Read Mizo Lushai CHANCHIN ṬHA MARKA ZIAK 12 Bible Online

CHANCHIN ṬHA MARKA ZIAK 12 - Mizo Lushai bible

CHANCHIN ṬHA MARKA ZIAK 12

¹Tehkhin thuin an hnênah thu a sawi ta a. “Tu-in emaw grep huan a siam a, palin a hung a, grep sâwr khur a siam a, vênbûk sâng tak a sa bawk a, thlawh hlawh tûrin huan enkawltute a pe a, ram dangah a kal ta daih a.

²A lawh hun chuan a chan ai la tûrin huan enkawltute hnênah chuan bawih pakhat a tîr a.

³Anni chuan an lo man a, an vêl a, kut ruakin an hawtîr ta a.

⁴Bawih dang an hnênah a tîr leh a, ani pawh chu a lu an vuak pawhsak a, zahthlâk takin an sawisa a.

⁵Bawih dang a tîr leh a, chu phei chu an lo that a. Bawih dangte pawh a tîr zêl a, a ṭhen an lo vêl a, a ṭhen an lo that a.

⁶Mi dang tirh âwm pakhat, a fapa duh tak chauh a nei tawh a, ‘Ka fapa hi chu an lo zah ang chu maw,’ tiin a hnuhnûng berah a tîr ta a.

⁷Nimahsela, huan enkawltute chuan, ‘He mi hi ro luahtu tûr chu a ni, hawh u, i that ang u, a ro luah tûr hi kan ta a ni mai ang,’ an inti a.

⁸Tichuan, ani chu an man a, an that a, grep huan ata chu an paih chhuak ta a.

⁹Huan neitupa chuan engtin nge a rawn tih ang? A lo kal ang a, huan enkawltute chu a rawn tiboral ang a, huan chu mi dang a pe ang.

¹⁰He Lehkha Thu hi in chhiar lâwm ni? ‘In satute lung duh loh kha Chu ngei chu a kil lung ṭangkai ber a lo ni si,

¹¹Chu chu Lalpa tih a ni a, Kan hmuhin mak kan ti,’ tih kha?” a ti a.

¹²Chu tehkhin thu chu anmahni demin a sawi tih an hriatin man an tum a; amaherawhchu, mipui an hlau bawk si a, ani chu an kalsan a, an kal bo ta a.

¹³A thu sawiah a inṭawngâwk thei dah law maw tiin a hnênah Farisai-te leh Heroda pâwla mi ṭhenkhat an tîr a.

¹⁴A hnên an lo thlen chuan, “Zirtîrtu, mi dik tak i ni a, pawisak chuan tu mah i nei lo tih kan hria e, tu mah zah bîk pawh nei chuang lovin Pathian thu dik tak i zirtîr ṭhîn; Kaisara hnêna chhiah chawi tûr kan ni nge ni lo?

¹⁵Kan pe ang nge pe lo vang?” an ti a.

¹⁶Ani erawh chuan an vervêkzia chu a lo hmuhin “Engah nge ṭawngawhtîr min tum? Duli mi han lâk ula, ka lo en teh ang,” a ti a. Anni chuan an rawn la a, an hnênah, “Hei, tu lem leh tu hming nge chuang hi?” a ti a. Anni chuan, “Kaisara,” an ti a.

¹⁷Isua chuan, “Kaisara ta chu Kaisara pe ula, Pathian ta chu Pathian pe ta che u,” tiin a chhâng a. Mak an ti nasa êm êm a.

¹⁸Sadukai-ho, thawhlehna a awm lo titute pawh chu a hnênah an lo kal ve a;

¹⁹“Zirtîrtu, Mosian, ‘Tu pawhin fa nei lovin nupui thihsan se, a nupui chu a unaupain rochungin a unaupa tân chuan chi a thlahsak tûr a ni,’ tiin min ziaksak a.

²⁰Aw le, unau mipa pasarih an awm a, a upa ber chuan nupui a nei a; mahse, fa nei lovin a thi a.

²¹A dawttu chuan a nupui chu a rochung a, chi thlah lovin a thi ve leh ta a; a pathumna pawh chutiang chu a ni a.

²²Unau pasarihte chuan nupuiah an nei ṭheuh va; mahse, tu man chi rêng an thlah lo. A tâwpah hmeichhia pawh chu a thi ve ta a.

²³Thawhlehnaah chuan tu nupui ber nge ni ang, an pasarihin nupuiah an nei ṭheuh si a?” tiin an zâwt a.

²⁴Isuan anni chu a chhâng a, “Lehkha Thu leh Pathian thiltihtheihna in hriat loh avâng hian a ni rêng lâwm ni in kal sual ṭhin?

²⁵An lo thawhleh hun chuan nupui pasal an innei tawh dâwn hlei nêm, vâna vântirhkohte ang mai an ni zâwk dâwn asin.

²⁶Mitthite kaihthawha an awm tûr thu-ah chuan - Mosia lehkhabua hnimbuka meialh thu kha in chhiar ngai lo vem ni? Pathianin a hnênah, ‘Kei hi Abrahama Pathian, Isaka Pathian, Jakoba Pathian ka ni,’ a tih kha,

²⁷Ani chu mitthi Pathian a ni lo va, mi nung Pathian a ni zâwk; in bo nasa tawh a nih hi,” a ti a.

²⁸Dân zirtîrtu zînga pakhat a lo kal a, an thu sawite chu a ngaithla a, a chhâng ṭha hle tih a hriat chuan a hnênah, “Thupêk zawng zawngah a eng hi nge pawimawh ber?” tiin a han zâwt ve a.

²⁹Ani chuan a chhang a, “Aw Israel, ngai teh, Lalpa kan Pathian chauh hi Lalpa chu a ni.

³⁰Lalpa i Pathian chu i thinlung zawng zawngin, i nunna zawng zawngin, i rilru zawng zawngin, i chakna zawng zawngin i hmangaih tûr a ni,’ tih hi a pawimawh ber a,

³¹a dawttu chu, ‘Nangmah i inhmangaih angin i vêngte pawh hmangaih ve rawh,’ tih hi a ni. Hêng aia thupêk pawimawh zâwk rêng hi a awm lo,” a ti a.

³²Dân zirtîrtu pawh chuan, “A ni tak e, Zirtîrtu, Lalpa chauh hi Pathian chu a ni a, amah chauh lo chu tu mah dang an awm lo,

³³amah chauh chu ngaihtuahna zawng zawng leh hriatna zawng zawng leh chakna zawng zawnga hmangaih leh mahni inhmangaih anga vêngte hmangaih hi pumhâl thilhlan leh inthawina zawng zawng aiin a ṭha zâwk êm êm tih hi, i sawi dik ngei mai,” a ti a.

³⁴Ngun taka ngaihtuahin a chhâng a ni tih Isuan a hriatin, “Pathian ram chu i hlat lo ve,” a ti a. Chuta chin chu tu man eng mah an zâwt ngam ta lo va.

³⁵Isuan Tempula a zirtîr pah chuan a sawi zêl a, “Dân zirtîrtute hian engtizia nge Krista chu Davida fapa nia an sawi?

³⁶Amah Davida ngei khân Thlarau Thianghlima sawiin, ‘Lalpa chuan ka Lalpa hnênah, Ka ding lamah lo ṭhu rawh, I hmêlmate i ke hnuaiah ka han dah ang e,’ a ti si a.

³⁷Amah Davida ngeiin ani chu ‘Lalpa,’ a tih si chuan engtin nge a fapa a nih theih ang?” a ti a.

³⁸Mipui pung khâwm nasa tak chuan a thu chu an ngaithla tui hle a. A zirtîr pah chuan an hnênah, “Dân zirtîrtu, kawrfual haa lên vêl chînga, dâwr hmuna chibai bûk ngainaa,

³⁹sunagog-a ṭhutna langsâr ber leh ruai ṭhehna hmuna ṭhutna pawimawh ber ngiat ṭhînte lakah hian fîmkhur rawh u.

⁴⁰Hêngho, hmeithai sum ei zawhsaka, mi hmuh atân maia rei tak tak ṭawngṭai chîng site hian hrem an tuar nasa ber ang,” a ti a.

⁴¹Tin, thawhlâwm bâwm zâwnah chuan a ṭhu a, miten bâwma tangka an thlâk lai chu a lo thlîr reng a. Mi hausa tak takte chuan an rawn thlâk ṭeuh ṭeuh va.

⁴²Hmeithai rethei tak pakhat hi a lo kal ve a, dar pawisa pahnih a rawn thlâk a (chu chu pawisa pakhat hu a ni.)

⁴³Isuan a zirtîrte chu a ko va, an hnênah, “Thu dik ka hrilh a che u, mi dang zawng zawng aiin he hmeithai rethei tak hian thawhlâwm bâwmah a thlâk tam zâwk.

⁴⁴Mi dangte hi chuan an neih liam an rawn thlâk a; ani hi chuan tlachham chung chungin, a neih zawng zawng, intunnunna tûra a neih chhun chu, a rawn thlâk a nih hi,” a ti a.