Read Mizo Lushai CHANCHIN ṬHA MARKA ZIAK 4 Bible Online

CHANCHIN ṬHA MARKA ZIAK 4 - Mizo Lushai bible

CHANCHIN ṬHA MARKA ZIAK 4

¹Dîl kamah chuan a zirtîr leh ta a; mipui nasa tak an lo pung khâwm a, dîla lawngah chuan a chuang a, a ṭhu a; mipui zawng zawng chu dîl kam khawmualah chuan an awm a.

²Tehkhin thuin thu tam tak a zirtîr a, a zirtîr lai chuan an hnênah, “Ngai thla teh u.

³Buh chi thehtu buh chi thehin a feh a;

⁴a han theh chuan a ṭhen kalkawngah a tla a, savaten an rawn tlân zo ta mai a.

⁵A ṭhen pialtlêp chung lei pan hmunah a tla a, lei a chhah lo va, a lo ṭo thuai a;

⁶tin, ni a lo tlângsâng deuh va, a em vuai a, zung a kaih loh avângin a râwp ta mai a.

⁷A ṭhen hnimhlîngnei zîngah a tla a, hnim chu a lo ṭhang a, a dîp ral a, a rah thei ta lo va.

⁸Ṭhenkhat chu lei ṭhaah a tla a, a ṭo va, a ṭhang lian a, a rah ta a; a let sawmthum te, a let sawmruk te, a let za te a lo haw ta a,” a ti a.

⁹“Ngaihthlâkna beng nei chuan ngaithla ngun rawh se,” a ti bawk a.

¹⁰A fâla a awm hnu chuan Sâwmpahnihte leh a ṭhuihruai dangte chuan tehkhin thute chu an zâwt fiah a.

¹¹Ani chuan an hnênah, “Pathian ram thu ril chu in hnêna pêk a ni a; pâwna mite tân erawh chuan tehkhin thu veka sawi a ni:

¹²‘En fo siin an hmu fuh lo vang a, Ngaithla ngaithla siin a ngaihna an hre hek lo vang; Chuti ni lo sela chu an lo hawi kîr ang a, Ngaihdam an ni tûr,’ tih ang kha a nih theih nân,” a ti a.

¹³Amah vêk chuan, “He tehkhin thu hi in hrethiam lo maw? Engtin nge tehkhin thu dang rêng rêng in hriatthiam theih ang?

¹⁴Buh chi thehtu chuan thu chu a theh a.

¹⁵Kalkawnga tlate chu hetiang hi an ni: thu chu an hriatin Setana a lo kal thuai a; anmahnia thu theh chu a lâk zawhsak nghâl mai ṭhîn.

¹⁶Chutiang bawkin pialtlêp hmuna thehte chu hetiang hi an ni: thu chu an hriat veleh lâwm takin an pawm nghâl a;

¹⁷nimahsela, anmahniah chuan zung a kai lo va, rei lo tê chauh an daih a, chumi hnuah chuan thu avânga hrehawm emaw, tihduhdahna emaw a lo awm veleh an tlu nghâl mai ṭhîn.

¹⁸Hnimhlîngnei zînga thehte pawh chu hêng mite ang hi an ni: thu chu an hria a.

¹⁹Mahse, khawvêl lungkhamna te, hausak nawmchenna te, thil dang châkna te a lo lût a, thu chu a rawn dîp ral a, a rah ta ṭhîn lo.

²⁰Lei ṭha a thehte erawh chu: thu chu hriaa, pawma, a lêt sawmthum te, a lêt sawmruk te leh a lêt za tea rah tate hi an ni,” a ti a.

²¹Amah vêkin an hnênah, “Khâwnvâr hi khova khuh tûrin emaw, khum hnuaia dah tûrin emaw an rawn chhi ngai em ni? A dahnaa dah tûr a ni dâwn lâwm ni?

²²Eng mah puan loh tûra thuhrûk a ni hek lo.

²³Ngaihthlâkna beng nei chuan ngaithla ngun rawh se,” a ti a.

²⁴Tin, amah vêkin an hnênah, “In thil ngaihthlâk chu ngai ngun rawh u, in tehna ngaiin an tehsak ang che u, an pe tam zâwk mah ang che u.

²⁵A nei an pêk belhchhah ang a, a nei lo chu a neih chhun pawh an lâksak ang,” a ti a.

²⁶Amah vekin an hnênah, “Pathian ram chu miin a lovah chi a theh a,

²⁷zânah a mutsan a, chhûnah a tho va, chi chu engtia lo ṭiaka, lo ṭhang nge tih a hre lo ang hi a ni.

²⁸Lei chuan amahin rah a rawn chhuahtîr mai ṭhîn, a tîr berah a kûng, a dawtah a vui, chumi zawhah a vuia a fang pum chu.

²⁹A rah chu a lo hmin a, seng a lo hun tâk avângin a favahin a ât nghâl ṭhîn,” a ti bawk a.

³⁰Tin, amah vêkin, “Pathian ram chu eng nên nge kan teh anga, eng tehkhin thu hmangin nge kan sawi fiah ang?

³¹Anṭam chi fang ang hi a ni, an theh lai chuan leia chi zawng zawnga tê ber a ni a,

³²an han theh hnu chuan thlai dang zawng zawng aia lianin a lo ṭhang a, zâr lian tak takte a rawn chhuah a, chunglêng savate pawh a bukah chuan an riak thei ṭhîn,” a ti a.

³³Chutiang tehkhin thu tam tak hmang chuan an hriatthiam tâwk tûrin thu chu an hnênah a sawi ṭhin a;

³⁴tehkhin thu lo chuan an hnênah thu a sawi ngai lo; ama zirtîrte hnênah erawh chuan fianrialah engkim a hrilh fiah ṭhîn.

³⁵Chumi nia khua a lo tlai lam chuan an hnênah, “Râl lehlamah sâwn i kai ang u,” a ti a.

³⁶Mipuite chu an kalsan a, a chuanna lawng chuan ani chu an kalpui a, lawng dangte pawh an tel ve a.

³⁷Tin, thlipui na tak a lo tleh ta a, tuifâwnte chu lawngah a rawn invawrh lût a, a khat dâwn ta mai a.

³⁸Ani chu lawng mei lamah lukham khamin a lo muhîl a. An han kai tho va, “Zirtîrtu, kan boral dâwn hi, pawi i ti lo vem ni?” an ti a.

³⁹Ani chu a lo tho va, thli chu a hau va, dîl hnênah pawh chuan, “Ngawi la, awm hle hle rawh,” a ti a. Thli chu a bâng a, a lo reh ta ṭhup mai a.

⁴⁰Ani chuan an hnênah, “Engah nge in hlauh? Rinna rêng in la nei na nge?” a ti a.

⁴¹An hlau ta êm êm a, “He mi hi tu nge ni le! Thli leh dîl lam pawhin a thu an awih hi?” an inti a.