Read Mizo Lushai CHANCHIN ṬHA MATTHAIA ZIAK 28 Bible Online

CHANCHIN ṬHA MATTHAIA ZIAK 28 - Mizo Lushai bible

CHANCHIN ṬHA MATTHAIA ZIAK 28

¹Sabat ni a lo ral a, Pathianni zînga khua a vâr dâwnin Magdala mi Mari leh Mari dang chu thlân en tûrin an kal a.

²Ngai teh, lîr nasa takin a lo nghîng a; Lalpa Vântirhkoh vân aṭangin a lo chhuk a, lung chu a rawn lum sawn a, a chungah a ṭhu ta a.

³A lan dân chu kâwlphe ang a ni a, a silhfênte chu vûr angin a vâr a.

⁴Amah an hlauh êm avângin vêngtute chu an khûr a, mitthi ang maiin an lo awm ta a.

⁵Vântirhkoh chuan hmeichhiate chu a bia a, “Nangni chuan hlau suh u, Isua an khenbeh kha in zawng tih ka hria e.

⁶Hetah a awm tawh lo ve, a sawi ang ngeiin kaihthawh a ni tawh a, a mutna hmun hi rawn en teh mah u.

⁷Tin, kal thuai ula, a zirtîrte hnênah, ‘Mitthi zîng ata kaihthawh a ni ta, Galili ramah a lo kal hmasa dâwn a, chutah chuan amah in hmu ang,’ ti ang che u. Ngai teh u, ka hrilh tawh che u hi,” a ti a.

⁸Hlau leh lâwm êm êm chungin thlân aṭang chuan hmanhmawh takin an kal a, zirtîrte hrilh tûr chuan an tlân ta a.

⁹Ngai teh, Isuan anni chu a tâwk a, “Chibai u,” a ti a. Tichuan, a kephahte chu an vuan a, kûnin chibai an bûk a.

¹⁰Isuan an hnênah, “Hlau suh u, kal ta ula, Galili rama kal tûrin ka unaute va hrilh rawh u; chutah chuan mi hmu ang,” a ti a.

¹¹An kal lai chuan vêngtu ṭhenkhat chu khawpuiah an va lût a, thil lo thleng zawng zawng chu puithiam lalte an hrilh a.

¹²Upate nên an kal khâwm a, an inrâwn zawhin vêngtute chu tangka tam tak an pe a.

¹³“Zânah kan muthilh hlânin a zirtîrte an lo kal a, amah an ru ta a ni,” ti ang che u.

¹⁴Ramawptuin chu chu a lo hre ta a nih leh amah chu kan thlêm ang a, hlauhthâwn tûr nei lovin kan siam ang che u,” an ti a.

¹⁵Chutichuan, tangka chu an la a, an hrilh ang zêl chuan an ti ta a; tichuan, tûn thlengin chu thu chu Juda-te zîngah an la sawi darh ta zêl a ni.

¹⁶Zirtîr Sâwmpakhatte chu Galili ramah, Isuan tlâng a ruatsakah chuan an kal a.

¹⁷Amah an hmuh chuan kûnin chibai an bûk a; ṭhenkhat erawh chuan an ringhlel a.

¹⁸Isuan a rawn pan a, anni chu a bia a, “Lei leh vâna thuneihna zawng zawng pêk ka ni ta.

¹⁹Tichuan, kal ula, hnam zawng zawng zirtîrah siam rawh u; Pa leh Fapa leh Thlarau Thianghlim hmingah chuan baptis ula, thu ka pêk zawng zawng che u pawm tûrin zirtîr rawh u.

²⁰Tin, ngai teh u, kei, kumkhuain, khawvêl tâwp thleng pawhin, in hnênah ka awm zêl ang,” a ti a.