Read Mizo Lushai CHANCHIN ṬHA MATTHAIA ZIAK 9 Bible Online

CHANCHIN ṬHA MATTHAIA ZIAK 9 - Mizo Lushai bible

CHANCHIN ṬHA MATTHAIA ZIAK 9

¹Isua chu lawngah a chuang a, râl lehlam a kai a, a chênna khua chu a va thleng a.

²Ngai teh, zeng pakhat, a mutna chawpin a hnênah an rawn zâwn a. Isuan an rinzia a hmuhin zeng hnênah chuan, “Ka fa, thlamuang takin awm rawh, i sualte ngaihdam a ni ta e,” a ti a.

³Dân zirtîrtu ṭhenkhat chuan, anmahni zîngah, “He mi hian Pathian pawi a sawi a ni,” an ti hlawm a.

⁴Isua chuan an ngaihtuahte chu a lo hria a, “Engah nge in thinlunga sual in ngaihtuah ni?

⁵‘I sualte ngaihdam a ni tawh e,’ tih nge sawi awla, ‘Tho la, kein kal tawh rawh,’ tih hi?

⁶“Khawvêlah hian Mihring Fapa hian sual a ngaidam thei tih ka han hriattîr ang che u,” a ti a; zeng hnênah chuan, “Tho la, i mutna kha la la, i inah haw rawh,” a ti a.

⁷Tichuan, a tho va, a haw ta a.

⁸Mipuiin chu chu an hmuhin an hlau va, chutiang thuneihna mihringte petu Pathian chu an fak a.

⁹Chuta ṭanga a kal pah chuan chhiah khawnna hmuna ṭhu mi pakhat, a hming Mathaia chu Isuan a hmu a, a hnênah, “Mi zui rawh,” a ti a. Ani chu a tho va, a zui ta a.

¹⁰Isua leh a zirtîrten ina chaw an kîl laiin chhiahkhawntute leh mi sual tam tak an lo kal a, an rawn kîlpui hlawm a.

¹¹Farisai-ten chu chu an hmuhin a zirtîrte hnênah, “Engtizia nge in zirtîrtu hian chhiahkhawntute leh mi sualte zînga a ei ve le?” an ti a.

¹²Ani chuan a lo hria a, “Mi hrisêlten daktor an ngai lo va, mi bawrhsâwmten an ngai zâwk a ni.

¹³Chutichuan, ‘inthawina aiin khawngaihna ka duh e,’ tih hi eng tihna nge va zir rawh u. Mi dikte lam tûra lo kal ni lovin, mi sualte lam tûra lo kal ka ni zâwk,” a ti a.

¹⁴Johana zirtîrte chu a hnênah an lo kal a, “Engati nge keini leh Farisai-te hian chaw kan nghei zut a, i zirtîrte lêmin an nghei ve loh?” an ti a.

¹⁵Isuan an hnênah, “An zîngah moneitu a awm chhûng chuan mo hruaitute chu an lungngai dâwn em ni? Moneitu chu an hnên ata hruai bo hun a lo la awm ang a, chumi hunah erawh chuan chaw an la nghei ve ang.

¹⁶Tu man puan hlui, puan thar la sûk loh themin an bel ngai lo; a bel phuina tûr chuan a belna lai chu a kai thlêr zâwk ang a, a lo thlêr nasa lehzual ang.

¹⁷Uain thar pawh savun ip hluiahte an thun ngai hek lo; thun ta sela, savun chu a puakkeh ang a, uain chu a bua ang a, savun ip chu a chhia ang; uain thar chu savun ip tharahte an thun zâwk ṭhîn a ni; tichuan, him takin a awm ve ve ṭhîn,” a ti a.

¹⁸Chûng thu chu an hnêna a sawi laiin, ngai teh, hotu pakhat a lo kal a, kûnin chibai a bûk a, “Tûn maiah khân ka fanu a thi a; nimahsela, lo kal la, a chungah i kut nghat la, a lo nung leh ang,” a ti a.

¹⁹Tichuan, Isua chu a tho va, a zirtîrte nên ani chu an zui ta a.

²⁰Hmeichhe pakhat thi pûta kum sâwm leh kum hnih dam lo a hnungah a lo kal a, a puan fêm a dek a;

²¹“A puan chauh pawh dek ila ka dam mai ang,” a ti rilru a ni.

²²Isua chu a han lehhawi a, ani chu a hmu a, “Ka fanu, thlamuang takin awm rawh; i rinna hi i dam phah a ni e,” a ti a. Tichuan, hmeichhia chu chumi dâr a chinah chuan a lo dam ta a.

²³Isuan hotu in chu a va thleng a, phênglâwng tumte leh mipui ri mur mur a va hmuh chuan, “Kiang rawh u naupang hi a thi lo ve, a muhîl a ni zâwk e,” a ti a.

²⁴Anni chuan an nuihsan ta mai a.

²⁵Mipuite chu hnawh chhuah an nih hnu chuan ani chu a lût a, naupang kut chu a chelh a, a lo tho ta a.

²⁶Chumi ram zawng zawngah chuan chu thu chu a thang chhuak ta a.

²⁷Chuta ṭanga Isua a kal zêl chu mitdel pahnihin an zui a, “Davida Fapa, min khawngaih rawh,” tiin an au zui zêl a.

²⁸Ina a luh chuan mitdelte chu a hnênah an lo kal a, Isuan an hnênah, “Hei hi ka tih theih in ring em?” a ti a.

²⁹Anni chuan, “Ring e, Lalpa,” an ti a. Ani chuan an mit chu a dek a, “In rin angin in chungah lo thleng rawh se,” a ti a.

³⁰Tichuan, an mit chu a lo vâr ta a; Isuan an hnênah, “Tu mah hrilh hauh suh u,” a ti a.

³¹Nimahsela, anni chu an chhuak a, chumi ram zawng zawngah chuan a chanchin an tithang ta a.

³²An chhuah laiin ramhuai man ṭawngtheilo pakhat a hnênah an rawn hruai a.

³³Ramhuai chu a hnawh chhuah veleh ṭawng thei lo chu a lo ṭawng thei ta a. Mipui chuan mak an ti hle a, “Israel-te zîngah hetiang hi hmuh a la ni ngai lo,” an ti a.

³⁴Farisai-te erawh chuan, “Ramhuai lal avângin a ni ramhuaite a hnawh chhuah ṭhin ni,” an ti a.

³⁵Isua chuan Pathian ram Chanchin Ṭha chu hrilin, natna leh chak lohna tinrêng neite tidamin khaw lian leh khaw tête a fang chhuak vek a, an sunagog-ah te a zirtîr a.

³⁶Mipuite chu a hmuhin, vêngtu nei lo berâmte anga mangang leh chavaia an awm avângin a khawngaih ta êm êm a.

³⁷A zirtîrte hnênah chuan, “Buh seng tûr a tam tehlul nên, thawktu lah an tlêm si;

³⁸chutichuan, a buh seng tûra mi tîr tûrin buh neitupa dîl rawh u,” a ti a.