Read Mizo Lushai CHANCHIN ṬHA MATTHAIA ZIAK 24 Bible Online

CHANCHIN ṬHA MATTHAIA ZIAK 24 - Mizo Lushai bible

CHANCHIN ṬHA MATTHAIA ZIAK 24

¹Isua chu Tempul ata a chhuak a, a kalsan dâwn laiin, Tempul sak dân te chu entîr tûrin zirtîrte an lo kal a.

²Ani erawh chuan a chhâng a, an hnênah, “Hêng zawng zawng hi in hmu maw? Thu dik ka hrilh a che u, lung intiang rêng rêng hi pakhat mah tihchim lohva hnutchhiah a awm lo vang,” a ti a.

³Tin, Oliv tlânga a ṭhut laiin zirtîrte chu anmahni chauhvin a hnênah an lo kal a, “Chûng chu engtikah nge a lo awm ang a, i lo kal lehna leh khawvêl tâwp chhinchhiahna thil mak eng eng nge awm ang, min hrilh teh,” an ti a.

⁴Isuan a chhâng a, “Tu man an hruai bo loh nân che u fîmkhur rawh u.

⁵Ka hming chhâlin ‘Krista chu ka ni,’ tiin mi tam tak an lo chhuak dâwn si a, mi an hruai bo ṭeuh ṭeuh vang.

⁶Indo ri te, indo chanchin te pawh in hria ang a, thlaphâng lo tûrin fîmkhur rawh u; chûng chu lo thleng tûr rêng a ni; hun tâwp erawh chu a la ni rih lo ve.

⁷Hnam hrang leh hnam hrang an indo vang a, sawrkâr hrang leh sawrkâr hrang an indo bawk ang, hmun hrang hrangah ṭâm a tla ang a, lîr a nghîng bawk ang.

⁸Chûng zawng zawng chu nau vei a inṭan ta tihna a ni.

⁹“Chumi hunah chuan hrehawm tuar tûrin an mantîr ang che u a, an tihlum ang che u; ka hming avângin hnam zawng zawngin an hua ang che u.

¹⁰Chumi hunah chuan mi tam tak an tlu ang a, an inmantîr tawn ang a, an inhaw tawn ang.

¹¹Zâwlnei der tam tak an lo chhuak ang a, mi an hruai bo ṭeuh ṭeuh vang;

¹²Suahsualna a pun dâwn avângin mi tam zâwk hmangaihna chu a la dai ang.

¹³Nimahsela, a tâwp thlenga chhel taka tuar peih apiang, chûng mite ngei chu chhandam an ni ang.

¹⁴Ram Chanchin Ṭha hi hnam zawng zawng hriat tûrin khawvêl pum puia hril a ni ang a, chumi zawhah chuan tâwpna chu a lo thleng dâwn a ni.

¹⁵“Chutichuan, tiṭiautu tenawm zawlnei Daniela hmanga sawi kha, hmun thianghlima ding in hmuh hunah chuan (a chhiar chuan a awmzia hre rawh se)

¹⁶Judai rama awmte chu tlângramahte tlân rawh se;

¹⁷in chunga awm chu in chhûnga englo chuh tûrin chhuk suh se,

¹⁸Lova feh pawh a silhfên chuh tûrin haw hek suh se.

¹⁹Nau pai te leh nauno pawmte chu an va khawngaihthlâk dâwn êm!

²⁰Thlasik lai emaw, Sabat ni emawa in tlân a ṭûl loh nân ṭawngṭai rawh u.

²¹Chumi hun chu a hrehawm êm êm dâwn a ni; chutianga hrehawm chu leilung pian tirh ata tûn thlengin a la awm ngai lo va, awm pawh a awm leh tawh hek lo vang.

²²Chûng nite chu tihtawi ni suh sela, mihring tu mah dam khawchhuak an awm lo vang; nimahsela, thlante avângin chûng nite chu tihtawi a ni ang.

²³“Chutih hunah chuan tu pawhin in hnênah, ‘En teh u, Krista chu heta hi,’ emaw, ‘Sawta saw,’ emaw an tih pawhin awih duh suh ang che u.

²⁴Krista der leh zâwlnei derte an lo chhuak dâwn si a; thei ang se thlante meuh pawh an hruai bo theih nân chhinchhiahna leh thil mak ropui tak tak an ti ang.

²⁵Ngai teh u, ka hrilh diam tawh che u hi.

²⁶Chutichuan, in hnênah, ‘Thlalêrah a awm e,’ an tih chuan kal chhuak suh u, ‘En teh u, pindan chhûngrilah a awm,’ an tih pawhin awih duh hek suh ang che u.

²⁷Chhak lamah kâwl a lo phe a, thlang lam thlengin a ên ṭhîn. Mihring Fapa lo kal lehna pawh chutiang chu a ni dâwn si a.

²⁸“Khawiah pawh sa ruang awmna apiangah mulukawlhte an awm khâwm ang.

²⁹“Tin, chûng hun hrehawm chu a liam veleh ni a thim ang a, thla a êng hek lo vang; vân aṭangin arsite a tla ang a, vân thiltihtheihnate chu tihnghîn a ni ang.

³⁰Chutih hunah chuan Mihring Fapa chhinchhiahna chu vânah a lo lang ang a, chumi hunah chuan leia chi tinrêngin ṭapin an âwm an chûm ang a, Mihring Fapa hi thiltihtheihna leh ropuina nasa tak nên vân chhûm zînga a lo kal an hmu ang.

³¹Vântirhkohte chu tawtawrâwt ri ruai ruai nên a tîr chhuak ang a, anni chuan thlante chu kâwlkil li ata vân tâwp aṭanga a tâwp lehlam thlengin an lâwr khâwm ang.

³²“Tichuan, theipui kûng awm dân aṭang hian zir tûr in nei; a zîk a lo no va, hnah a rawn chhuah chuan nipui a thaw dâwn tih in hre ṭhîn.

³³Chutiang bawkin, nangni pawhin chûng zawng zawng in hmuh hun chuan ani chu a lo hnai tawh a, a lo thleng ṭêp tawh tih hria ang che u.

³⁴Thu dik ka hrilh a che u, chûng zawng zawng chu a thlen hma loh chuan tûnlai mite hi an ral hman lo vang.

³⁵Lei leh vân a ral ang a, ka thu erawh chu a ral lo vang.

³⁶“Nimahsela, chûng lo thlen hun tûr ni leh dâr chu, Pa chauh lo chuan tu man an hre lo; vâna vântirhkohte pawhin, Fapa pawhin an hre lo.

³⁷Tin, Nova dam lai ang khân Mihring Fapa lo kal lehna chu a ni ang.

³⁸Tuilêt hma, Nova lawnga a luh ni thlengin an eiin an in a, nupui pasal an innei ṭhîn a;

³⁹tui a lo lian a, an zaa a lâk bo vek hma loh chuan eng mah an hre lo, Mihring Fapa lo kal lehna chu chutiang bawk chu a ni ang.

⁴⁰Chumi hunah chuan lovah mi pahnih an awm ang a, pakhat chu lâk a ni ang a, pakhat chu hnutchhiah a ni ang.

⁴¹Hmeichhe pahnihin buh an dêng ang a, pakhat chu lâk a ni ang a, pakhat chu hnutchhiah a ni ang.

⁴²“Chutichuan, inring rengin awm rawh u, eng ni-ah nge in Lalpa a lo kal dâwn in hre si lo.

⁴³Nimahsela, hei hi in hria e, rûkru lo kal tûr in neituin hria sela, a lo inring ang a, a in a reh pawhtîr lo vang.

⁴⁴Chuvângin, nangni pawh inpeih rengin awm rawh u, in beisei loh hunah Mihring Fapa chu a lo kal hlauh dah ang e.

⁴⁵“An puin an chhûngkaw hotu-ah leh an chaw sem huna semsak ṭhîntu atân sum enkawltu rinawm tak leh fing a ruat tûra chu tu nge ni ang?

⁴⁶An pu hâwn huna bawih chutiang ti a rawn hmuh chu a nihlawh e.

⁴⁷Thu dik ka hrilh a che u, a neih zawng zawng chunga hotu-ah a rawn siam ang.

⁴⁸Amaherawhchu, bawih sual chuan, ‘Ka pu hi a lo haw lawk dâwn lo ve,’ ti rilruin

⁴⁹a bawihpuite lo vêl ta sela, zu ruite nên eiin in sela,

⁵⁰chu bawiha pu chu a rin loh ni-ah, a hriat loh dârah a lo kal ang a,

⁵¹bung hnihah a rawn chhuah ang a, mi vervêkte chan ang a chantîr ang; chutah chuan an ṭap ang a, hâ an ṭhial ang.