Read Mizo Lushai CHANCHIN ṬHA MARKA ZIAK 14 Bible Online

CHANCHIN ṬHA MARKA ZIAK 14 - Mizo Lushai bible

CHANCHIN ṬHA MARKA ZIAK 14

¹Tin, ni hnih hnuah Kalhlên Kût leh Chhang Dawidim telh loh Kût a awm dâwn a; puithiam lalte leh Dân zirtîrtute chuan amah chu ngamthlêma mana tihhlum theihna kawng an zawng a,

²“Kût lai chuan ni suh se, mipui zîngah buaina a chhuak dah ang e,” an ti a ni.

³Bethani-ah, phâr Simona ina chaw a kîl laiin alabasta bûra nard hriak rimtui hlîr hlak, to tak kengin hmeichhe pakhat a lo kal a, alabasta bur chu a tikeh a, a lu-ah a leih ta a.

⁴Chuta mi ṭhenkhat chu an lungni lo hle a, anmahni zîngah, “Engati nge hriak rimtui hi a tihriral tâk mai chu le?

⁵Duli zathum aia tam man a ni si a; hralha, mi retheite pêk zâwk âwm,” tiin chu nu chu an sawisêl a.

⁶Isua erawh chuan, “Eng mah tih suh u, engah nge in tihbuai? Ka chunga a tih hi thil ṭha ti a ni e.

⁷In zîngah mi retheite eng lai pawhin an awm a, in duh hun hunah thil ṭha in tihsak thei a; kei erawh chu in zînga awm reng tûr ka ni lo.

⁸A tih theih ang chu a ti ta a, ka taksa hi phûm tûrin hriak a lo hnawih lâwk a nih hi.

⁹Thu dik ka hrilh a che u, khawvêl pum puia chanchin Ṭha hi an hrilhna apiangah, he nu thil tih pawh hi amah hriat reng nân an sawi ve zêl ang,” a ti a.

¹⁰Tin, Sâwmpahnihte zînga mi pakhat, Juda Iskariota kha Isua mantîr tumin puithiam lalte hnênah a va kal a.

¹¹Chu chu an lo hriatin an lâwm hle a, pawisa pêk an tiam ta a. Tichuan, mantîr dân tûr remchâng a zawng ta a.

¹²Chhang Dawidim telh loh Kût ni hmasa ber, Kalhlên Kût berâmno an talh ṭhinna ni-ah chuan, a zirtîrten, “Khawi hmunah nge Kalhlên kût chaw i ei tûr va buatsaih i la i duh?” an ti a.

¹³Tichuan, zirtîrte zînga mi pahnih a tîr a, “Khawpuiah va kal ta ula, pa pakhat hlumbêla tui chawiin a lo tâwk ang che u; ani chu zui ula,

¹⁴a luhna in neitu hnênah chuan, ‘Zirtîrtu chuan, Ka zirtîrte nêna Kalhlên Kût chaw kan eina tûr pindan chu khawiah nge? a ti e,’ va ti ang che u.

¹⁵Amah ngei chuan pindan chungnung zau tak, engkim awm, peih diam a entîr ang che u, chutah chuan kan tân va buatsaih tawh u,” a ti a.

¹⁶Tichuan, zirtîrte chu an chhuak a, khawpuiah chuan an va kal a, an hnêna a sawi ang ngei khân an va hmu a, Kalhlên Kût chaw chu an buatsaih ta a.

¹⁷Khua a lo tlai lam chuan Sâwmpahnihte nên an va kal ta a.

¹⁸Chaw an kîl a, an ei lai chuan Isuan, “Thu dik ka hrilh a che u, in zînga pakhat, mi kîlpuitu ngei hian, mi mantîr dâwn a ni,” a ti a.

¹⁹An mangang ta hle a, a mal malin a hnênah, “Kei chu ka ni lâwng chu maw?” an ti ta ṭheuh va.

²⁰Ani chuan, “Sâwmpahnihte zînga mi, thlêng mi zenpuitu ngei hi a ni.

²¹Mihring Fapa mantîrtu tûr mihring chung chu a pik e. Chu mihring chu piang lo se a tân a ṭha zâwk ang,” a ti a.

²²Chutia an ei lai chuan Isuan chhang a la a, malsâwmna a sawi a, a phel a, an hnênah a pe a, “La rawh u, hei hi ka taksa a ni,” a ti a.

²³No pawh chu a la a, lâwmthu a sawi zawhin an hnênah a pe a, nova mi chu an za chuan an in ta ṭheuh va.

²⁴Ani chuan, “Hei hi ka thisen, thuthlunna, mi tam tak tâna chhuak tûr chu a ni.

²⁵Thu dik ka hrilh a che u, Pathian rama a thar ka in hun a thlen hma zawng, grep rah tui hi ka in leh tawh lo vang,” a ti a.

²⁶Hla an sak zawh chuan Oliv tlâng panin an chhuak ta a.

²⁷Isuan an hnênah, “In za-in mi hawisan vek ang. ‘Berâmpu chu ka vua ang a, berâmte chu an darh ang,’ tih ziak a nih kha.

²⁸Nimahsela, kaihthawha ka awm hnuin Galili ramah ka lo kal hmasa ang,” a ti.

²⁹Petera erawh chuan, “An vaiin hawisan vek che mah se kei zawngin ka hawisan hauh lo vang che,” a ti a.

³⁰Isuan a hnênah, “Thu dik ka hrilh a che, zâninah, zânin la la hian, âr vawi hnih a khuan hmain nangin vawi thum mi phat ngei ang,” a ti a.

³¹Ani erawh chuan khauh takin, “I thihnaah chuan thi ve dâwn pawh ni ila, ka phat tawp lo vang che,” a ti a. Chutiang bawkin an za chuan an ti ta ṭheuh va.

³²Huan pakhat, Gethsemani an tih chu, an thleng a, a zirtîrte hnênah, “Ka ṭawngṭai hlânin hetah hian lo ṭhu rawh u,” a ti a.

³³Petera te, Jakoba te, Johana te chu a hruai a. Nasa takin a thlaphâng a, a mangang ta êm êm a.

³⁴An hnênah, “Ka thla a phâng hle mai a! Thihpui tham hial a ni; hetah hian awm ula, lo inrâlring rawh u” a ti a.

³⁵Hma lamah tlêm a va kal hlek a, leiah a bawkkhup a, chumi hun chuan amah a pelh mial theih nân a ṭawngṭai a.

³⁶“Abba, ka pa, engkim i ti thei a, he no hi mi lâk sawnsak rawh; nimahsela, keima thu ni lovin nangma thu thu ni zâwk rawh se,” a ti a.

³⁷A lo kîr a, anniho muthlu chu a rawn hmu a; Petera hnênah “Simon, i muthlu a ni maw? Dârkâr khat chauh pawh i inrâlring thei na nge?

³⁸Thlêmnaa in tlûk luh loh nân invêngin ṭawngṭai rawh u; thlarau zawngin a huam a, tisa erawh chu a chak lo va ni,” a ti a.

³⁹A kal leh a, a thu sawi ngai sawiin a va ṭawngṭai leh a.

⁴⁰A lo kîr leh chuan an muthlu chu a rawn hmu leh a, an mut a chhuah êm avângin chhân ngaihna pawh an hre lo.

⁴¹A lo kîr vawi thumnaah chuan, “In la muthluin in la inthlahdul ta cheu a ni maw? A tâwk ta e, a hun chu a lo thleng ta; ngai teh u, Mihring Fapa hi mi sualte kûtah hlan a nih dâwn tâk hi.

⁴²Tho teh u, i kal ang u. En teh u, mi mantîrtu tûr pawh a lo hnaih tâk hi,” a ti a.

⁴³Chutia a la ṭawng lai mêk chuan Juda, Sâwmpahnihte zînga pakhat kha a lo thleng ta nghâl a, ama rual chuan puithiam lalte, Dân zirtîrtute leh upate tirh mi tam tak, khandaih leh talhtum kengin an lo thleng ta rup a.

⁴⁴A mantîrtu tûr khân chhinchhiahna tûr a lo hrilh lâwk tawh diam a, “Ka fawha chu amah chu a ni ang, man ula, ngun taka vêngin hruai ang che u,” tiin.

⁴⁵A lo thlen veleh Isua chu a rawn pan nghâl, a, “Rabi,” tiin a fâwp ta ngawih ngawih a.

⁴⁶Isua chu an chelh a, an man ta a.

⁴⁷A kianga dingte zînga pakhat chuan khandaih a phawi a, puithiam lalber bawih chu a sât a, a beng a hlawisak a.

⁴⁸Chûngho chu Isuan a bia a, an hnênah, “Suamhmang man tûr ang ziazângin khandaih leh talhtum kengin min man tûrin in lo thawk a ni maw?

⁴⁹In zîngah tempulah ni tin mi ka zirtîr ṭhîn a, mi man si lo. Lehkha Thu chu lo thlêng tûr rêng a ni e,” a ti a.

⁵⁰Zirtîrte chuan amah chu an hawisan a, an tlânchhiatsan ta a.

⁵¹Tlangvâl pakhat, puan zai sîn chauh sin hian a lo zui ve a, ani pawh chu an man a;

⁵²mahse, a tâl pût a, saruakin a tlân bo ta a.

⁵³Isua chu Puithiam lalber hnênah an hruai a, puithiam lal te, upaho te leh Dân zirtîrtu te an lo kal khâwm a.

⁵⁴Petera pawh chuan hnung fêah Puithiam lalber in hual chhûng kawtlai thlengin a rawn zui a; chhiahhlawhte zîngah chuan meilum aiin a ṭhu ve ta a.

⁵⁵Puithiam lalber leh Sanhedrin-a tel zawng zawng chuan Isua tihhlum theihna tûr thu an zawng ta a; mahse, an hmu hlei thei lo.

⁵⁶Mi tam takin dâwtin an rawn hêk a; nimahsela, an hêkna thu chu a inhmu thei si lo.

⁵⁷Mi ṭhenkhat an lo ding chhuak a, dâwtin an hêk a,

⁵⁸“‘He Tempul, kuta sak hi ka ṭhiat ang a, a dang, kuta sak ni lo, ni thum chhûngin ka din leh ang,’ a tih keimahni ngei hian kan hria,” an rawn ti a.

⁵⁹Chu thilah pawh chuan an hêkna thu chu a inhmu thei chuang lo.

⁶⁰Puithiam lalber chu a laiah a va ding chhuak a, Isua chu a zâwt a, “Hêngho hêkna che hi i chhâng thei na nge?” a ti a.

⁶¹Ani erawh chu a ngawi reng a, a enga mah a chhâng lo. Puithiam lalber chuan a hnênah, “Faktlâka Fapa, Krista chu i ni em?” tiin a zâwt leh a.

⁶²Tichuan, Isuan a chhâng ta a, “Ka ni asin, Mihring Fapa hi Thiltitheia ding lama ṭhu-a, vân chhûmte nên a lo kal in la hmu dâwn a ni,” a ti a.

⁶³Chu veleh Puithiam lalber chuan a silhfênte chu a pawtthlêr a, “Thuhretu dang engah nge kan ngaih tawh ang?

⁶⁴Pathian pawi a sawi dân chu in hre ta, engtin nge in ngaih?” a ti a. Tichuan, an za-in Isua chu tihhlum tlâkah an ngai a.

⁶⁵A ṭhen phei chuan amah chu chil an chhak ta pang a, a hmai te an tuam a, an hnek a, ‘Tu nge ti che sawi teh, an ti a. Vêngtute chuan an kai a, an bêng sawk sawk a.

⁶⁶Petera chu in chhâwng hnuai lam in hung chhûng kawt laiah chuan a awm reng a. Puithiam lalber chhiahhlawh zînga nula pakhat a lo kal a;

⁶⁷Petera meilum ai chu a rawn hmu a, a han en chiang a, “Nang pawh hi he Nazaret mi Isua hnêna awm kha i nih hi,” a ti a.

⁶⁸Ani erawh chuan, “I thu sawi awmzia chu ka hre hauh lo mai, a ngaihna pawh ka hre lo ve,” tiin a phat a. Pâwn lam a pan a (ar a khuang a).

⁶⁹Nula khân a enzui a, a bula dingte hnênah chuan, “An zînga mi a ni maw le,” a ti leh a.

⁷⁰Ani chuan a phat leh a. Chumi hnu lawkah Petera kianga dingte chuan, “An zînga mi i nih ngei hi, Galili mi i ni alâwm,” an ti a.

⁷¹Ani erawh chuan ânchhe dawn huamin chhia a chham a, “Chu mihring in sawia chu ka hre hauh lo,” a ti a,

⁷²âr chu a khuang leh ta nghâl a. Isuan a hnêna, “âr vawi hnih a khuan hmain nangin vawi thum mi phat ang,” a tih thu kha Petera chuan a hre chhuak a; lungchhe takin a ṭap chhuak ta a.