Read Mizo Lushai CHANCHIN ṬHA MARKA ZIAK 10 Bible Online

CHANCHIN ṬHA MARKA ZIAK 10 - Mizo Lushai bible

CHANCHIN ṬHA MARKA ZIAK 10

¹Tin, a tho va, chuta ṭang chuan Judai ramah leh Jordan râlah te a kal a, mipuiin an lo bawh ruih ruih a; tichuan, a tih dân pângngaiin a lo zirtîr ṭhîn a.

²Farisai-te a hnênah an lo kal a, amah fiah nan, “Miin a nupui a mâk a thiang em?” tiin an zâwt a.

³Ani chuan, “Mosian engtin nge thu a pêk che u?” a ti a.

⁴Anni chuan, “Mosian inmâkna lehkha ziakin inmâk a phal,” an ti a.

⁵Isua erawh chuan, “In thinlung khauh avângin asin chu thupêk chu in tân a ziak ni.

⁶Nimahsela, thilsiam ṭân tirh aṭang rêngin mipa leh hmeichhia a siam a.

⁷Chumi avâng chuan mipain a nu leh pa a thlah ang a, a nupui a vuan ang; tichuan, an pahnih chuan tisa pumkhat an lo ni tawh ang,

⁸pahnih an ni tawh lo va, pumkhat an lo ni tawh zâwk a ni.

⁹Pathianin a zawm tawh avângin mipain ṭhen suh se,” a ti a.

¹⁰Inah a zirtîrten chûng thu chu an zâwt leh a.

¹¹Ani chuan, “Tu pawhin a nupui a ṭhena, mi dang a neih chuan a nupui chu a uiresan a ni:

¹²hmeichhia pawhin a pasal a ṭhena, mi dang a neih chuan a pasal a uiresan a ni,” a ti a.

¹³Tin, a deh atân a hnênah naupangte an rawn hruai a, zirtîrte erawh chuan an lo hnar a.

¹⁴Nimahsela, Isuan a hmuhin a lungni lo êm êm a, an hnênah, “Naupangte ka hnênah han kaltîr ula, hnar suh u, Pathian ram chu hêng ang mite ta a ni si a.

¹⁵Thu dik ka hrilh a che u, Pathian ram chu naupang anga lâwm lo apiang; tu mah a chhûngah an lût tawp lo vang,” a ti a.

¹⁶Anni chu a lo kuah a, an chungah kut nghatin mal a sâwm ta a.

¹⁷Isua chu zin tûra a chhuah laiin mi pakhat a lo tlân a, a hmaah a ṭhingṭhi a, “Zirtîrtu Ṭha, chatuan nun ka chan theih nân eng nge ka tih tûr?” tiin a rawn zâwt a.

¹⁸Isuan a hnênah, “Engati nge Ṭha mi tih? Tu mah ṭha an awm lo, Pathian chauh lo chu.

¹⁹Thupêkte chu i hria alâwm, ‘Tual that suh, uire suh, ru suh, dâwtin hêk suh, bum suh, i nu leh i pa chawimawi rawh,’ tihte hi,” a ti a.

²⁰Ani chuan, “Zirtîrtu, chûng zawng zawng chu ka tleirâwl tirh ata ka zâwm ṭhîn,” a ti a.

²¹Isuan ani chu a han en chiang a, a ngaina ta hle a, a hnênah, “Kawng khat i la bâk e; kal la, i neih apiang va hralh la, pachhiate pe rawh; chutichuan, vânah ro i nei dâwn nia; tin, lo kal la, mi zui ang che,” a ti a.

²²Chûng thu avâng chuan a ngui ta hle a, lungngai takin a kal ta a, sum ngah tak a ni si a.

²³Isua chu a han hawi vêl a, a zirtîrte hnênah chuan, “Sum ngahte tân Pathian rama luh a va harsa dâwn êm!” a ti a.

²⁴Zirtîrte chuan a thu sawi chu mak an ti êm êm a; Isua chuan anni chu a chhâng leh a, “Naute u, Pathian rama luh hi a harsa teh asin:

²⁵Pathian rama mi hausa an luh aiin hriau benga sanghâwngsei kal tlang a awl zâwk,” a ti a.

²⁶Mak an ti lutuk a, “Chuti chu tu nge chhandam ni thei ang le?” an inti a.

²⁷Isuan anni chu a en a, “Pathian tân tih loh, mihring tân chuan tih rual a ni lo rêng a; Pathian tân erawh chuan engkim tih theih a ni asin,” a ti a.

²⁸Peteran a hnênah, “Ngai teh, keini lahin engkim kalsanin kan zui ta si che a,” a ti hman chauh va;

²⁹Isuan a lo chhâng a, “Thu dik ka hrilh a che u, tu pawh keimah avâng leh Chanchin Ṭha avânga in emaw, unaute emaw, farnute emaw, nu emaw, pa emaw, fate emaw, ramte emaw kalsan chuan,

³⁰tûn dam chhûng la la hian in te, unau te, farnu te, nu leh pa te, fa te a lêt za an hmu ngei ang, tihduhdahna te leh hun lo thleng tûra chatuan nun nên.

³¹Nimahsela, mi tam tak hmasa bera awmte chu hnuhnûng ber an la ni ang a, hnuhnûng bera awmte pawh hmasa ber an la ni ang,” a ti a.

³²Tin, Jerusalem-a chho tûrin kawngah chuan an kal a, Isuan hma a hruai a, anni chuan mak an ti hle a, a zuitute pawh chu an zâm hle a. Isuan Sâwmpahnihte chu a hruai hrang leh a, a chunga thil lo thleng tûr zawng zawng chu a hrilh a;

³³“Ngai teh u, Jerusalem-ah kan chhoh dâwn hi. Mihring Fapa hi puithiam lalte leh Dân zirtîrtute hnênah mantîr a ni dâwn; anni chuan thi tûrin a chungah thu an titlu ang a, Jentail-te hnênah an hlân ang.

³⁴Anni chuan an lo nuihzat ang a, chil an chhâk ang a, an vua ang a, an tihlum ang; mahse, ni thum chinah a tho leh ang,” a ti a.

³⁵Zebedaia fapa Jakoba leh Johana chuan ani chu an rawn hnaih a, “Zirtîrtu, kan dîl tûr apiang che min tihsak kan duh e,” an ti a.

³⁶Ani chuan, “Eng nge tihsak che u ila in duh?” a ti a.

³⁷Anni chuan, “I ropuinaah chuan i ding lamah pakhat, i vei lamah pakhat min ṭhuttîr ang che,” an ti a.

³⁸Isua erawh chuan, “In thil dîl hi in hre lo va ni. Ka no in tûr chu in in thei dâwn em ni? Baptisma ka chan tûr pawh in chang thei dâwn em ni?” a ti a.

³⁹Anni pawh chuan, “Thei ang,” an ti a. Isuan, “Ka no in tûr chu in in ang a, baptisma ka chan tûr pawh chu in chang ve ang;

⁴⁰nimahsela, ka ding lam emaw, vei lam emawa ṭhuttîr chu ka thu a ni lo va, an buatsaihsakte tân a ni zâwk,” a ti a.

⁴¹Zirtîr dang sâwmte chuan chu chu an lo hriatin Jakoba leh Johana chungah chuan an lungni lo ta êm êm a.

⁴²Isua erawh chuan anniho chu a ko va, an hnênah, “Jentail-te chunga rorêltua ruatte chu an chungah an intilal êm êm ṭhîn a, an mi liante pawhin an chungah thu an nei êm êm ṭhîn tih in hria.

⁴³Nimahsela, nangni zîngah zawng chutiang tûr a ni lo ve, tu pawh in zînga ropui ber nih duh chu in rawngbâwltuah a awm tûr a ni.

⁴⁴Tu pawh in zînga hmasa ber nih duh pawh chu, mi zawng zawng chhiahhlawhah a awm bawk tûr a ni.

⁴⁵Mihring Fapa meuh pawh rawngbâwlsaka awm tûrin a lo kal lo va, rawngbâwl tûr leh mi tam tak tlan nân a nun pe tûrin a lo kal zâwk a ni,” a ti a.

⁴⁶Jeriko khua an lo thleng a, a zirtîrte leh mipui nasa tak nên Jeriko aṭang chuan an chhuak a; Timaia fapa, kutdawh, mitdel, Bartimaia chu, kawng sîrah a lo ṭhu a.

⁴⁷Nazaret Isua a ni tih a hriat chuan, “Isu, Davida Fapa, mi khawngaih rawh,” tiin a au ta vak a.

⁴⁸Mi tam takin an hau va, ngawi tûra an tih pawhin, a hma aia ringin, “Davida Fapa, mi khawngaih rawh,” tiin a au zual sauh va.

⁴⁹Isua chu a ding a, “Han ko teh u,” a ti a. Mitdel chu an ko va, “Ngaihṭha takin awm la, tho rawh, a ko va che,” an ti a.

⁵⁰Ani chuan a puan a paih lawk a, a zuang tho va, Isua hnên lam chu a pan ta a,

⁵¹Isuan a lo bia a, “Eng nge tihsak che ila i duh?” a ti a. Mitdel chuan, “Raboni, hmuh theih ka duh,” a ti a.

⁵²Tichuan, Isuan, “Kal rawh le, i rinna i dam phah a ni e,” a ti a. Khua a lo hmu thei ta nghâl mai a, kalkawngah chuan a zui ve ta a.