Read Mizo Lushai CHANCHIN ṬHA MARKA ZIAK 3 Bible Online

CHANCHIN ṬHA MARKA ZIAK 3 - Mizo Lushai bible

CHANCHIN ṬHA MARKA ZIAK 3

¹Tin, sunagog-ah a lût a, chutah chuan mi pakhat kut zeng a lo awm a.

²Amah an hêk theih nân sabat nia a tihdam dâwn leh dâwn loh an châng a.

³Ani chuan kut zeng hnênah chuan, “A laiah hian lo chhuak teh,” a ti a.

⁴“Sabat ni-ah tihṭhat nge thiang tihchhiat? Mi nun chhan nge thiang tihhlum?” tiin anni chu a zâwt a; mahse anni chu an ngawi reng a.

⁵An thinlung sakzia a hriatin pawi a ti êm êm a, thinur taka anmahni a en vêl hnuin chu mi hnênah chuan, “I kut phar rawh,” a ti a.

⁶A han phar chhuak a, a kut chu a lo dam ta a. Farisai-te erawh chu an chhuak a, amah an tihboral theih dân tûr ngaihtuahin Heroda pâwla mite nên chuan an inrâwn ta nghâl a.

⁷Isua chu a zirtîrte nên dîl kam lamah an kal kiang a; Galili ram aṭangin mipui nasa takin an zui a. Judai ram aṭang te,

⁸Jerusalem aṭang te, Idumea ram aṭang te, Jordan râl aṭang te leh Tura leh Sidon bial aṭang te chuan mipui nasa takin a thiltihte an hria a, amah an rawn pan bawk a.

⁹Mipuiin an rawn nêk chêp luat loh nân lawnglêng lo buatsaih tûrin a zirtîrte chu a hrilh a;

¹⁰mi tam tak a tihdam tawh avângin na nei apiangin amah deh tumin an bawh huai huai si a.

¹¹Thlarau bawlhhlawhte pawh chuan amah an hriatin an bawkkhup a, “Nang Pathian Fapa chu i ni,” tiin an au ṭhîn a.

¹²Tu nge a nih erawh chu an sawi a khap tlat a.

¹³Tin, tlângram lamah a chho va, a mi duhzâwngte chu a ko va, anni chu a hnênah an lo kal a.

¹⁴A hnêna awma, thu hrila, a tirh tûr,

¹⁵ramhuaite pawh hnawt chhuak thei tûr mi sâwm leh pahnih a ruat a.

¹⁶Chûngte chu: Simona, Petera a vuah tâk te,

¹⁷Zebedaia fa Jakoba leh Jakoba unau Johana ‘Boanergia’ tia a vuah tâk te (chu chu ‘Khawpui ri fate’ tihna a ni),

¹⁸Andria te, Filipa te, Bartholomaia te, Mathaia te, Thoma te, Alfaia fa Jakoba te, Thadaia te, Kanan mi Simona te,

¹⁹a mantîrtu Juda Iskariota te chu an ni.

²⁰Tin, inah a haw a, mipui an lo pung khâwm leh ta chiam a, chaw pawh an ei hlei thei lo va.

²¹A chhûngte chuan an hriatin, “A â ta a nih chu,” an ti a, amah hruai tûrin an lo thawk a.

²²Jerusalem aṭanga Dân zirtîrtu lo chhuk thlate pawh chuan, “Belzebula a zâwl a nih hi,” te an ti a, “Ramhuai lal avângin alâwm ramhuaite a hnawh chhuah ṭhin,” te an ti bawk a.

²³Anni chu a ko va, tehkhin thuin an hnênah, “Setanan Setana vek engtin nge a hnawh chhuah theih ang?

²⁴Ram pawh inṭhena mahni an indo chuan chu ram chu a ding thei lo.

²⁵Chhûngkua pawh inṭhena mahni an indo chuan chu mite chhûng chu an ding khawchhuak thei lo vang.

²⁶Setana pawh mahni inbeiin inkhing ta sela, a ding chhuak thei lo vang, a ral mai zâwk ang.

²⁷Mi chak chu an phuar hmasak zet loh chuan a ina lûtin a sum an lâksak mai thei hek lo, an phuar hnuah erawh chuan a in chu an ramsak thei tawh ang.

²⁸Thu dik ka hrilh a che u; miin sualna zawng zawng leh thil pawi tinrêng an sawite chu ngaihdam theih a ni ang.

²⁹Thlarau Thianghlim pawi sawi meuh erawh chu, tu mah, engtikah mah ngaihdam an ni lo vang, chatuan sual chu an ti a ni,” a ti a.

³⁰“Thlarau bawlhhlawh a zâwl a ni,” an tih avâng khân chu chu a sawi a ni.

³¹A nu leh a unaute chu an lo thleng a, pâwnah an ding a, amah an kohtîr a.

³²A vêla mipui ṭhute chuan a hnênah, “En teh, pâwna saw, i nu leh i unaute leh i farnuten an ko va che,” an ti a.

³³Ani erawh chuan a chhâng a, “Ka nu leh ka unaute chu tute nge ni?” a ti a;

³⁴a kianga ṭhute chu a han en vêl a, “En teh u, ka nu leh ka unaute hi.

³⁵Tu pawh Pathian duhzâwng ti chu, chu mite ngei chu, ka unau te, ka farnute, ka nu te an ni e,” a ti a.