Read Mizo Lushai CHANCHIN ṬHA MATTHAIA ZIAK 7 Bible Online

CHANCHIN ṬHA MATTHAIA ZIAK 7 - Mizo Lushai bible

CHANCHIN ṬHA MATTHAIA ZIAK 7

¹“Sawisêl suh u, sawisêla in awm loh nân.

²In sawisêlna ang bawkin sawisêl in ni ang a, in tehna ngeiin an tehsak ang che u.

³Engtizia nge mahni mita thingtum awm chu hre si lovin in unau mita thil tê tak tê awm chu in hmuh ni?

⁴A nih leh, engtin nge mahni mita thingtum awm reng siin i unau hnênah, ‘I mita thil tê tak tê awm kha mi lâk chhuahtîr rawh,’ i tih theih ang?

⁵Ngai teh, nangma mit ngeiah thingtum a awm ruau si a. Mi vervêk, i mita thingtum awm kha la chhuak hmasa zet rawh; tichuan, i unau mita thil tê tak tê lâk chhuah tûr chu fiah takin i hmu thei ang.

⁶“Uite chu thil thianghlim pe suh ula, vawk hmaah pawh in tuikeplung vawrh hek suh u; an chîl hrep ang a, an rawn tai thlêr dah ang che u.

⁷“Dîl ula, pêk in ni ang; zawng ula, in hmu ang; kik ula, hawnsak in ni ang.

⁸A dîl apiangin an dawng ṭhîn a, a zawng apiangin an hmu bawk ṭhîn; tu pawh a kik chu an hawnsak dâwn a ni.

⁹A nih leh, nangniho zînga tu pawh hi, a fapain chhang dîl sela, tu nge lung pe ang?

¹⁰Sangha dîl ta sela tu nge rûl pe ang?

¹¹Chutichuan, nangni mi sual mahin in fate thil ṭha pêk nachâng in hriat chuan in Pa vâna mi chuan a dîltute chu thil ṭha a va pe dâwn êm!

¹²“Chutichuan, thil eng pawh miin in chunga an tih in duh tûr ang apiang chu, mi chungah pawh ti ve rawh u; chu chu Dân leh zâwlneite thu a ni rêng si a.

¹³“Kawngka zîmah chuan lût rawh u, boralna kawngka chu a zau va, a kawng pawh a nuam a, chumi lama kalte chu tam tak an ni.

¹⁴Nunna kawngka erawh chu a zîm a, a kawng pawh a chêp a, a hmutute pawh tlêm tê an ni.

¹⁵“Zâwlnei derte lakah fîmkhur rawh u, chûng chu berâm vun sinin in hnênah an lo kal ṭhîn; an chhûng lamah erawh chuan chinghne koham tak an ni si a.

¹⁶Anni chu an rahah in hre mai ang. Hlîngbukah grep an lo ngai em ni? Lênhlîngah theipui an lo ngai em ni?

¹⁷Thing ṭha chu a rah ṭha ṭhîn a, thing chhia chu a rah chhe ṭhîn.

¹⁸Thing ṭha a rah chhe thei lo va, thing chhia lah a rah ṭha thei hek lo.

¹⁹Thing tin rah ṭhaa rah lo apiang chu an kit a, meiah an tuah ṭhîn.

²⁰Tichuan, anni chu an rahah in hre mai ang.

²¹“‘Lalpa, Lalpa,’ mi ti nazawng chu vânramah an lût lo vang a, ka Pa vâna mi duhzâwng titute erawh chu an lût ang.

²²Chumi ni-ah chuan mi tam takin, ‘Lalpa, Lalpa, i hmingin thute kan hril a, i hmingin ramhuaite kan hnawt chhuak a, i hmingin thil makte kan ti ṭhîn lo vem ni?’ an la ti ang.

²³Chumi hunah chuan, ‘Nangni thil sual titute u, ka hre ngai lo va che u, ka hnên ata kal bo daih rawh u,’ tiin anni chu ka la hrilh ang.

²⁴“Chutichuan, hêng ka thu hi hriaa, zâwm apiang chu mi fing, lungpui chunga in satu nên tehkhin tûr a ni.

²⁵Ruah a lo sûr a, tui te a lo lian a, thli te a lo tleh a, chu in chu a rawn nam sawk sawk a; mahse, lungpui chunga rem tlat a nih avângin a chim lo.

²⁶Hêng ka thu hi hriaa zâwm si lote erawh chu mi â ṭiauvut chung maia in satu nên tehkhin tûr a ni.

²⁷Ruah a lo sûr a, tui te a lo lian a, thli te a lo tleh a, chu in chu a rawn nam sawk sawk a, a chim ta a, a sawp rup mai a ni,” a ti a.

²⁸Isuan chûng thu chu a sawi zawh chuan mipuiten a thu zirtîr chu mak an ti hle a,

²⁹Dân zirtîrtute ang lova thu nei taka anmahni a zirtîr avâng chuan.