Read Mizo Lushai CHANCHIN ṬHA MARKA ZIAK 13 Bible Online

CHANCHIN ṬHA MARKA ZIAK 13 - Mizo Lushai bible

CHANCHIN ṬHA MARKA ZIAK 13

¹Tempul ata chu an kal chhuah laiin a zirtîrte zînga pakhat chuan, “Zirtîrtu, en teh, a lungte hi a lianin, a in sakte hi a mawi teh a nia!” a ti a.

²Isuan a chhâng a, “Hêng in lian pui pui hi i hmu maw? Lung intiang rêng rêng pakhat mah tihchim lohva hnutchhiah a awm lo vang,” a ti a.

³Tempul zâwn, Oliv Tlânga a ṭhut laiin Petera te, Jakoba te, Johana te, Andria te chuan a fâlin thu an zâwt a;

⁴“Chûng chu engtikah nge a lo awm ang a, chûng zawng zawng lo thlen dâwn chuan chhinchhiahna thil mak eng eng nge lo awm ang? Min hrilh teh,” an ti a.

⁵Tichuan, Isuan a hrilh ta a; “Tu man an hruai bo loh nân che u fîmkhur rawh u.

⁶Ka hming chhâlin, ‘Keimah hi ka ni,’ tiin mi tam tak an lo chhuak ang a, mi an hruai bo ṭeuh vang.

⁷Indo ri te, indo chanchinte in hriat hunah pawh thlaphâng suh ang che u, chûng chu lo thleng tûr rêng a ni; hun tawp erawh zawng a ni rih lo ve.

⁸Hnam hrang leh hnam hrang an indo vang a, sawrkâr leh sawrkâr an indo vang, hmun hrang hrangah lîr a nghîng ang a, ṭâm a la tla ang. Chûng chu nau vei a inṭan ta tihna a ni.

⁹“Nangni zawng inring rawh u; Sunagog-ahte leh a rorêltute hnênah an hlân ang che ua, an vua ang che u, keimah avângin hotute leh lalte hmaah, ka thu an hriat theih nân, an dintîr ang che u.

¹⁰Chanchin Ṭha hi hnam zawng zawng hnênah hril hmasak ngei tûr a ni si a.

¹¹An man che u a, in chungthu rêl tûra an hlan hun che u chuan in sawi tûr enghelh lâwk suh ang che u, chumi huna lo lang apiang chu in sawi mai dâwn nia, a sawitu chu nangni in ni dâwn si lo, Thlarau Thianghlim a ni zâwk dâwn si a.

¹²Tihhlum tûrin unau leh unau an inmantîr ang a, pa pawhin a fa; fate pawhin an nu leh pate an do vang a, an tihhlumtîr bawk ang.

¹³Keima hming avângin mi tam takin an hua ang che u a; nimahsela, a tâwp thlenga chhel taka tuar peih apiang, chûng mite ngei chu chhandam an ni ang.

¹⁴“Tiṭiautu tenawm chu a din lohna tûra ding in hmuh hunah erawh chuan (a chhiar chuan a awmzia hre rawh se), Judai rama awmte chu tlângramahte tlân rawh se.

¹⁵In chunga awm chu ina lûtin a chhûnga englo chuh tûrin chhuk suh se;

¹⁶lova feh pawh a silhfên chuh tûrin haw hek suh se.

¹⁷Chûng huna naupaite leh nauno pawmte chu an va khawngaihthlâk dâwn em!

¹⁸Thlasik khaw chên laia a lo thlen loh nân ṭawngṭai rawh u.

¹⁹Chumi huna hrehawm lo thleng chu, Pathianin leilung a siam tirh ata la awm ngai lo, engtik maha awm leh tawh hek lo tûr chu a ni.

²⁰Lalpan chûng nite chu titawi lo se mihring tu mah an dam khawchhuak lo vang; a mi thlante avângin a titawi a ni.

²¹“Chutih hunah chuan, tu pawhin in hnênah, ‘En teh u, Krista chu heta hi,’ emaw, ‘En teh u, sawta saw,’ emaw an tih pawhin awih suh ang che u.

²²Krista der leh zâwlnei derte an lo chhuak dâwn si a, thei ang sela thlante meuh pawh hruai bo tûrin chhinchhiahna leh thil makte an ti ang.

²³Nangni zawng fîmkhur rawh u, engkim ka hrilh diam tawh che u hi.

²⁴“Chûng hun hrehawm chu a liam hun chuan ni a thim ang a, thla a êng hek lo vang a,

²⁵vân aṭangin arsite a tla ang a, vâna thiltihtheihnate chu tihnghîn a ni ang.

²⁶Chutih hunah chuan Mihring Fapa hi thiltihtheihna nasa tak nên ropui takin chhûm zînga lo kal an hmu ang.

²⁷Chutichuan, vântirhkohte chu a tîr chhuak ang a, a mi thlante chu kâwlkil li ata leilung tâwp aṭanga vân tâwp thlengin a lâwr khâwmtîr ang.

²⁸“Tichuan, theipui kûng awm dân aṭang hian zir tûr in nei; a zîk a lo nova, hnah a rawn chhuah chuan nipui a thaw dâwn tih in hre ṭhîn.

²⁹Chutiang bawkin, nangni pawhin chûng zawng zawng lo thleng in hmuh hun chuan ani chu a lo hnai tawh a, a lo thleng ṭêp tawh tih hria ang che u.

³⁰Thu dik ka hrilh a che u, chûng zawng zawng chu a lo thlen hma chuan tûnlai mite hi an ral hman lo vang.

³¹Lei leh vân a ral ang a, ka thu erawh chu a ral tawp lo vang.

³²“Nimahsela, chûng thil lo thlen hun tûr, ni leh dâr chu; Pa chauh lo chuan tu man an hre lo, vâna vântirhkohte pawhin, Fapa pawhin an hre lo.

³³Fîmkhur ula, inring reng rawh u, chumi hun chu in hre si lo.

³⁴Mi ram danga zin dâwna, a bawihte hnêna an hna pual ṭheuhva mawhphurhtîra, kawngkhâr vêngtu pawh inring renga awm tûra hrilh diama kal ta daih ang hi a ni.

³⁵Chuvângin, inring reng rawh u. In neitupa hâwn hun tûr chu tlai lamah nge, zânlaiah nge, âr khuanah nge, kâwl ênah nge tih in hre si lo;

³⁶a lo haw thut mai zawngin muhîlin a rawn hmu hlauh dah ang che u.

³⁷Tichuan, in hnêna sawi hi mi zawng zawng tâna sawi ka ni, inring reng rawh u,” a ti a.