Read Mizo Lushai CHANCHIN ṬHA MARKA ZIAK 6 Bible Online

CHANCHIN ṬHA MARKA ZIAK 6 - Mizo Lushai bible

CHANCHIN ṬHA MARKA ZIAK 6

¹Chu hmun chu a chhuahsan a, an khaw lamah a kal ta a, a zirtîrte pawh chuan an zui zêl a.

²Sabat ni a lo ni a, sunagog-ah chuan a han zirtîr ṭan ta a; mi tam tak an awm a, a thu an hriat chuan mak an ti êm êm a, “Hêng hi khawi aṭanga a hriat nge? A dawn hi eng finna nge ni-a, chuti kauva thiltihtheihna a neih le?

³Mari fa, Jakoba te, Josea te, Juda te, Simona te unaupa mistiri kha a ni lo vem ni? A farnute pawh kan zîngah an awm lo vem ni?” te an ti a; amah chu an hmu thiam ta lo va.

⁴Isua chuan an hnênah, “Zâwlnei chu ama khaw lamah te, a laichîn te leh a chhûngte zîngah lo chuan an chawimawi ṭhîn.” a tihsan a.

⁵Tin, damlo tlêm te chunga kut nghata a tihdam chauh lo chu chutah chuan thil mak rêng a ti thei lo.

⁶An rin loh avâng chuan mak a ti hle a.

⁷Tin, zirtîr chung zêlin khuate a fang vêl a. Sâwmpahnihte chu a ko va, pahnih zêla inkawpin a tîr chhuak a, thlarau bawlhhlawhte chunga thuneihna pawh a pe bawk a;

⁸kalkawng atân tiang chauh lo chu chhang pawh, iptê pawh, an kâwnghrênah pawisa pawh pai lo tûrin a ti tlat a,

⁹pheikhawk an bun a phal a, kawr pahnih an hâk erawh chu a phal lo.

¹⁰An hnênah chuan, “In chhuahsan leh hma chu in va thlen in ngaiah chuan chêng reng ang che u.

¹¹Khawii khua pawhin an lawm loh che ua, in thu an ngaihthlâk loh chuan, chu khua in chhuahsan dâwnah, an tihdik lohzia hriattîr nân in kephaha vaivut chu thing thla ang che u,” a ti bawk a.

¹²Tichuan, an kal chhuak a, “Sim rawh u,” tiin thu an hril a.

¹³Ramhuai tam tak an hnawt chhuak a, damlo tam tak hriak an hnawih a, an tidam bawk a.

¹⁴ Isua hming chu a than tâk êm avângin Lal Heroda chuan a lo hre ve ta a. Mi ṭhenkhat, “Baptistu Johana kha mitthi zîng ata a lo tho leh ta a, hêng thiltihtheihnate hian amahah a thawk a nih chu,” tite an awm a,

¹⁵mi dangin, “Elija a nih chu” an ti a; a ṭhenin, “Zâwlnei, hmânlai zâwlnei zînga pakhat ang kha a nih chu,” te an ti a.

¹⁶Heroda erawh chuan a lo hriatin, “Johana, a lu ka tansak kha a ni ang, a lo tho leh ta a nih chu,” a ti a.

¹⁷He Heroda hi a ni, a unau Filipa nupui, Herodi, nupuia neihsaktu, chumi avâng chuan Johana chu a mantîr a, tân inah a khung a ni.

¹⁸Johana chuan Heroda hnênah, “I unau nupui i chhuhsak hi a thiang lo ve,” a ti a.

¹⁹Chuvâng chuan, Herodi chuan a hal ta riau a, tihhlum pawh a duh a; mahse, a thei si lo;

²⁰Herodan Johana chu mi fel leh mi thianghlim a nih a hria a, a ṭih êm êm a, a hum tlat a ni; a thu a ngaihthlâk chuan a inngaihtuah buai hle ṭhîn a; mahse, châk takin a ngaithla ṭhîn.

²¹Heroda chuan a mi ropui te, sipai hotu lian te, Galili rama mi liante a sâwm a, a pian champhaphâk ruai a ṭheh lai chuan hun remchâng a lo awm ta a.

²²Herodi fanu chu a lo lût a, a lâm a, Heroda leh a ruai kîlpuite chu a tilâwm ta hle a; lal chuan nula hnênah chuan, “I duh apiang mi dîl rawh, ka pe ang che,” a ti a.

²³“Eng pawh mi dîl apiang, ka ram chanve hial pawh ka pe ang che,” tiin a tiam bawk a.

²⁴Ani chu a chhuak a, a nu hnênah chuan, “Eng nge ka dîl ang?” a va ti a. A nu chuan, “Baptistu Johana lu le,” a lo ti a.

²⁵Hmanhmawh takin lal hnênah chuan a kîr leh a, “Thlêngah Baptistu Johana lu mi pe nghâl rawh,” a ti a. Lal chuan pawi a ti êm êm a;

²⁶mahse, a thutiam leh a ruai kîlpuite avâng chuan a hnial hreh a.

²⁷Lal chuan vêngtu sipai pakhat a tîr ta nghâl a; tân inah chuan Johana lu chu a tan a,

²⁸thlêngin a rawn la a, nula chu a pe a, ani chuan a nu a pe leh a.

²⁹Chu chu a zirtîrten an hriatin an va kal a, a ruang chu an hlâwm a, thlânah an zalh ta a.

³⁰Tirhkohte kha Isua hnênah an lo kal khâwm a, an thil tih apiangte leh an thu, zirtîr zawng zawng chu an hrilh vek a.

³¹Ani chuan an hnênah, “Keimahniho chauhvin fianrialah kal hrang ila, in châwl rih dâwn nia,” a ti a. Mi tam tak an insûl zut zut a, chaw takngial pawh an ei hman si lo va.

³²Tichuan, fianrial pan chuan lawngin an kal ta a.

³³An chhuak chu mi tam takin an hmu a, anni an ni tih an hriat chuan khawmual lamah, khaw tin aṭangin, an tlân khâwm a, an lo lehkhalh a.

³⁴Lawng ata a lo chhuah chuan mipui nasa tak a hmu a, vêngtu nei lo berâm ang an nih avângin a khawngaih ta êm êm a, ṭhahnemngai takin a zirtîr ta a.

³⁵Khua pawh a lo tlai ta hle a, a zirtîrte chu a hnênah an lo kal a, “Hei hi hmun thlalêr a ni a, khua pawh a lo tlai ta a,

³⁶kan kiang vêl lovahte leh khuaahte mahni ei tûr eng emaw tal an zawn theih nân anniho hi kaltîr ta che,” an rawn ti a.

³⁷Ani erawh chuan, “Nangmahnin ei tûr pe zâwk rawh u,” tiin a lo chhâng a. Anni chuan, “Chhang duli zahnih man leiin ei tûr kan pe em ni ang?” an ti a.

³⁸Ani chuan, chhang eng zât nge in neih, han en teh u,” a ti a. An neih zât an han hriat chuan, “Tlang nga, sangha pahnih nên,” an ti a.

³⁹Ani chuan an vaiin hlobet hring hmunah chuan a pâwl pâwla ṭhuttîr tûrin zirtîrte chu thu a pe ta a;

⁴⁰za te, sawmnga tein an ṭhu ta hlawm a.

⁴¹Ani chuan chhang panga leh sangha pahnih chu a la a, vân lam enin malsâwmna a sawi a, chhang chu a phel a, mipui hnêna sem tûrin zirtîrte chu a pe a; sangha pawh chu a sem ṭheuh va.

⁴²An zavai chuan an ei a, an tlai ta ṭheuh va;

⁴³chhang leh sangha sem bâng chu bâwm sâwm leh pahnihah an dah khat a.

⁴⁴Chhang eitute chu patling hlîr pawh sângnga an ni.

⁴⁵Mipuite chu a ṭintîr vêl chhûngin râl lehlam Bethsaida-a lo va kal hmasa tûrin a zirtîrte chu lawngah a chuan luihtîr ta nghâl a.

⁴⁶Mipui chu a thlah fel hnu chuan ṭawngṭai tûrin tlângah a kal ta a.

⁴⁷Khua a lo thim a, lawng chu dîl laiah a awm tawh a, ani erawh chu amah chauhvin khawmualah a la awm a.

⁴⁸Thliin a ni lo lama a nem avâng chuan mangang taka lawng an kar chu a hmu a; khawfîng chah dâwn vêlin dîl chungah chuan an lam panin a kal a, kal pelh a tum a.

⁴⁹Dîl chunga a kal an hmuh chuan hmuithla emaw an ti a,

⁵⁰hlauvin an au ta chûl a. “Thlaphâng suh u, keimah ka ni e, hlau mah ta che u,” a ti a.

⁵¹Lawngah chuan a chuang lût ve ta a, thli pawh chu a bâng ta mai a. Tichuan, mak an ti êm êm a,

⁵²chhang thu kha a awmzia an hre si lo va, an rilruin a man pha lo va ni.

⁵³Dîl an kân a, Genesaret ramah chuan an va kai a, lawng chu an thlung a.

⁵⁴Lawng ata chu an chhuak a, miten ani chu an lo hre nghâl a.

⁵⁵Chumi bial pumah chuan an tlân ta sung sung a, a awma an hriatna apiangah damlote chu an mutna chawpin an zâwn khâwm a.

⁵⁶Khaw tê-ah te, khaw lianah te, lovah te, khawiah pawh a kalna apiangah damlote chu an bazâr hmunahte an muttîr a, a puanfêm pawh deh theih an ngên hlawm a; tin, a dek apiang chu an dam ta zêl a.