Read Mizo Lushai CHANCHIN ṬHA MATTHAIA ZIAK 22 Bible Online

CHANCHIN ṬHA MATTHAIA ZIAK 22 - Mizo Lushai bible

CHANCHIN ṬHA MATTHAIA ZIAK 22

¹Mipui hnênah tehkhin thuin Isuan thu a sawi leh a,

²“Vânram chu lal tu emaw, a fapa tâna mo lawmna ruai ṭheh nên chuan tehkhin theih a ni.

³Ruai ṭheh tûra a sâwmte chu ko khâwm tûrin a bawihte a tîr a; mahse, an lo kal duh lo va.

⁴Ani chuan bawih dangte a tîr leh a, ‘Ka sâwmte hnênah khân, ngai teh u, ruai chu ka peih ta a, ka bâwngpate leh ran châwm thaute ka talh a, engkim peih a ni ta e; ruai ṭheh tûrin lo kal tawh rawh u, ti rawh u,’ a ti a.

⁵Nimahsela, an lo ngaihsak lo va, an kalsan ta mai a, a ṭhen an feh a, a ṭhen an sumdâwnnaah an kal a.

⁶Mi dangte chuan a bawihte chu an man a, zahthlâk takin an sawisa a, an tihlum ta mai a.

⁷Lal chu a thinrim ta a, a sipaite a tîr a, chûng tualthattute chu a tiboral a, an khua pawh a hâlsak ta a.

⁸“Tin, a bawihte hnênah chuan, ‘Ruai chu peih a ni ta, ka sâwmte erawh kha chu lo tel tlâk an ni lo.

⁹Chuvângin, kawng pêng ṭhuamahte kal ula, mi in hmuh apiang ruai ṭheh tûrin va sâwm rawh u,’ a ti a.

¹⁰Tichuan, bawihte chu an chhuak a, kawngahte chuan an kal a, an hmuh apiang, mi sual leh mi ṭhate pawh an hruai khâwm ta vek a; tichuan, mo lawmna in chu ruai kîltutein a lo khat ta a.

¹¹“Lal chu ruai kîltute en tûra a lo luh chuan inneihna thuam inbel lo mi pakhat a rawn hmu a;

¹²a hnênah, ‘ṭhiana, engtizia nge inneihna thuam inbel lova heta i lo luh le?’ a ti a. Ani chu a ngawi ta reng a.

¹³Lal chuan a rawngbâwltute hnênah, ‘A kut leh ke phuar ula, pâwn thimah paih chhuak rawh u, chutah chuan an ṭap ang a, hâ an ṭhial ang.

¹⁴Sâwmte chu tam tak an ni a, thlante erawh chu tlêm tê an ni,” a ti a.

¹⁵Chumi lai chuan Farisai-ten a thu sawia an man theih dân tûr an sawi ho va.

¹⁶An zirtîrte chu Heroda pâwla mite nên a hnênah an tîr a; anni chuan, “Zirtîrtu, mi dik tak i ni a, tihtakzetin Pathian thu i zirtîr ṭhîn a, pawisak chuan tu mah i nei si lo va.

¹⁷Chuvângin, engtin nge i ngaih min hrilh teh khai, Kaisara hnêna chhiah chawi tûr kan ni nge ni lo?” an ti a.

¹⁸Isuan an sualzia chu a lo hria a, “Mi vervêkte u, engah nge mi ṭawng awhtîr in tum? Chhiah tangka chu mi han entîr teh u,” a ti a.

¹⁹A hnênah duli an rawn la a.

²⁰Ani chuan an hnênah, “Hei, tu lem leh tu hming nge chuang hi?” a ti a.

²¹Anni chuan, “Kaisara,” an ti a. Ani chuan an hnênah, “Chuti a nih chuan, Kaisara thil chu Kaisara pe ula, Pathian thil chu Pathian pe ta che u,” a ti a.

²²Chu chu an hriatin mak an ti hle a, amah chu an kalsan a, an kal ta daih a.

²³Chumi ni vêk chuan Sadukai-ho, thawhlehna a awm lo tite chu a hnênah an lo kal a,

²⁴“Zirtîrtu, Mosian, ‘Fa nei lovin mi thi sela, a unauvin a nupui chu rochungin a unau tân chi a thlahsak tûr a ni,’ a ti a.

²⁵Aw le, kan zîngah unau mipa pasarih an awm a, a upa berin nupui a nei a, chi thlah lovin a thi a, a nupui chu a nau tân a hnutchhiah a;

²⁶chutiang bawkin pahnihna pawh, pathumna pawh, pasarihna thlengin a ni a.

²⁷Chu mite thih hnu chuan hmeichhia pawh chu a thi ta a.

²⁸Tichuan, thawhlehnaah chûng mi pasarihte zînga tu nupui ber nge ni ang; an za-in an nei ṭheuh si a?” tiin an zâwt a.

²⁹Isuan a chhâng a, “Lehkha Thu leh Pathian thiltihtheihna in hriat loh avângin in kal sual ṭhîn a ni.

³⁰Thawhlehnaah chuan nupui pasal an innei dâwn tawh lo va, vâna vântirhkohte ang mai an ni zâwk dâwn a ni.

³¹Mitthi thawhlehna thu-ah chuan Pathianin, ‘Kei hi Abrahama Pathian, Isaka Pathian, Jakoba Pathian ka ni,’ tia in hnêna a sawi kha in chhiar ngai lo vem ni?

³²Ani chu mitthi Pathian a ni lo va, mi nung Pathian a ni zâwk,” a ti a.

³³Mipui chuan chu chu an hriatin a thu zirtîr chu mak an ti hle a.

³⁴Sadukai-te chu a chhâng dang tih Farisai-te chuan an hriatin an inhmu khâwm a.

³⁵An zînga Dânhremi pakhatin amah fiah nân,

³⁶Zirtîrtu, Dânah hian eng thupêk hi nge ropui ber?” tiin a zâwt a.

³⁷Ani chuan, “Lalpa i Pathian chu i thinlung zawng zawngin, i nunna zawng zawngin, i rilru zawng zawngin i hmangaih tûr a ni.

³⁸Chu chu thupêk ropui leh pawimawh ber chu a ni.

³⁹A dawttu, a anpui chu, ‘Nangmah i inhmangaih angin i vêngte hmangaih rawh,’ tih hi a ni.

⁴⁰Chûng thupêk pahnihah chuan Dân leh zâwlneite thu zawng zawng a inkhaikhâwm vek a ni,” a ti a.

⁴¹Farisai-te kal khâwm chu Isuan thu a zâwt a,

⁴²“Krista chu eng angin nge in ngaih? Tu fapa nge ni?” a ti a. Anni chuan, “Davida,” an ti a.

⁴³Ani chuan an hnênah, “Davidan engtizia nge thlarauva sawiin ani chu, ‘Lalpa,’ a tih si?

⁴⁴‘Lalpa chuan ka Lalpa hnênah, Ka ding lamah lo ṭhu rawh, I hmêlmate i ke hnuaiah ka han dah ang e,’ a ti si a.

⁴⁵Davidan ani chu, ‘Lalpa,’ a tih si chuan, engtin nge a fapa mai a nih theih?” a ti a.

⁴⁶Tu man kam khat mahin an chhâng thei lo va, chumi a chin chu tu man thu dang rêng rêng an zâwt ngam tawh hek lo.