Read Mizo Lushai CHANCHIN ṬHA MATTHAIA ZIAK 8 Bible Online

CHANCHIN ṬHA MATTHAIA ZIAK 8 - Mizo Lushai bible

CHANCHIN ṬHA MATTHAIA ZIAK 8

¹Tlâng ata a lo chhuk hnuin mipui nasa takin Isua chu an zui a.

²A hnênah phâr a lo kal a, kûnin chibai a rawn bûk a, “Lalpa, i duh chuan mi tithianghlim thei e,” a ti a.

³Ani chuan a han ban a, a dek a, “Duh e, lo thianghlim tawh ang che,” a ti a, a phâr chu a lo thianghlim ta nghâl a.

⁴Isuan a hnênah, “Tu hnênah mah sawi suh; amaherawhchu, puithiam hnênah kal la, va inentîr rawh, i dam ngei tih miten an hriat nân; Mosian thil hlan tûr a ruat kha hlân rawh,” a ti a.

⁵Tin, Kapernaum khua a lo luhin a hnênah sipai za hotu a lo kal a,

⁶“Lalpa, ka naupang a zeng a, inah a mu reng a, a na hle mai,” tiin tidam tûrin ṭhahnemngai takin a ngên a.

⁷Ani chuan a hnênah, “Ka lo kal ang a, ka rawn tidam ang e,” a ti a.

⁸Sipai za hotu erawh chuan a chhâng a, “Lalpa, ka in chhûnga ko lût tlâk che ka ni lo, thu chauh sawi la, ka nau chu a dam mai ang.

⁹Kei pawh mi thuhnuaia awm ka ni a, ka hnuaiah sipaite an awm leh chhâwng a, ‘Kal rawh,’ ka tih chu a kal a, ‘lo kal rawh,’ ka tih chu a lo kal mai a; ka bawih pawhin ‘hei hi ti rawh’ ka tih chu a ti mai ṭhîn,” a ti a.

¹⁰Isuan chu chu a hriatin mak a ti hle a, a zuitute hnênah chuan, “Thu dik ka hrilh a che u, Israel zîngah pawh heti êma ring nasa hi tu mah ka hmu lo.

¹¹Ka hrilh a che u, chhak leh thlang aṭangin mi tam tak an lo kal ang a, vânramah chuan Abrahama te, Isaka te, leh Jakoba te nên ruai an la kîl ho vang a;

¹²Ram fate erawh chu pâwn thimah hnawh chhuah an ni ang; chutah chuan an ṭap ang a, ha an ṭhial ang,” a ti a.

¹³Isuan, sipai za hotu hnênah chuan, “Kal tawh le, i rin angin i chungah lo thleng rawh se,” a ti a. Tin, chumi dâr ngeiah chuan naupang chu a dam ta a.

¹⁴Petera ina Isua a luhin a pizawn khawsika mu chu a hmu a,

¹⁵a kut a khawihsak a, a khawsik chu a reh ta a; a tho va, chaw ei a siamsak ta a.

¹⁶Khua a lo tlai lam chuan a hnênah ramhuai man tam tak an rawn hruai a, thuin ramhuaite chu a hnawt chhuak a, damlo lo kal zawng zawng pawh chu a tidam bawk a.

¹⁷Zâwlnei Isaian, “Ani chuan kan chak lohnate a la a, kan nâte a phur,” tia a sawi kha a lo thleng ta a ni.

¹⁸Mipui nasa tak a vêla awm Isuan a hmuhin Jordan râl lehlama kal tûrin a zirtîrte chu thu a pe a.

¹⁹Dân zirtîrtu pakhat a lo kal a, a hnênah, “Zirtîrtu, i kalna apiangah ka zui ang che,” a ti a.

²⁰Isuan a hnênah, “Sihalten kua an nei a, chunglêng savate pawhin riahhmun an nei; Mihring Fapa erawh hi chuan lu nghahna tûr a nei lo,” a ti a.

²¹A zirtîrte zînga mi dangin a hnênah, “Lalpa, ka pa ka va vui zet ang e aw,” a ti a.

²²Isua erawh chuan a hnênah, “Mi zui rawh, mitthiin anmahni mitthi chu lo vui mai rawh se,” a ti a.

²³Tin, lawngah a chuang a, a zirtîrte chuan an zui a.

²⁴Dîl chu nasa takin a lo fâwn ta a; tichuan, tuifâwnin lawng chu a rawn vûr hlup hlup mai a, ani erawh chu a muhîl a.

²⁵An va kaitho va, “Lalpa, min chhanhim rawh, kan boral dâwn hi le,” an ti a.

²⁶Ani chuan an hnênah, “Rin tlêmte u, engah nge in hlauh?” a ti a. Tichuan, a tho va, thli leh dîl chu a hau ta a, a lo reh ta ṭhuap mai a.

²⁷Mite chuan mak an ti hle a, “He mi hi mi eng nge a nih? Thli leh dîl lam pawhin a thu an awih hi le!” an ti a.

²⁸Râl lehlam, Gadarin mite ram chu a va thlenin ramhuai man pahnih, thlân aṭanga lo kalte chuan an rawn pan a; an kawlh êm êm mai a, chumi lam kawngah chuan tu mah an kal ngam lo.

²⁹Tin, anni chuan, “Pathian Fapa, kan chungthu-ah rawn inrawlh i tum elo? Hun tiam thlen hmaa min nghaisa tûrin i lo kal em ni?” tiin an lo au va.

³⁰Chuta ṭanga hla feah chuan vawk rual an tla sup sup a.

³¹Ramhuaite chuan, “Min hnawh chhuah chuan vawk kawchhûngah sâwn min luhtîr ang che,” tiin an ngên a.

³²Ani chuan an hnênah, “Va lût ta che u,” a ti a. Tichuan, an lo chhuak a, vawk rual kawchhûngah chuan an lût ta a; tin, ngai teh, vawk rual chu an vaiin dîl kam khâm kovah chuan an tlân liam a, dîlah chuan an boral ta a.

³³A enkawltute chu an tlânchhia a, khuaah an kal a, thil awmzia zawng zawng, ramhuai mante chunga thil lo thleng te chu an va sawi a.

³⁴A khuain Isua hmu tûrin an lo chhuak ta a, amah an hmuh chuan an ram chhuahsan tûrin an ngên chiam a.