Read Mizo Lushai CHANCHIN ṬHA MATTHAIA ZIAK 5 Bible Online

CHANCHIN ṬHA MATTHAIA ZIAK 5 - Mizo Lushai bible

CHANCHIN ṬHA MATTHAIA ZIAK 5

¹Mipui chu a hmuhin tlângah a chho va, a ṭhu a, a zirtîrte an lo kal khâwm a;

²thu a sawi a, anmahni a lo zirtîr a:

³“Thlarau lama an pachhiatzia inhriate chu an chan a ṭha e, vânram chu an ta a ni si a.

⁴“Lungngaite chu an chan a ṭha e, thlamuan an la ni dâwn si a.

⁵“Thuhnuairawlhte chu an chan a ṭha e, ram chu an la rochung dâwn si a.

⁶“Felna duha rilṭâma tuihâlte chu an chan a ṭha e, an la tlai dâwn si a.

⁷“Khawngaihna nei mite chu an chan a ṭha e, khawngaih an la hlawh dâwn si a.

⁸“Thinlunga thianghlimte chu an chan a ṭha e, Pathian an la hmu dâwn si a.

⁹“Remna siamtute chu an chan a ṭha e, Pathian fate tih an la ni dâwn si a.

¹⁰“Felna avânga tihduhdah tuartute chu an chan a ṭha e, vânram chu an ta a ni si a.

¹¹“Keimah avânga miin an hau che ua, an tihduhdah che u a, dik lo taka sual tinrêng tia an puh hun che u chuan in chan a va ṭha dâwn êm!

¹²Lâwm ula, hlim takin awm rawh u, vânah in lâwmman a awm hnem si a; chutiang bawkin in hmaa zâwlneite pawh kha an tiduhdah ṭhîn asin.

¹³“Lei chi in ni e; nimahsela, chi hi da ta ang se, engtia tihal leh tûr nge ni ang? Paih chhuaha, mite rah mai mai chauhvah lo chuan eng atân mah a tlâktlai tawh lo vang.

¹⁴“Khawvêl êng in ni e. Tlângchhîpa khaw awm chu thuhrûk theih a ni lo.

¹⁵Miin an khâwnvâr chhit chu khovin an khuh ngai lo, a dahnaah an dah zâwk ṭhîn; tichuan, in chhûnga mi zawng zawng a ên ṭhîn.

¹⁶Chutiang bawkin in êng chu mi hmuhin êng rawh se; chutichuan, in thil ṭha tihte an hmu ang a, in Pa vâna mi an chawimawi thei ang.

¹⁷“Dân thu emaw, zâwlneite thu emaw ṭhiat tûra lo kal ka nih ring suh u, ṭhiat tûr ni lovin tifamkim tûra lo kal ka ni zâwk.

¹⁸Thu dik ka hrilh a che u, lei leh vân hi a awm chhûng chu Dân thu-a mi chhun han hlek emaw, thai han hlek emaw, a zaa a thlen kim zet hma chuan a pakhat mah hi a râl tawp lo vang.

¹⁹Chutichuan, hêng thupêk zînga pawimawh lo ber pakhat pawh hi ngainêpa, chutianga ti ve tûra mite zirtîr apiang chu vânramah chuan mi tê ber an ti ang; amaherawhchu, tu pawh zâwma, zirtîr ve chu vânramah chuan mi lian an ti ang.

²⁰In felnain Dân zirtîrtute leh Farisai-te felna a khûm loh chuan vânramah in lût tawp lo vang tih ka hrilh che u a nih hi.

²¹“Hmânlai mite hnênah, ‘Tual i that tûr a ni lo, tual that rêng rêng chu an chungthu rêl tûr a ni,’ tih a nih thu in hria e.

²²Kei erawh chuan ka hrilh a che u, mahni unau chunga thinur chu a chungthu rêl tûr a ni; a unau ‘mi chhawihpa,’ ti chu Sanhedrin-a rêl tûr a ni ang; a unau ‘mi â pa,’ ti phei chu hremhmun meia kal tlâk a ni tih ka hrilh che u hi.

²³Tichuan, i thilpêk maichâma i hlan dâwn laiin i unauvin i chungah lungnih lohna a nei tih i hriat chhuah chuan,

²⁴maichâm hmaah i thilpêk chu hnutchhiah la, kal langin, i unau chu rem zet la, chumi hnuah i thilpêk chu hlân rawh.

²⁵I khingpui chu kalkawnga in kal dun laiin rem thuai rawh; chutilo chu, rorêltu a mantîr ang chia, rorêltu chuan pulis hnênah a hlân ang chia, tân inah an khung hlauh dah ang che.

²⁶Thu dik ka hrilh a che, pawisa pakhat pawh i tlâk kim hma chu chuta ta chu i chhuak tawp lo vang.

²⁷“ ‘I uire tûr a ni lo,’ tih a nih in hria e.

²⁸Kei erawh chuan ka hrilh a che u, tu pawh, ngaih châka hmeichhe melhtu chu, a thinlungah a uire tawh reng a ni.

²⁹I mit ding lamin a tihtlûk che chuan kher chhuak la, paih daih rawh; i taksa a puma hremhmuna paih a nih ai chuan, i taksa pêng pakhat boral chu i tân a ṭha zâwk e.

³⁰Tin, i kut ding lamin a tihtlûk che chuan, tan la, paih daih rawh; i taksa a puma hremhmuna paih a nih ai chuan, i taksa pêng pakhat boral chu i tân a ṭha zâwk e.

³¹“ ‘Tu pawh nupui ma chuan mâkna lehkha pe rawh se,’ tih a ni bawk a.

³²Kei erawh chuan ka hrilh a che u, uire vâng ni lova nupui ma apiang chuan an nupui chu an uiretîr a ni, mâk hnu nei pawh an uire a ni.

³³“Hmânlai mite hnênah, ‘dâwtin chhia chham suh la, Lalpa hnênah i chhechham chu i hlen tûr a ni,’ tih a nih in hre bawk a.

³⁴Kei erawh chuan ka hrilh a che u, chhia rêng rêng chham suh u; vân chhâlin chham suh u, chu chu Pathian lalṭhutthlêng a ni si a;

³⁵lei chhâlin chham bawk hek suh u, chu chu a ke nghahchhan a ni si a; Jerusalem chhâl pawhin chham suh u, chu chu Lal ropui tak khawpui a ni si a.

³⁶I lu chhâlin i chham tûr a ni hek lo, samzai pakhat pawh i tivârin i tidum thei si lo va.

³⁷In thu sawi chu ‘ni,’ emaw, ‘ni lo,’ emaw ni ngawt rawh se, chûng aliam chu sual laka chhuak a ni.

³⁸“ ‘Mit aiah mit, ha aiah ha,’ tih a nih in hria a.

³⁹Kei erawh chuan ka hrilh a che u; mi sual dodâl suh u; i biang ding lam bêngtu hnênah chuan a lehlam pawh dawh rawh.

⁴⁰Tu pawhin i lakah thu pawi siamin i kawr lâk an tum chuan, I puan pawh lâktîr mai rawh.

⁴¹Tin, km. khat hruai luitu che chu km. hnih zui rawh.

⁴²An dîl che chuan pe la, i laka pûk duhtu chu hawisan suh.

⁴³“ ‘I vêngte i hmangaih tûr a ni a, i hmêlma chu i haw tûr a ni,’ tih a nih in hria a.

⁴⁴Kei erawh chuan ka hrilh a che u: i hmêlmate chu hmangaih la, a tiduhdahtu che chu ṭawngṭaisak rawh,

⁴⁵in Pa vâna mi fate in nih theih nân ani chuan mi sualte leh mi ṭhate chungah ni a chhuahtîr a, mi dik leh dik lote chungah pawh ruah a surtîr ṭhîn.

⁴⁶Nangmahni hmangaihtute chauh in hmangaih hian lâwmman eng nge in hmuh bîk ang? Chhiahkhawntute pawhin chutiangin an ti ve lo vem ni?

⁴⁷Tin, in unaute chauh chibai in bûk hian eng nge in tih hnem chuan bîk? Jentail-te pawhin chutiangin an ti ve lo vem ni?

⁴⁸Chutichuan, in Pa vâna mi a ṭha famkim angin in ṭha famkim tûr a ni.