Read Mizo Lushai CHANCHIN ṬHA MARKA ZIAK 16 Bible Online

CHANCHIN ṬHA MARKA ZIAK 16 - Mizo Lushai bible

CHANCHIN ṬHA MARKA ZIAK 16

¹Sabat ni a lo ral a, Magdala mi Mari te, Jakoba nu Mari te, Salomi te chuan a ruang va hnawih atân hriak rimtui an lei a.

²Pathianni zîngah thlânah an va kal a, ni pawh a chhuak tawh a.

³“Thlân kawngka ata lung chu tuin nge min lum sawnsak ang,” an intih lai mêkin,

⁴(lung lian tak a ni rêng a) an han dâk a, lung chu lum sawn sa-in an hmu ta a.

⁵Thlânah chuan an lût a, tlangvâl pakhat puan vâr sin, ding lam panga ṭhu an hmu a, an bîng ta chûk chûk a.

⁶Tichuan, ani chuan an hnênah, “Hlau suh u, Nazaret Isua, an khenbeh kha, in zawng a ni âwm a, kaihthawh a ni tawh a, hetah a awm tawh lo; en teh u, an zalhna chu hei hi a ni.

⁷Nimahsela, kal ula, a zirtîrte leh Petera hnênah chuan, ‘A hrilh che u ang ngei khân Galili-ah a lo kal hmasa dâwn a, chutah chuan in hmu ang,’ tiin va hrilh rawh u,” a ti a.

⁸An khûr a, an thauvah a man tâk avâng chuan thlân ata chu an chhuak a, an tlânchhe ta a; tu ma hnênah eng mah an sawi lo, an hlau êm a ni.

⁹(Tin, Pathianni zînga a thawhleh khân Magdala mi Mari, a kawchhûng ata ramhuai pasarih a hnawh chhuahsak hnênah khân a inlâr hmasa ber a.

¹⁰Ani chu Isua ṭhiante hnênah a kal a, mitthi ngaia an ṭap lai chu a va hrilh a.

¹¹Nimahsela, a nung leh a, hmuh pawh a hmu tih an han hriat pawhin an awih chuang lo.

¹²Chumi hnu chuan an zînga mi pahnih, thingtlâng khaw lam pan laite hnênah pawh, hmêl danglam puin a inlâr a.

¹³Anni pawh chuan mi dangte chu an rawn hrilh a; mahse, an lo awih chuang lo.

¹⁴Chumi hnu chuan Sâwmpakhatte hnênah, chaw an kîl laiin a inlâr a, a tholeh hmutute thu an awih loh avângin an rin loh leh an thinlung sak kawngah chuan a zilhhau ta a.

¹⁵An hnênah, “Khawvêl ram zawng zawngah kal ula, thil siam tinrêng hnênah Chanchin Ṭha hi hril rawh u.

¹⁶Tu pawh a ringa, baptisma chang chu chhandam an ni ang a, tu pawh a ring lo chuan thiam loh an chang ang.

¹⁷Hêng chhinchhiahna thil makte hi ringtute zîngah a awm zêl ang: Ka hmingin ramhuaite an hnawt chhuak ang a, ṭawng thartein an ṭawng ang a,

¹⁸kutin rûlte an man ang a, thihna tûr eng pawh in mah se, eng mah an ti lo vang; damlote chungah kut an nghat ang a, an dam zêl ang,” a ti a.

¹⁹Chutichuan, an hnêna thu a sawi zawhin Lalpa Isua chu vâna hruai chhohvin a awm a, Pathian ding lamah a han ṭhu ta a.

²⁰Anni pawh chu an chhuak a, ram tinah thu an hril ta a, Lalpan anmahni a thawhpui a, an thu chu chhinchhiahna thil maktein a tinghet zui zêl a. Amen.) MARKA ZIAK TÂWPNA TAWI ZÂWK (Tichuan, an hnêna a thu hrilh zawng zawng chu hmeichhiate chuan Petera leh a ṭhiante hnênah an va sawi vat a. Chumi hnu chuan, Isua ngeiin, anmahni hmangin, chatuan chhandamna thu ril thianghlim leh chhe thei lo chu, chhak leh thlang, ram tinah a theh darh ta a. Amen)