Read Mizo Lushai CHANCHIN ṬHA MARKA ZIAK 5 Bible Online

CHANCHIN ṬHA MARKA ZIAK 5 - Mizo Lushai bible

CHANCHIN ṬHA MARKA ZIAK 5

¹Dîl râl Gerasin mite ram chu an va thleng a.

²Lawng ata a chhuak chu thlarau bawlhhlawh pai mi pakhat, thlân hmun aṭanga lo kal chuan, a rawn pan vat a.

³Chu mi chu thlânahte a chêng ṭhîn a, tu mahin khaidiat pawhin an phuar thei lo va,

⁴khaidiata phuarin kawlte buntîr ṭhîn mah se, khaidiatte chu a pawt chat a, kawlte chu a tisawm ṭhîn; tu mah tudawl thei an awm lo.

⁵A chhûn a zân mai hian thlânahte leh tlângahte chuan a au a au ṭhîn a, lungte pawhin a inzai ṭhîn a.

⁶Hla tak aṭangin Isua chu a hmu a, a lam panin a tlân a, kûnin chibai a bûk a.

⁷Aw ring takin a au va, “Isu, Chungnungbera Pathian Fapa, kan chungthu-ah rawn inrawlh i tum elo? Mi nghaisa lul lo tûrin Pathian hmingin ka ngên a che,” a ti a.

⁸Ani lah chuan, “Thlarau bawlhhlawhpa, a chhûng ata kha lo chhuak rawh,” a lo ti si a.

⁹“I hming eng nge ni?” tiin a zâwt a. Ani chuan, “Ka hming chu Sângruka a ni, kan tam êm êm a ni,” a ti a.

¹⁰Chumi ram ata tichhuak lo tûrin a ngên chiam a.

¹¹Chumi tlâng pangah chuan vawk rual tam deuh mai an tla a.

¹²A hnênah chuan, “Vawk hnênah sâwn min kaltîr la, an kawchhûngah kan va lût ang e,” tiin an ngên a.

¹³Isuan a phalsak ta a. Tichuan, thlarau bawlhhlawh chu an lo chhuak a, vawk kawchhûngah chuan an lût a. Vawk rual chu sânghnih lai an ni, khâm kovah chuan an tlân liam a, dîlah chuan an tla hlum ta a.

¹⁴A vêngtute chu an tlânchhia a, khua leh a chhehvêla mite chu an va hrilh a. Tichuan, eng thil nge lo thleng ta tih en tûrin an lo kal hlawm a.

¹⁵Isua hnên an lo thlen chuan ramhuai man, Sângruka kha, puan sina rilru pangngai pua lo ṭhu an va hmu a; hlauhawm an ti êm êm a.

¹⁶Chûng hmutute chuan ramhuai man chunga thil thlengte leh vawk chanchinte chu an lo hrilh bawk a.

¹⁷Chûng mite chuan Isua chu an bial ata chhuak tûrin an ngên a.

¹⁸Isua chu lawnga a chuan dâwn laiin ramhuai mana khân a hnêna awm reng a ngên a;

¹⁹mahse, a phal lo va, “I inah, i chhûngte hnênah haw la, Lalpan i tân thil a tihsak che leh a khawngaihzia che hi va hrilh zâwk tawh,” a ti a.

²⁰Ani chu a kal a, Dekapoli khuaahte chuan Isuan thil a tihsakte chu a tlângaupui ta a, mi zawng zawngin mak an ti hle a.

²¹Tin, Isua chu lawnga râl lehlama a kai leh chuan mipui nasa tak a hnênah an lo pung khâwm a; dîl kamah chuan a awm a.

²²Sunagog hotu zînga pakhat, a hming Jaira chu a lo kal a, amah a han hmuh chuan a ke bulah a bawkkhup a,

²³“Ka fanu naupang tê a thi lek lek a, a lo harh a, a lo dam leh theih nân a chungah i kut va nghat teh,” tiin a ngên chiam a.

²⁴Isua chuan a zui ta a, mipui nasa takin amah chu an zui ve a, an nêk huai huai bawk a.

²⁵Hmeichhe pakhat, kum sâwm leh pahnih thi pût tawh hi a awm a.

²⁶Daktor tam takin nasa takin an enkawl tawh a, a neih zawng zawng a hman ral hnu pawhin ṭhat lam pan ahnêkin a zual zâwk mah si a.

²⁷Isua chanchin a lo hriat veleh chuan hnung lamah mipui kârah chuan a lo kal a, a puan chu a va dek a.

²⁸“A puan chauh pawh dek ila ka dam ngei ang,” a ti a ni.

²⁹Tichuan, chawplehchilhin a thi pût chu a lo hul ta a, a na chu a dam ta tih a taksaah chuan a inhre ta a.

³⁰Isua pawh chuan amah aṭangin thiltihtheihna a chhuak tih a inhre nghâl a, mipui zîngah chuan a hawi vêl a, “Tu nge ka puan dek kha?” a ti a.

³¹A zirtîrte chuan “Mipuiin an nêk huai huai che i hmu si a, engtizia nge ‘tu nge mi dek?’ i tih le?” an ti a.

³²Ani erawh chuan a dektu hmuh tumin a en vêl a.

³³Tichuan, a chunga thil lo thleng ta chu hriain hmeichhia chu hlau leh khûr chungin a lo kal a, a hmaah a bawkkhup a, engkim dik takin a hrilh ta a.

³⁴Ani chuan, “Ka fanu, i rinna hi i dam phah a ni e, thlamuang takin kal ta la, i natna ata chu lo dam hlen tawh ang che,” a ti a.

³⁵A la ṭawng lai mêk chuan Jaira in aṭanga lo kalte chuan, “I fanu a thi ta. Engah nge zirtîrtu hi i la tihhah cheu dâwn?” an rawn ti a.

³⁶Isua erawh chuan an thu sawi chu a lo hre ve a, sunagog hotupa hnênah chuan, “Hlau suh, ring mai rawh,” a ti a.

³⁷Petera te, Jakoba te, Jakoba unau Johana te chauh lo chu mi dang tu mahin an zui ve a phal ta lo va.

³⁸Sunagog hotupa in chu an va thleng a, ri mur mur leh ṭap tuar tuara chiau vawng vawngte chu a va hmu a.

³⁹A luh pah chuan an hnênah, “Engati nge in buaia in ṭah vak vak le? Naupang chu a thi lo ve, a muhîl a ni zâwk,” a ti a.

⁴⁰Anni chuan an nuihsan mai a. Tichuan, an za-in a hnawt chhuak a, naupang nu leh pa leh amah zuitute chu a hruai a, naupang mutna hmunah chuan an lût a.

⁴¹Tin, naupang kut chu a chelh a, a hnênah, “Talitha, kum,” a ti a, chu chu, “Mami, tho rawh,” tihna a ni.

⁴²Hmeichhe naupang chu a lo tho va, a kal thei ta mai a, amah chu kum sâwm leh pahnih mi a ni. Mak an ti nasa êm êm a.

⁴³Ani erawh chuan an hnênah, “Hei hi tu man hre suh se,” a ti tlat a. “Ei tûr pe rawh u,” a ti bawk a.