Read Mizo Lushai CHANCHIN ṬHA MARKA ZIAK 11 Bible Online

CHANCHIN ṬHA MARKA ZIAK 11 - Mizo Lushai bible

CHANCHIN ṬHA MARKA ZIAK 11

¹Tin, Jerusalem an lo hnaih ta a, Oliv tlânga Bethfage khua leh Bethani khua an thlen dâwn chuan a zirtîrte zînga pahnih a tîr a,

²“In hma zâwn khuaah sâwn va kal ta ula, khua in luh veleh, tu ma la chuanna ngai loh, sabengtung no thlun in va hmu mai ang; phelh ula han kai rawh u.

³Mi tu pawhin, ‘Engati nge khatia in tih mai?’ an tih che u chuan, ‘Lalpan a mamawh a ni, a rawn dahtîr leh thuai ang,’ ti ang che u,” a ti a.

⁴An kal ta a, sabengtung no, kawngka bula thlun, pâwn lam kawtthlêra ding chu an va hmu a, an phelh ta a.

⁵Chuta ding tute emaw chuan an lo hmu a, “Engtizia nge sabengtung kha in phelh tâk mai?” an ti a.

⁶Anni erawh chuan Isua hrilh ang tak khân an sawi a; tichuan, an kal an phal ta a.

⁷Sabengtung no chu Isua hnênah an rawn kai a, a chungah an puante an phah a, Isua chu a chuang ta a.

⁸Mi tam takin kalkawngah an puante an phah a, a ṭhenin rama mi chhâwl sâtin an phah bawk a.

⁹A hmaa kalte leh a hnunga zuitute chu “Hosana! Lalpa hminga lo kal chu fakin awm rawh se,

¹⁰Ram lo thleng tûr, kan pa Davida ram chu Chawimawiin awm rawh se, Chungnung berah khian Hosana,” tiin an au va.

¹¹Tin, Jerusalem-a Tempulah chuan a va lût a, engkim a en vêl zawh chuan khua pawh a tlai lam ta a, Sâwmpahnihte nên Bethani lamah an kal leh ta a.

¹²A tûkah chuan Bethani aṭanga an chhuak chu a ril a lo ṭâm ta a.

¹³Hla takah, theipui hnah nei hluah hi a hmu a, a rah a awm mial law maw tiin a va pan a, a va thlen chuan a hnah chauh lo chu eng mah a hmu lo va, theipui rah hun a ni lo rêng a.

¹⁴Tichuan, Isuan thing hnênah chuan, “Tûn a chinah chuan, kumkhuain i rah tu man ei tawh suh se,” a ti a. A zirtîrte pawh chuan chu chu an hria a.

¹⁵Jerusalem chu an lo thleng a, Tempulah chuan a lût a, chuta englo zuartute leh leitute chu a hnawt chhuak ta a, tangka thlengtute dawhkânte leh ṭhuro zuartute ṭhutthlêngte chu a nam thlûksak a.

¹⁶Tempulah chuan tu man bungrua an kal tlangpui pawh a phal lo bawk a.

¹⁷An hnênah chuan, “ ‘Ka in chu hnam tin tân ṭawngṭaina in an ti ang,’ tih ziak a ni lâwm ni? Nangni erawh chuan suamhmangte pûkah in siam ta zâwk a nih hi,” tiin a zirtîr ta a.

¹⁸Puithiam lalte leh Dân zirtîrtute chuan an lo hria a, amah tihhlum dân tûr an zawng ta a, a zirtîrna chu mipui zawng zawngin an ngaihsân êm avângin ani chu an hlau hle a ni.

¹⁹Tlaiah chuan khawpui ata chu a kal chhuak ṭhîn a.

²⁰Tin, zîngah an kal pahin theipui kûng kha a zung nên lam a thi ta tih an hmu a.

²¹Petera chuan a hre chhuak a, a hnênah, “Rabi, en teh, theipui ânchhia i lawh kha a lo thi dêr mai!” a ti a.

²²Isuan a chhâng a, “Pathian ring rawh u.

²³Thu dik ka hrilh a che u, tu pawhin he tlâng hnênah hian, ‘Insawn la, tuifinriatah inpaih rawh,’ ti ang sela, a thinlunga ringhlel hauh lova, a sawi ang chuan a lo thleng ngei ang tih a rin tlat chuan tihsak a ni ang.

²⁴Chuvângin, ka hrilh a che u, in ṭawngṭaia in thil dîl apiang hmu tawhah inngai ula, tihsak in ni ang.

²⁵Ṭawngṭai tûra in din hun pawhin mi chunga thu pawi eng emaw in neih chuan ngaidam rawh u; in Pa vâna mi pawhin in bawhchhiatnate a ngaihdam ve theih nân,” a ti a.

²⁷Jerusalem chu an thleng leh a; Tempul a fan vêl laiin puithiam lalte, Dân zirtîrtute leh upahote a hnênah an lo kal a.

²⁸“Eng thuneihnain nge hêng thil hi i tih? Tu nge thu pe che?” tiin an zâwt a.

²⁹Isuan, “Thu kam khat ka han zâwt ang che u; mi chhâng ula, kei pawhin tu thuin nge hêng thil hi ka tih ka hrilh ang che u.

³⁰Johana baptisma kha, vâna mi thu nge mihring thu? Mi chhang rawh u,” a ti a.

³¹An inrâwn tlâng a, “Vâna mi thu kan tih chuan, ‘Engah nge a thu in awih loh?’ min ti dâwn si a;

³²‘mihring thu’ kan ti mai emaw chu ni ang?” an inti a. Mahse, mi zawng zawngin Johana chu zâwlnei ni ngeiah an pawm tlat avângin mipui chu an hlau bawk si a.

³³Tichuan, Isua chu an chhâng a, “Kan hre lo,” an ti a. Isua pawh chuan, “Kei pawhin tu thuin nge hêng thil hi ka tih ka hrilh bîk lo vang che u,” a ti a.