Read Mizo Lushai CHANCHIN ṬHA MATTHAIA ZIAK 27 Bible Online

CHANCHIN ṬHA MATTHAIA ZIAK 27 - Mizo Lushai bible

CHANCHIN ṬHA MATTHAIA ZIAK 27

¹Zîng a lo nih chuan puithiam lalte leh vântlâng upa zawng zawng chuan Isua tihhlum dân tûr an rêl a:

²An phuar a, an kai a, Ramawptu Pilata hnênah an hruai a.

³A mantîrtu Juda chuan Isua chu thiam loh an chantîr tih a hriat veleh a inchhîr a, tangka sawmthum kha puithiam lalte leh upate a pe kîr leh a.

⁴“Mi pawisawi lo thi tûra ka mantîr kha ka lo tisual a ni,” a ti a. Anni erawh chuan, “Chu chu kan tân eng nge pawi ang? Nangin i tih tihin ti rawh,” an lo tihsan a.

⁵Tichuan, tangka chu Hmun Thianghlimah a paih lût a, a kal a, a va inâwk hlum ta a.

⁶Puithiam lalte chuan tangka chu an la a, “Hei hi Tempul tangka bâwma dah a thiang lo ve, thisen man a ni si a,” an ti a.

⁷Tichuan, an inrâwn a, mikhual phûm nân bêlvawtu hmun an lei ta a.

⁸Chuvângin a ni, chu hmun chu, tûn thlengin ‘Thisen hmun’ an tih tâk ni.

⁹Chutichuan, zâwlnei Jeremia hmanga sawi kha a lo thleng ta a ni: “Israel fa tuten emaw Tangka sawmthum an chhiara Man chu an la a,

¹⁰Lalpan thu a pêk ang khân Bêlvawtu hmun manah an pe a,” a tih hi.

¹¹Isua chu Ramawptu hmaah chuan a ding a, Ramawptu chuan, “Juda-te lal i ni maw?” tiin a zâwt a. Isuan a hnênah, “I sawi chu,” a ti a.

¹²Puithiam lalte leh upate hêkna chu a enga mah a chhâng lo.

¹³Tichuan, Pilatan a hnênah, “An hêkna zozai che hi i hre lo vem ni?” a ti a.

¹⁴Nimahsela, a chhâng hlek lo va, an hêkna pakhat mah a chhân loh avâng chuan mak a ti êm êm a.

¹⁵Ramawptu chuan kût niin mi tâng pakhat an dîl apiang a chhuahsak ṭhîn a.

¹⁶Chumi lai chuan mi hmingthang tak Baraba an tih chu lung inah a tâng a.

¹⁷Tichuan, an lo pung khâwm chu Pilatan, “Tu nge chhuahsak che u ila in duh, Baraba nge Isua, Krista an tiha hi?” a ti a.

¹⁸Îtsîkna avângin ani chu a hnênah an rawn hlân tih a hre si a.

¹⁹Rorêlnaa a ṭhut laiin Pilata nupuiin, “Kha mi fel tak chungah khân eng mah ti suh; vawiin hian amah avângin mumangah thil tam tak ka tuar a ni,” tiin a rawn chah bawk a.

²⁰Puithiam lalte leh upate chuan Baraba chu chhuaha, Isua chu tiboral tûra ngên tûrin mipuite chu an thlêm thlu ta a.

²¹Ramawptu chuan an hnênah, “Anni pahnih hi a tu zâwk hi nge chhuahsak che u ila in duh?” a ti leh a.

²²Anni chuan, “Baraba,” an ti a. Pilatan an hnênah, “Isua, Krista an tih hi, engtin nge ka tih tâk ang le?” a ti a. An za-in, “Krawsah khêngbet rawh,” an ti a.

²³Ramawptu chuan, “Engah maw, eng nge a tihsual ni?” a ti a. Nimahsela, mipui chu, “Krawsah khêngbet rawh,” tiin an au ta tuar tuar a.

²⁴Tichuan, Pilatan engtia tih mah a sâwt lo va, buaina a chhuak mai dâwna a hriatin, tui a la a, mipui hmaah chuan a kut a sil a, “He mi fel thisenah hian ka hul e, nangnin in tih tihin ti rawh u,” a ti a.

²⁵Mipui chuan an za-in, “A thisen mawh chu keimahni chungah leh kan fate chungah awm rawh se,” tiin an chhâng a.

²⁶Tichuan, Baraba chu a chhuahsak a; Isua erawh chu sipaite a vuaktîr a, krawsa khenbeh tûrin an kutah a pe ta a.

²⁷Tichuan, Ramawptu sipaite chuan Isua chu praitorian-ah an hruai lût a, an pâwla mi zawng zawng a bulah an au khâwm a.

²⁸A kawr an hlihsak a, kawrfual senduk an hâktîr a.

²⁹Chawimawina atân hlîng an kual a, an khumtîr a, a kut ding lamin tiang an kentîr a, a hmaah an ṭhingṭhi a, “Chibai, Juda-te lal,” tiin nuihza siam nân an hmang ta a.

³⁰Ani chu chil an chhâk a, tiang chu an lâksak a, a luah an vua a.

³¹Nuihza siam nân an hman zawhin kawrfual chu an hlihsak a, ama kawr chu an hâktîr leh a, krawsa khenbeh tûrin an hruai ta a.

³²Kalkawnga an kal laiin Kurini khuaa mi, a hming Simona an hmu a, Isua kraws putsak tûrin an man a.

³³Golgotha, ‘Luruh hmun’ an tih chu an va thleng a;

³⁴Chutah chuan uain, thil kha nêna pawlh a in tûrin an pe a; a han tem a, a in duh ta lo va.

³⁵An khenbeh zawhin a silhfênte chu ṭhumvâwrin an insem a.

³⁶Chutah chuan an ṭhu a, amah chu an vêng a.

³⁷Amah hêkna, ‘He mi hi Isua, Juda-te lal a ni,’ tih ziak a lu chungah chuan an bel a.

³⁸A rual chuan suamhmang pahnih krawsah an khêngbet ve a, a ding lamah pakhat, a vei lamah pakhat.

³⁹Mi veivâk nuk nukte chuan an lu an thing a, an tiel a.

⁴⁰“Nang, Tempul hi ṭhiata ni thuma din leh theitu, intidam rawh. Pathian Fapa i nih meuh chuan kraws ata kha lo chhuk ta che,” an ti a.

⁴¹Chutiang bawkin puithiam lalte chuan Dân zirtîrtute leh upate nên nuihzatin,

⁴²“Mi dang mah tidam ṭhîn, mahni lah intidam thei si lo! Israel lal alâwm, tûnah hian kraws ata lo chhuk sela kan ring ang chu!

⁴³Pathian a ring alâwm, amah hi a duh chuan tûnah chhan chhuak ang hmiang, ‘Pathian Fapa ka ni,’ a ti si a,” an ti a.

⁴⁴Suamhmang khenbehte pawh chuan chutiang bawkin an tiel ve a.

⁴⁵Dâr sâwm leh pahnih aṭanga tlai dâr thum thlengin khawvêl pum pui a thim ta vek a.

⁴⁶Tlai dâr thum vêlah chuan Isua chu ring takin a au chhuak a, “Eli, Eli, lema sabakthani” a ti a; chu chu, ‘Ka Pathian, ka Pathian, engah nge mi kalsan?” tihna a ni.

⁴⁷A kianga ding ṭhenkhat chuan chu chu an hriatin, “He mi hian Elija a ko va ni,” an ti a.

⁴⁸An zînga pakhat chu a tlân nghâl a, sponj a la a, uain thûrah a chiah a, tiangah a târ a, Isua chu intîr a tum a.

⁴⁹Mi dangte chuan, “Ngawi rú, amah chhan tûrin Elija a lo kal emaw i en ang u,” an ti a.

⁵⁰Isua chu ring takin a au leh a, a thlarau a thlah ta a.

⁵¹Ngai teh, Tempul chhûng puanzâr chu a chung lam aṭangin a hnuai lam thlengin a thlêr thla a; lîr a lo nghîng a, lungpuite a khi chat a.

⁵²Thlânte a lo inhawng a, mi thianghlim muhîl tawhte taksa tam tak pawh kaihthawh a ni ta a.

⁵³A thawhleh hnuah chuan chûngte chu thlân ata lo chhuakin khaw thianghlimah chuan an lût a, mi tam tak hnênah an inlâr a.

⁵⁴Sipai za hotu leh a bula Isua vênga awm vete chuan, lîrnghîng leh thil lo thlengte chu an hmuhin an hlau ta êm êm a, “He mi hi Pathian Fapa a ni ngei mai,” an ti a.

⁵⁵Chutah chuan hmeichhe tam tak, a rawngbâwla Galili aṭanga Isua rawn zuitute chu an awm bawk a, hla tak aṭangin an thlîr a.

⁵⁶Chûng zîngah chuan Magdala mi Mari te, Jakoba leh Josia nu Mari te an tel a, Zebedaia nupui pawh a tel a.

⁵⁷Tlaiah chuan Arimathai khuaa mi hausa pakhat, a hming Josefa a lo kal a, ani pawh chu Isua zirtîr a ni bawk a.

⁵⁸Chu mi chu Pilata hnênah a va kal a, Isua ruang chu a dîl a.

⁵⁹Pilata chuan a lo phal a. Tichuan, Isua ruang chu Josefa chuan a hlâwm a, puan zai sîn fai takin a tuam a,

⁶⁰ama thlân thar, lung a ker kuakah chuan a zalh a; thlân kawngka chu lung lian takin a khâr a, a kalsan ta a.

⁶¹Chutah chuan Magdala mi Mari leh Mari dang chu an awm ve a, thlân hma zâwnah chuan an ṭhu a.

⁶²A tûk, Sabat ni chuan puithiam lalte leh Farisai-te chu a huhovin Pilata hnênah an kal a

⁶³“Ka pu, Tihdertua khân a dam laiin, ‘ni thum chinah ka tho leh ang,’ a tih kan hre reng a ni.

⁶⁴Chuvângin, thlân chu ni thum ni thlenga vêng ṭha tûrin thu pe rawh; chuti lo chu a zirtîrten amah chu an va ru hlauh ang a, vântlâng hnênah, ‘Mitthi zîng ata a tholeh ta a ni,’ an ti dah ang e; tichuan, tihderna hnuhnûng zâwk chu a hmasa ai khân a ṭha lo lehzual ang,” an ti a.

⁶⁵Pilatan an hnênah, “Vêngtute in nei alâwm, kal ula, ṭha in tih ang apiangin vêntîr rawh u,” a ti a.

⁶⁶Chutichuan, an kal a, thlân khârna lung chu an chhinchhiah a, vêngtute chu an vêntîr ta tlat a.