Read Mizo Lushai CHANCHIN ṬHA MARKA ZIAK 2 Bible Online

CHANCHIN ṬHA MARKA ZIAK 2 - Mizo Lushai bible

CHANCHIN ṬHA MARKA ZIAK 2

¹Ni eng emawti hnuah chuan Kapernaum-ah a lo lût leh a, ina a awm thu a darh ta a.

²Tichuan, pâwnah pawh kawngka bul thleng khat tlatin mi tam tak an lo pung khâwm a, an hnênah chuan thu a hril ta a.

³Mi paliin zeng pakhat an rawn zâwn a, a hnên an rawn panpui a.

⁴Mipui avâng chuan an hnaih hlei thei lo va, a awmna zâwn in chung chu an ṭhiat a; tin, an ṭhiat zawhin zeng chu a zâwnna chawpin an zu thlâk a.

⁵Isuan an rinzia a hmuhin zeng hnênah chuan, “Ka fapa, i sualte ngaihdam a ni ta e,” a ti a.

⁶Chutah chuan Dân zirtîrtu ṭhenkhat ṭhu ve an awm a,

⁷“He mi hian engah nge hetianga a tih le? Pathian pawi a sawi a ni; mi pakhat, Pathian chauh lo chuan, tu nge sualte ngaidam thei?” an ti rilru hlawm a.

⁸Chutiang chuan an ngaihtuah tih Isuan a hre nghâl mai a, an hnênah, “Engah nge rilrua chutiang in ngaihtuah ni?

⁹Zeng hnênah hian, ‘I sualte ngaihdam a ni ta,’ tih nge awl a, ‘Tho la, i mutna kha la la, kein kal tawh rawh,’ tih?

¹⁰Khawvêlah hian Mihring Fapa hian sual a ngaidam thei tih ka han hriattîr ang che u,” a ti a; zeng hnênah chuan,

¹¹“Tho la, i mutna kha la la, i inah haw rawh, ka ti a che,” a ti a.

¹²Tichuan, a tho va, a mutna chu a la a, an vaia hmuhin a chhuak ta nghâl a; an za chuan mak an ti êm êm a, “Hetiang hi kan la hmu ngai rêng rêng lo,” tiin Pathian an fak a.

¹³Tin, dîl lamah chuan a kal leh a, mipuiin an rawn pan dûl dûl a, ani chuan a lo zirtîr a.

¹⁴A kal pahin, Alfaia fapa Levia chu chhiah khawnna hmuna ṭhu a hmu a, “Mi zui rawh,” a ti a. Ani chu a tho va, a zui ta a.

¹⁵Tin, a inah ruai a ṭheh a, Isua leh a zirtîrte chu chhiahkhawntute leh mi sual tam takin chawhlui an rawn kîlpui hlawm a, tam takin amah an zui ve tawh a ni.

¹⁶Farisai-te zînga Dân zirtîrtute chuan chhiahkhawntute leh mi sualte a kîlpui an hmuh chuan a zirtîrte hnênah, “Engtizia nge chhiahkhawntute leh mi sualte zînga a ei ve le?” an ti a.

¹⁷Isuan chu chu a hriatin an hnênah, “Mi hrisêlten daktor an ngai lo va, mi bawrhsâwmten an ngai zâwk a ni. Mi felte lam tûr ni lovin mi sualte lam tûra lo kal ka ni zâwk,” a ti a.

¹⁸Johana zirtîrte leh Farisai-te chaw nghei ni chuan tute emaw an lo kal a, a hnênah, “Engati nge Johana zirtîrte leh Farisai zirtîrten chaw an nghei a, i zirtîrte lêmin an nghei ve loh?” an rawn ti a.

¹⁹Isuan, “An zîngah moneitu a awm chhûng chuan mo hruaitute chuan chaw an nghei ngai em ni? Moneitu chu an awmpui chhûng chu chaw an nghei ngai lo.

²⁰Moneitu chu an hnên ata hruai bo hun a la awm ang a, chumi hunah erawh chuan an la nghei ve ang.

²¹“Tu man puan hlui, puan thar la sûk lohvin an bel ngai lo, bel ta sela, a thar chuan puan hlui chu a kai ṭet ang a, a thlêr chu a nasa lehzual ang.

²²Uain thar pawh tu man savun ip hluiah an thun ngai lo, thun ang sela, uain chuan savun ip chu a tâwn keh ang a, uain chu a bua ang a, savun ip pawh chu a chhia ang; uain thar chu savun ip tharahte an thun zâwk ṭhîn,” a ti a.

²³Sabat ni vawi khat chu buhpui hmunahte an kal tlang a, a zirtîrte chuan kal pahin a vuite chu an thliak a.

²⁴Farisai-te chuan a hnênah, “En teh, engtizia nge sabat nia tih thiang lo an tih ni?” an ti a.

²⁵Ani chuan, “Rilṭâma ei tûr an neih loh laia Davida leh a ṭhiante thil tih kha in chhiar ngai na nge?

²⁶Abiathara Puithiam lalber a nih laia Pathian ina a luha, puithiamte chauh ei thian chhangdah chu a ei a, a ṭhiante pawh a pêk ve thu kha?” a ti a.

²⁷Amah vêkin, “Sabat hi mihring tâna siam a ni a, mihring hi sabat tâna siam a ni lo.

²⁸Tichuan, Mihring Fapa hi sabat chungah lam pawh hian Lal a ni,” a ti a.