Read Mizo Lushai CHANCHIN ṬHA MARKA ZIAK 15 Bible Online

CHANCHIN ṬHA MARKA ZIAK 15 - Mizo Lushai bible

CHANCHIN ṬHA MARKA ZIAK 15

¹Zîng a lo nih veleh puithiam lalte chu upate, Dân zirtîrtute leh Sanhedrin pum pui chuan ro an rêl a; Isua chu an hlîng a, an kai a, Pilata kutah an hlân ta a.

²Pilata chuan ani chu a lo zâwt a, “Juda-te lal i ni maw?” a ti a. Ani chuan a chhâng a, “Chu, i sawi chu,” a ti a.

³Puithiam lalte chuan an hêk mawlh mawlh a.

⁴Tichuan, Pilatan a zâwt leh a, “An hêkna zozai che hi i hre na nge, a enga mah i chhân loh?” a ti a.

⁵Isua erawh chuan a enga mah chu a chhâng ta chuang lo va, Pilata chuan mak a ti hle a.

⁶Kût niin mi tâng pakhat an ngen apiang Pilatan a chhuahsak ṭhîn a.

⁷Helho tâng zînga pakhat, Baraba an tih chu, hel laia tual an thahnaa a tel ve avângin tân inah a tâng reng a.

⁸Mipuite chu an han chho va, a tih ṭhin ang kha tihsak leh tûrin Pilata chu an ngên a.

⁹Ani chuan, “Juda-te lal hi chhuahsak che u ila in duh em?” a lo ti a.

¹⁰Puithiam lalte chuan îtsîkna avângin a kutah an rawn hlân a ni tih a hre si a.

¹¹Puithiam lalte chuan mipui chu Baraba chhuahsak dîl tûrin an fuih a.

¹²Tichuan, Pilatan anniho chu, “Chuti chu Juda-te lal in tiha hi engtia ka tih nge in duh?” tiin a zâwt leh a.

¹³Anniho chu an au leh a, “Krawsah khêngbet rawh,” an ti a.

¹⁴Pilata chuan, “Engah maw? Eng nge a tihsual?” a ti a. Nimahsela, anniho chu ring lehzualin, “Krawsah khêngbet rawh,” tiin an au ta tuar tuar a.

¹⁵Tichuan, Pilatan mipui tihlungawi a duh a, Baraba chu a chhuahsak ta a; Isua erawh chu sipaite a vuaktîr a, krawsa khenbeh tûrin an hnênah a pe ta a.

¹⁶Sipaite chuan in hual chhûngah, praitorian an tihah chuan an hruai lût a, an pâwla mi zawng zawng an au khâwm a.

¹⁷Ani chu kawrfual senduk an hâktîr a, chawimawina atân hlîng an kual a, an khumtîr a.

¹⁸“Chibai, Juda-te lal!” tiin chibai an bûk ṭan ta a.

¹⁹Tiangin a lu-ah an vua a, chil an chhâk a, ṭhingṭhiin chibai an bûk el huai huai a.

²⁰Chutia nuihza siam nâna an hman zawh chuan kawrfual senduk chu an hlihsak a, ama kawr an hâktîr leh a, krawsa khenbeh tûrin an hruai chhuak ta a.

²¹Thingtlâng lam aṭanga lo kal mi pakhat, Simona, Kurini khaw mi, Aleksandara leh Rufa pa, lo ding chu Isua kraws putsak tûrin an man a.

²²Golgotha, ‘Luruh hmun’ an tih thleng chuan an hruai a,

²³Mura pawlh uain an pe a; mahse, a duh lo va.

²⁴Tichuan, krawsah an khêngbet ta a. An chan ṭheuh tûr hriat theih nân ṭhumvâwrin a silhfênte chu an insem a.

²⁵An khenbeh hun chu zîng dâr kua vêl a ni.

²⁶Amah an hêkna thu ziak an târ a, ‘Juda-te lal,’ tiin.

²⁷Ama rual chuan suamhmang pahnih an khêngbet bawk a, a ding lamah pakhat, a vei lamah pakhat.

²⁸

²⁹Mi vei nuk nukte chuan an lu thingin, “Uai! Nang, Tempul ṭhiata ni thuma din leh theitu,

³⁰intidam la, kraws ata kha lo chhuk ta che,” tiin an tiel a.

³¹Chutiang bawkin puithiam lalte leh Dân zirtîrtute chuan, “Mi dang mah tidam ṭhîn, mahni lah intidam thei si lo.

³²Amah kan rin theih nân kan hmuhah, Krista, Israel lal chu, tûnah hian kraws ata lo chhuk ang hmiang!” tiin hmusit takin an tiel bawk a. Ama ruala khenbehte pawh chuan chutiang bawkin an ti a.

³³Chhûn dâr sâwm leh pahnih a lo ni a, tlai dar thum thlengin khawvêl pum pui a thim ta vek a.

³⁴Tlai dâr thumah chuan Isua chu ring takin a au va, “Eloi, Eloi, Lema Sabakthani,” tiin (chu chu, “Ka Pathian, Ka Pathian, engah nge mi kalsan?” tihna a ni).

³⁵A kianga ding ṭhenkhatte chuan chu chu an hriatin, “Ngai teh u, Elija a ko va ni,” an ti a.

³⁶Mi pakhat a tlân a, uain thûrah sponj a chiah a, tiangah a târ a, Isua chu intîr a tum a, “Ngawi rú, amah la thla tûrin Elija a lo kal emaw i en ang u,” a ti a.

³⁷Isua chu aw ring takin a au va, a hnuk a chat ta a.

³⁸Tin, Tempul chhûng puanzâr chu a chung lam aṭangin a hnuai lam thlengin a thlêr thla ta a.

³⁹A hma zâwna sipai za hotu ding pawh chuan chutia a hnuk chat ta chu a hmuh chuan, “He mi hi Pathian Fapa a lo nih ngei hi le!” a ti a.

⁴⁰Hmeichheho pawhin hla tak aṭangin an thlîr ve reng a, chûng zîngah chuan Magdala khaw mi Mari te, Jakob naupang zâwka nu Mari te, Josea nu te, Salomi te an tel a.

⁴¹Hêng mite hi Galili rama a awm laia amah zuia a rawngbâwlsak ṭhîntute an ni; tin, a ruala Jerusalem-a chho ve hmeichhe dang pawh tam tak an awm.

⁴²Juda-te Inrinni a ni a, (chu chu Sabat ni atâna an inbuatsaih ni a ni.)

⁴³Josefa, Arimathai khuaa mi, rorêltu zînga tel, mi zahawm tak, Pathian ram beisei mi ve bawk kha, tlai lam a lo nih chuan a lo kal ve a, huai takin Pilata a va luh chilh a, Isua ruang chu a dîl a.

⁴⁴Pilata chuan a thi ta mai tih a hriat chuan mak a ti hle a, sipai za hotu chu a ko va, a thihna chin a zâwt a.

⁴⁵Sipai za hotu ka aṭanga a hriat hnu chuan a ruang chu Josefa a pe ta a.

⁴⁶Tichuan, puan zai sîn a lei a, amah chu a la thla a, puan zai sîn chuan a tuam a, lung ker thlânah a zalh a, thlân kawngka chu lungin a khâr ta a.

⁴⁷Tin, Magdala mi Mari leh Josea nu Mari pawh chuan an zalhna chu an en reng a.