mai?” an ti a.

²¹Isuan a chhâng a, “Thu dik ka hrilh a che u; rinna in neiha in rinhlelh loh chuan, theipui chunga tih ang chang hi in ti lo vang a, he tlâng hnênah pawh hian, ‘Insawn la, tuifinriatah inpaih rawh,’ in tih chuan a inpaih mai ang.

²²Engkim, ring chunga ṭawngṭaia in dîl apiang in hmu ang,” a ti a.

²³Tempulah a lût a, a zirtîr lai chuan puithiam lalte leh vântlâng upate chu a hnênah an lo chho va, “Eng thuneihnain nge hêng thil hi i tih? Tu nge thu pe che?” an ti a.

²⁴Isuan a chhâng a, “Kei pawhin thu ka han zâwt ve ang che u, chu chu mi hrilh chuan tu thuin nge hêng thil hi ka tih ka hrilh ang che u.

²⁵Johana baptisma kha khawia ta nge, vâna mi thu nge mihring thu?” a ti a. An inrâwn khâwm a, “ ‘Vâna mi thu,’ kan tih chuan, ‘engah nge a thu in awih loh le?’ min ti dâwn si a;

²⁶‘mihring thu,’ kan tih chuan kan tân mipui an hlauhawm si, mi zawng zawngin Johana chu zâwlneiah an ngai si a,” an ti a.

²⁷Tichuan, Isua chu an chhâng a, “Kan hre lo,” an ti a. Ani chuan an hnênah, “Kei pawhin tu thuin nge hêng thil hi ka tih ka hrilh bîk lo vang che u,” a ti a.

²⁸Isuan, “A nih leh nangnin engtin nge in ngaih? Mi pakhatin fapa pahnih a nei a, pakhat hnênah chuan a va kal a,

²⁹‘Ka fapa, vawiin chu grep huanah va thawk rawh,’ a ti a. Ani chuan, ‘Ka duh lo,’ tiin a lo chhâng a. Nimahsela, nakinah a rilru a lamlêt a, a kal ta a.

³⁰Pakhat hnênah pawh chuan a va kal a, chutiang bawk chuan a ti a. Ani chuan ‘Aw le, ka pa,’ a ti a; nimahsela, a kal ta chuang lo va.

³¹Chu mite pahnih chu a tu zâwk chuan nge an pa duhzâwng ti le?” a ti a. Anni chuan, “A hmasa zâwk chuan,” an ti a. Isuan an hnênah, “Thu dik ka hrilh a che u, chhiahkhawntute leh nawhchizuarte chuan Pathian ram an luh khalh ta che u a nih hi.

³²Johana chuan kawng dik a rawn kawhhmuh che u a, amah chu in ring si lo va; chhiahkhawntute leh nawhchizuarte erawh chuan amah chu an ring a, nangnin chu chu in hmuh hnu pawhin amah chu ring tûrin in lamlêt si lo va.

³³“Tehkhin thu dang ngaithla rawh u. In neitu pakhat a awm a, grep huan a siam a, palin a hung a, grep sâwr khur a lai a, vênbûk sâng tak a sa bawk a, thlawh hlawh tûrin huan enkawltute a pe a, ram dangah a kal ta daih a.

³⁴A rah lawh a hun dâwn chuan a chanpual la tûrin huan enkawltute hnênah a bawihte a tîr a.

³⁵Huan enkawltute chuan a bawihte chu an lo man a, pakhat an vaw nek a, pakhat an tihlum a, pakhat lungin an dêng a.

³⁶Bawih dang, a hmasa aia tam zâwk a tîr leh a; anni pawh chu chutiang bawk chuan an lo ti a.

³⁷Chumi hnu chuan, ‘Ka fapa hi zawng an zah ang chu maw,’ tiin a fapa chu an hnênah a tîr ta a.

³⁸Nimahsela, huan enkawltute chuan a fapa chu an lo hmuhin, ‘He mi hi roluahtu tûr chu a nih hi; hawh u, that ila, a ro luah tûr hi i neihsak ang u,’ an ti hlawm a.

³⁹Tichuan, ani chu an man a, grep huan ata chu an theh chhuak a, an tihlum ta a.

⁴⁰Chutichuan, grep huan neitu chu a lo kal hunin, chûng huan enkawltute chu engtin nge a rawn tih tâk ang?” a ti a.

⁴¹Anni chuan, “Chûng mi sualte chu hrehawm takin a tiboral ang a, grep huan chu enkawltu dang, a lawh hun apianga a rahte chu amah pe zêltu tûrte hnênah thlawh hlawh tûrin a pe ang,” an ti a.

⁴²Isuan an hnênah, “Lehkhathu-a, ‘In satute lung duh loh kha, chu ngei chu a kil lung ṭangkai ber a lo ni si, Chu chu Lalpa tih a ni a, Kan hmuhin mak kan ti,’ tih hi in chhiar ngai lo vem ni?

⁴³“Chumi avâng chuan ka hrilh a che u, Pathian ram chu chhuhsak in ni ang a, a rah chhuah tûr hnam hnênah pêk a ni ang,” a ti a.

⁴⁵Puithiam lalte leh Farisai-te chuan a tehkhin thu chu an hriatin anmahni chungthu a sawi tih an hre ta a.

⁴⁶Man an tum a; mahse, mipui an hlau bawk si, zâwlneiah an ngaih tlat avângin.