Read Mizo Lushai CHANCHIN ṬHA MATTHAIA ZIAK 4 Bible Online

CHANCHIN ṬHA MATTHAIA ZIAK 4 - Mizo Lushai bible

CHANCHIN ṬHA MATTHAIA ZIAK 4

¹Chumi zawh chuan Isua chu Diabola thlêm tûrin thlalêrah Thlarauvin a hruai chho ta a.

²Ni sawmli leh zân sawmli chaw a nghei hnuin a ril a lo ṭâm a.

³Thlêmtu chu a lo kal a, a hnênah, “Pathian Fapa i nih tak tak chuan hêng lung hi chhanga chang tûrin thu pe rawh,” a ti a.

⁴Ani erawh chuan, “Mihring hi chhang ringawt ringin an nung tûr a ni lo. Pathian ka aṭanga thuchhuak tinrêng an ring bawk tûr a ni,” a ti a.

⁵Diabola chuan ani chu khaw thianghlimah a hruai lût a. Tempul chhîpah a dintîr a,

⁶a hnênah, “Pathian Fapa i nih meuh chuan zuang thla rawh. ‘I chungthu-ah zawng vântirhkohte thu a pe ang a, An kutin an dâwm ang chia, Tichuan, lungah i ke i sawh dâwn lo nia,’ tih ziak a ni si,” a ti a.

⁷Isua chuan a hnênah, “‘Lalpa i Pathian fiah suh’ tih ziak a ni bawk asin,” a ti a.

⁸Diabola chuan tlang sâng takah a hruai leh a, khawvêl ram zawng zawng leh a ropuina a entîr a;

⁹a hnênah, “Lei siin chibai mi bûk la, hêng zawng zawng hi ka pe ang che,” a ti a.

¹⁰Isuan a hnênah, “Setan, kal bo daih rawh, ‘Lalpa i Pathian chu chibai bûk la, ama rawng chauh bâwl rawh,’ tih ziak a ni,” a ti a.

¹¹Tichuan, Diabola chuan a kalsan a, vântirhkohten rawng an bâwlsak ta a.

¹²Johana an man tih a hriatin Isua chu Galili ramah a kal ta daih a.

¹³Nazaret chhuahsanin Kapernaum khuaah a zu awm ta reng a, chu chu Zebulun leh Naftali biala dîl kama awm a ni;

¹⁴zâwlnei Isaia sawi kha a lo thleng ta a ni:

¹⁵“Zebulun leh Naftali ram Tuipui panna kawng, Jordan râl, Jentail-te chênna Galili.

¹⁶Thim hnuaia ṭhute chuan êng nasa tak an hmu a, Thihna ram thima chêngte chungah chuan êng a lo chhuak ta,” a tih kha.

¹⁷Chuta chinah chuan Isuan, “Sim rawh u, vânram chu a hnai tawh e,” tiin a hril ṭan ta a.

¹⁸Galili dîl kama a lên pahin unau pahnih, Simona, Petera an tih leh Andria chu dîla an lên dêng a va hmu a; sangha man mi an ni rêng a.

¹⁹An hnênah, “Mi zui rawh u; tichuan, mihring mantuah ka siam ang che u,” a ti a.

²⁰An lênte chu an hnutchhiah a, ani chu an zui ta nghâl a.

²¹Chuta ṭang chuan a kal zêl a, unau dang pahnih, Zebedaia fa, Jakoba leh Johana chu a hmu a, an pa Zebedaia hovin lawngah an lên an lo ṭhui ṭha a, anni chu a ko va.

²²Tichuan, lawng leh an pa chu an kalsan a, Isua chu an zui ta nghâl a.

²³Isua chuan Galili ram a fang vêl a, an sunagog -ahte zirtîrin, Ram Chanchin ṭha chu a hril a, Israel-te zînga natna tinrêng leh chak lohna tinrênga nâte chu a tidam zêl a.

²⁴Tichuan, Suria ram zawng zawngah a chanchin chu a thang ta a; damlo zawng zawng, damlohna leh natna tinrêng tuar te, ramhuai man te, thla-em-ât te leh zeng te, a hnênah an rawn hruai a, a lo tidam hlawm a.

²⁵Galili ram aṭang te, Dekapoli khua aṭang te, Jerusalem aṭang te, Judai ram aṭang te leh Jordan râl aṭang te chuan mipui nasa takin amah an zui a.