Read Mizo Lushai CHANCHIN ṬHA MATTHAIA ZIAK 6 Bible Online

CHANCHIN ṬHA MATTHAIA ZIAK 6 - Mizo Lushai bible

CHANCHIN ṬHA MATTHAIA ZIAK 6

¹“In thil ṭha tihte mi hmuh atân, an hmaa ti lo tûrin fîmkhur rawh u; chutilo chu in Pa vâna mi hnêna lâwmman in hmu lo vang.

²Chutichuan, khawngaih thilpêk i hlanin, mi vervêkten mi fak an hlawh theih nân sunagog-ah te leh kawtthlêrah te an ti ṭhîn ang hian i hmaah tawtawrâwt hâm suh. Thu dik ka hrilh a che, an lâwmman chu an hmu tawh reng a ni.

³Nang erawh chuan khawngaih thilpêk i hlanin, i kut ding lam tih chu i kut vei lamin hre suh se,

⁴i thilpêk chu a rûka a awm theih nân; chutichuan, i Pa, a rûka hmu ṭhîntu chuan a rûl ang che.

⁵“In ṭawngṭai pawhin mi vervêkte angin awm suh u; miin an hmuh theih nân sunagog-ah te, kawtthlêr ṭhuam laiah te ding chunga ṭawngṭai an ngaina si ṭhîn. Thu dik ka hrilh a che u, an lâwmman chu an hmu tawh reng a ni.

⁶Nang erawh chu i ṭawngṭai hunin, i pindan chhûng rilah lût la, kawng khâr la, i Pa, a rûka awm hnênah chuan ṭawngṭai rawh; tichuan, i Pa, a rûka hmu ṭhîntu chuan a rûl ang che.

⁷“In ṭawngṭaiin Jentail-te angin sawi nawn mai mai suh u; an ṭawng tam avângin hriain an ring a ni.

⁸Anmahni angin awm suh u, in dîl hma pawhin in Pa chuan in mamawhte chu a hre si a.

⁹Tichuan, nangni chu hetiang hian ṭawngṭai rawh u: ‘Kan Pa, vâna mi, I hming zahin awm rawh se. I ram lo thleng rawh se.

¹⁰I duhzâwng vâna tih a nih angin leiah tih ni rawh se.

¹¹Vawiinah hian kan ei khawp chaw min pe ang che.

¹²Kan laka bate kan ngaidam angin, kan batte hi min ngaihdamsak ang che.

¹³Thlêmnaah min hruai lût suh la, Mi sual lakah chuan min chhandam zâwk ang che.’ tiin.

¹⁴An bawhchhiatnaah mite in ngaihdam chuan, in Pa vâna mi pawhin a ngaidam ve ang che u.

¹⁵In ngaihdam loh erawh chuan in Pain in bawhchhiatnaahte a ngaidam bîk lo vang che u.

¹⁶“Chaw in nghei hun pawhin mi vervêkte angin ngui hmêl pu suh u; anni zawngin mi hmuha chaw ngheia an lan theih nân an hmêl an tipawr si ṭhîn a. Thu dik ka hrilh a che u, an lâwmman chu an hmu tawh reng a ni.

¹⁷Nang erawh chuan chaw i nghei hunin, sahriak thih la, i hmai phih rawh.

¹⁸I Pa, a rûka awm hnênah chauh lo chuan mi hmuhah chaw ngheiin i lang lo vang; tichuan, i Pa a rûka hmu ṭhîntu chuan a rûl ang che.

¹⁹“Leiah, thîm leh tuiêkin a ei chhiatnaah, rûkruten an reh pawha an rûknaah hian in tân ro khâwl khâwm suh u.

²⁰Vânah, thîm leh tuiêkin a ei chhiat lohnaah, rûkruten an reh pawha an rûk hek lohnaah chuan in tân ro khâwl khâwm zâwk rawh u.

²¹In ro awmna apiangah in rilru pawh a awm ṭhin hi.

²²“Mit hi taksa tân khâwnvâr ang a ni, I mit a dik chuan i taksa chu a pum ên ang;

²³i mit a dik loh erawh chuan i pumin i thim vek ang. Tichuan, nangmaha êng awm chu a thim si chuan, chu thim chu a va nasa dâwn êm!

²⁴“Tu man hotu pahnih rawng an bâwl kawp thei lo, pakhat huain pakhat an duh emaw a ni ang a; a nih loh leh pakhat chu an ngaina ang a, pakhat chu an hmusit ang. Pathian rawng leh sum rawng in bâwl kawp thei lo ve.

²⁵“Chuvâng chuan, ka hrilh a che u, in nun nân eng nge in ei anga in in ang tih te, in taksa tân eng nge in sin ang tih te lungkham suh u. Ei tûr aiin nunna a pawimawh zâwk a, silhfên aiin taksa pawh a pawimawh zâwk lo vem ni?

²⁶Chunglêng savate hi en ta che u, buh an tuh lo va, an seng lo va, buh inahte an khung khâwm hek lo; mahse, in Pa vâna mi chuan a châwm si a; anni ai chuan in hlu zâwk daih lo vem ni?

²⁷Nangniho zîngah lungkham avângin tu nge mahni nun tisei hret thei?

²⁸Silhfên thu engah nge in lungkham ni? Ram tûktinpâr ṭhan dânte hi ngaihtuah teh u, hna an thawk lo va, la an dek hek lo;

²⁹nimahsela, ka hrilh a che u, Solomona meuh pawh a ropui thei ang bera a inthuam khân hêng tûktinpâr pakhat tluk pawh hian chei a ni lo.

³⁰“Chutichuan, ram hnim, vawiina nung, a tûka meia tuah leh mai tûr mah Pathianin chuti kauva a chei si chuan, aw, nangni rin tlêmte u, chûngte ai chuan a thuam nasa zâwk dâwn lo che u em ni?

³¹Chuvângin, eng nge in eia in in anga, eng nge in silha in fên ang tih lungkham suh u.

³²Jentail-ten chûng chu an buaipui ber a ni: hêng zawng zawng hi nangni pawhin in mamawh tih in Pain a hre reng a ni.

³³A ram leh a felna chu zawng hmasa zâwk rawh u; tichuan, hêng zawng zawng hi a pêk belhchhah dâwn che u nia.

³⁴Chuvângin, a tûk atân lungkham suh u, a tûk chuan ama tân a ngaihtuah chawp dâwn si a. Ni khat hrehawm hi ni khat atân a tâwk e.