Read Mizo Lushai CHANCHIN ṬHA MATTHAIA ZIAK 23 Bible Online

CHANCHIN ṬHA MATTHAIA ZIAK 23 - Mizo Lushai bible

CHANCHIN ṬHA MATTHAIA ZIAK 23

¹Tichuan, mipuite leh zirtîrte hnênah Isuan thu a sawi a,

²“Dân zirtîrtute leh Farisai-te chu Mosia Dân zirtîrtua ruat an ni a.

³Chuvângin, an hrilh apiang che u chu ti ula, zâwm zêl ang che u, an thiltih ang erawh chu ti ve suh ang che u; sawi zawng an sawi ṭhîn a, an ti si ṭhîn lo.

⁴Phurrit hrehawm tak tak an siam a, mite an bel ṭhîn a, anni erawh chuan an kut zung hmâwr pawhin an khawih duh si lo.

⁵An thiltih zawng zawng chu mite hmuh atân a ni an tih ṭhin ni; an bân hrên leh chal hrêna bâwm chu an tihlai a, an puan fêm an tibuk ṭhîn a.

⁶Ruai ṭhehna hmuna ṭhutna ṭha ber te, Sunagog-a ṭhutna langsâr ber te, dâwrpui hmuna chibai bûk te,

⁷miten ‘Rabi,’ an tihte an ngaina si ṭhîn.

⁸“Nangni erawh chu, ‘Rabi,’ tihin awm suh u, in zirtîrtu chu pakhat a ni a, in za-in unau in ni si a.

⁹Tin, leiah hian tu mah, ‘ka pa’ ti suh u; in Pa chu pakhat a ni, vâna mi chu.

¹⁰‘Hruaitute,’ tihin awm hek suh u, in Hruaitu chu pakhat a ni, Krista chu.

¹¹In zînga ropui ber chu in rawngbâwltu a ni tûr a ni.

¹²Tu pawh inngaihlu chu an tlâwm ang a, inngaitlâwm apiang chawimawi an ni ang.

¹³“Nangni Dân zirtîrtu leh Farisai vervêkte u, in chung a pik e! Vânram kawng chu mite in khârsak si ṭhîn; nangni lah in lût si lo va, a lût tûrte pawh an luh in phal hek lo.

¹⁵Nangni Dân zirtîrtu leh Farisai-te u, in chung a pik e! Saphun pakhat siam tûrin tuifinriat leh khawmual in fang vêl ṭhîn a; in saphuna in siam hnuin nangmahni lêt hniha sualah in siam ṭhîn.

¹⁶“Nangni hruaitu mitdel, ‘Tempul chhâlin miin chhia chham sela, eng mah a ni lo; Tempul rangkachak chhâla chhia a chham erawh chuan a hlen tûr a ni,’ titute u, in chung a pik e!

¹⁷Nangni mi â, mitdelte u, a eng nge ropui zâwk, rangkachak nge rangkachak tithianghlimtu Tempul chu?

¹⁸‘Miin maichâm chhâlin chhia chham sela, eng mah a ni lo; a chunga thilpêk chhâla chhia an chham erawh chuan an hlen tûr a ni,’ in ti bawk a.

¹⁹Nangni mitdelte u, a eng nge ropui zâwk, thilpêk nge thilpêk tithianghlimtu maichâm chu?

²⁰Chuvângin, maichâm chhâla chhechham chu maichâm leh a chunga awm zawng zawng chhâla chhechham a ni.

²¹Tempul chhâla chhechham chu Tempul leh a luahtu chhâla chhechham a ni.

²²Vân chhâla chhechham chu Pathian ṭhutthlêng leh a chunga ṭhu chhâla chhechham a ni.

²³“Nangni Dân zirtîrtu leh Farisai vervêkte u, in chung a pik e! Pudina te, lêngmasêr te, pardi te sâwma pakhat in pe ṭhîn a; Dân thu pawimawh zâwk - dikna te, khawngaihna te, rinawmna te in ngaihthah si ṭhîn; nimahsela, chûng chu asin in tih tûr ni, a dangte chu ngaihthah chuang lovin.

²⁴Hruaitu mitdel, thosi in tel palh hlauva thli faia, sanghâwngsei thli fai lova lem tel si ṭhînte u!

²⁵“Nangni Dân zirtîrtu leh Farisai vervêkte u, in chung a pik e! No leh thlêng pâwn lam in sil fai ṭhîn a, a chhûng lam erawh chu duhâmna leh insûm lohnain a khat si a.

²⁶Nang, Farisai mitdel, no leh a chhûng lam chu sil fai hmasa rawh, a pâwn lam pawh a lo fai dâwn nia.

²⁷“Nangni Dân zirtîrtu leh Farisai vervêkte u, in chung a pik e! Thlân hnawih vâr, a pâwn lama mawi taka lang, a chhûng lam erawh chu mitthi ruh leh bawlhhlawh tinrênga khat ang chu in ni.

²⁸Nangni pawh chutiang bawkin pâwn lamah chuan mi hmuhin fel âwm takin in lang a, chhûng lamah erawh chuan vervêkna leh khawlohnain in khat si.

²⁹“Nangni Dân zirtîrtu leh Farisai vervêkte u, in chung a pik e! Zâwlnei thlân inte in sa a, mi fel thlânte pawh in cheimawi a.

³⁰‘Kan pi leh pute dam lai khân awm ve pawh ni ila, zâwlneite thisen chhuahnaah zawng kan tel ve lo vang,’ in ti ṭhîn.

³¹Chutiangin zâwlneiho thattute thlah in nihzia in tilang a ni.

³²In pi leh puten an lo tih ṭan tawh chu hlen law law rawh u.

³³Rûlte u, rûlrial thlahte u, hremhmun rorêlna chu engtin nge in pumpelh theih ang?

³⁴“Ngai teh u, chumi avâng chuan in hnênah zâwlnei te, mi fing te, Dân zirtîrtute ka rawn tîr dâwn; ṭhenkhat in tihlum ang a, in khêngbet ang; ṭhenkhat sunagog-ah in vua ang a, khaw tinah in tiduhdah zui zêl ang.

³⁵Chutichuan, Abela, mi fel tak thisen chhuah aṭangin, Hmun Thianghlim leh maichâm inkâra Barakia fapa Zakaria thisen in chhuah thleng khân, lei chunga mi fel thisen chhuak zawng zawng mawh chu nangniho chungah a tla ang.

³⁶Thu dik ka hrilh a che u, chûng zawng zawng chu tûnlai mite chungah a thleng dâwn a ni.

³⁷“Aw Jerusalem, Jerusalem, zâwlneite thattu, i hnêna tirhte lo dêng hlumtu! Arpuiin a notê a thla hnuaia a awp khâwm angin i fate vawi eng zât nge awp khâwm ka tuma, in duh si loh kha?

³⁸Ngai teh u, in Tempul chu a rauhsan a, a ram ta a ni.

³⁹Ka hrilh a che u, ‘Lalpa hminga lo kal chu fakin awm rawh se,’ in tih hma chuan tûn a chinah mi hmu leh dâwn tawh lo a nih hi,” a ti a.