Read Mizo Lushai CHANCHIN ṬHA MATTHAIA ZIAK 3 Bible Online

CHANCHIN ṬHA MATTHAIA ZIAK 3 - Mizo Lushai bible

CHANCHIN ṬHA MATTHAIA ZIAK 3

¹Chûng lai chuan baptistu Johana chu Judai ram thlalêrah thu hrilin a lo kal a.

²“Sim rawh u, vânram chu a hnai tawh e,” a ti a.

³Ani hi a ni, zâwlnei Isaian, “Thlalêra mi au aw chuan, ‘Lalpa lamlian chei ṭha ula, A kal nân kawng tluang siam rawh u,’ a ti,” tia a sawi kha.

⁴Chu Johana chuan sanghâwngsei hmul kawr a ha a, savun kâwnghrên a hrêng a, a chaw chu khaukhuap leh ram khawizu a ni.

⁵Chutih lai chuan Jerusalem leh Judai ram hmun tina awmte leh Jordan luidung vêl ram zawng zawnga awmte chuan ani chu an pan huai huai a,

⁶an sualte an puang a, Jordan luiah chuan a lo baptis hlawm a.

⁷Tin, Farisai leh Sadukai tam tak baptisma chang tûra lo kal ve a hmuhin an hnênah, “Rûl thlahte u, thinur lo thleng tûr pumpelh nân tu nge baptisma chang tûra fuih che u?

⁸In sim ngei a ni tih tilang tûrin thil ti zêl zâwk rawh u.

⁹‘Kan pa chu Abrahama asin’ in lo ti dah ang e; ka hrilh a che u, Pathian chuan hêng lung hi Abrahama thlahah a din thei a ni.

¹⁰Tûn apangin thing bul tinah hreipui an dah ta, thing eng pawh rah ṭhaa rah lo chu kiha meia tuah mai tûr a ni.

¹¹Kei zawngin sim entîr nân tuiin ka baptis ṭhîn che u a; ka hnunga lo kal tûr erawh chu kei aiin a ropui zâwk a, a pheikhawk keng tlâk pawh ka ni lo ve.

¹²Ani zawngin Thlarau Thianghlim leh meiin a baptis ang che u; a hruiha buh chu zâp faia zêma khung mai tûrin a sisêp chu a keng tawh a, a site erawh chu tihmih rual loh meiah a hâl ral ang,” a ti a.

¹³Chutih lai chuan Galili ram aṭangin Johana hnênah, Jordan luia baptisma chang tûrin Isua chu a lo kal a.

¹⁴Johana erawh chuan, “Mi baptis tûr i ni zâwk si a, ka hnênah i lo kal a ni maw?” tiin a hnial a.

¹⁵Nimahsela, Isuan, “Tûnah remti hrâm rawh, hetiang felna zawng zawng hlen chhuah hi kan tân a mawi a ni,” a ti a.

¹⁶Tichuan, a remti ta a. Isuan baptisma a chan zawh chuan tui ata chu a chhuak nghâl a; a tân vân a lo inhawng a, Pathian Thlarau chu ṭhuro anga lo chhukin a chunga fu a hmu a.

¹⁷Ngai teh, vân aṭanga awin, “Hei hi ka Fapa, ka Duhtaka chu a ni, a chungah ka lâwm êm êm a ni,” a ti a.