Read Mizo Lushai CHANCHIN ṬHA MARKA ZIAK 7 Bible Online

CHANCHIN ṬHA MARKA ZIAK 7 - Mizo Lushai bible

CHANCHIN ṬHA MARKA ZIAK 7

¹Farisai-te chu, Dân zirtîrtu ṭhenkhat Jerusalem aṭanga lo kalte nên a hnênah an lo kal ho va;

²a zirtîr ṭhenkhatten kut bawlhhlawha chaw an ei chu an hmu a, chu chu ‘kut sil loh’ tihna a ni.

³Farisai-te bâkah Juda-ho zawng zawng pawhin upate thu rochhiah zâwmin kut an sil zet loh chuan eng mah an ei ngai lo.

⁴An bazâr kai haw pawh an insil zet loh chuan eng mah an ei ngai lo. Thil dang tam tak pawh zawm tûr dawn chhâwn an nei - no sil te, bêl sil te, khum sil ang te hi.

⁵Chutichuan, Farisai-te leh Dân zirtîrtute chuan, “Engati nge i zirtîrte hian upa thu rochhiah zâwm lovin kut bawlhhlawha chaw an ei ni?” an ti a.

⁶Ani chuan a chhâng a, “Nangni mi vervêkho thu Isaian hetia a lo hril lâwk hi a tidik zet mai: ‘He mite hian an ṭawngkam chauhvin mi chawimawi a. An thinlung erawh chuan mi hlat si.

⁷Thurin ang hrimin mihring thupêkte an zirtîr a, An mi biakna hi a thlâwn mai a ni,’ a tih kha.

⁸Pathian thupêkte in hlamchhiah a, mihring thu rochhiah te chu in vuan tlat a nih hi,” a ti a.

⁹Amah vêkin, “Nangmahni thu rochhiah in kenkawh theih nân Pathian thupêk hêl dân in thiam teh e.

¹⁰Mosia chuan, ‘I nu leh i pa chawimawi rawh, mahni nu emaw, pa emaw sawichhia chu a thi ngei tûr a ni,’ a ti a;

¹¹nangni erawh chuan, miin a nu emaw, a pa emaw hnênah, ‘Mi chhawrna tûr zawng zawng Korban (chu chu ‘Pathian hnêna pêk’ tihna a ni) a ni tawh,’ a tih chuan

¹²a nu tân emaw, a pa tân emaw eng mah a tihsak in phal tawh ṭhîn lo.

¹³Tichuan, in thu rochhiah avâng hian Pathian thu chu in bawh bo a nih hi, chutiang chu tam tak in ti ṭhîn,” a ti a.

¹⁴Mipuite chu a ko khâwm leh a, an hnênah, “In za-in ka thu hi ngaithla ula, hei hi hre fiah rawh u;

¹⁵pâwn lam aṭanga mihring chhûnga lût eng mahin amah a tibawlhhlawh thei lo, mihring chhûng lam aṭanga lo chhuak zâwk chu a ni amah tibawlhhlawh ṭhîntu chu,” a ti a.

¹⁷Mipui chu ina a luhsan hnuin a zirtîrte chuan tehkhin thu chu an zâwt fiah ta a. Ani chuan, “Nangni pawh chuti êma mâwl in ni maw?

¹⁸Eng pawh pâwn lam ata mihring chhûnga lût apiang,

¹⁹a thinlung chhûnga lût lovin a pum chhûngah a lût zâwk a, dailênnaah a chhuah leh mai avângin amah chu a tibawlhhlawh thei lo tih in hre lâwm ni?” a ti a. (Chutiang chuan ei tûr tinrêng hi a sawi thiang ta vek a ni.)

²⁰Mihring chhûng lam aṭanga lo chhuak chuan chumi ngei chuan, mihring hi a tibawlhhlawh ṭhîn a ni.

²¹Mihring thinlung chhûng lam aṭang chuan ngaihtuahna sual - inngaihna te, rûkrûkna te, tualthahna te, uirena te,

²²awhna te, suahsualna te leh bumna te, hurna te, îtsîkna te, Pathian pawi sawina te, chapona te, ho taka chêtna te a lo chhuak si ṭhîn a.

²³Hêng thil sual zawng zawng hi chhûng lam aṭanga lo chhuak a ni a, mihring a tibawlhhlawh ṭhîn a ni,” a ti a.

²⁴A tho va, chuta ṭang chuan Tura bialah a kal ta a; in pakhatah a va awm a, tu ma hriat a duh lo na a, a inthup hlei thei si lo.

²⁵Thlarau bawlhhlawh pai fanu nei nu pakhat pawh chuan a chanchin a lo hriat veleh a rawn pan a, a ke bulah chuan a bawkkhup a.

²⁶Chu nu chu Grik a ni a, Suria rama Foiniki biala piang a ni. A fanu kawchhûng ata ramhuai chu hnawt chhuak tûrin a ngên a.

²⁷Isua erawh chuan a hnênah, “Fate chu tlai phawt rawh se, fate chaw lâksaka, ui hnêna pêk chu a dik lo ve,” a lo tihsan a.

²⁸Ani chuan a chhâng a, “A ni khawp mai, Lalpa; nimah sela, dawhkân hnuaia uite pawhin fate ei nawi tlate chu an ei ṭhîn alâwm,” a ti a.

²⁹“I thu sawi avâng chuan haw ta la, ramhuai chu i fanu kawchhûng ata a chhuak tawh e,” a ti a.

³⁰Ani chu a hâwng a, a fa chu khuma a mu a va hmu a, ramhuai chuan a lo chhuahsan tawh a ni.

³¹Tura bial aṭang chuan a chhuak leh a, Sidon tlawhin Dekapoli bial chu kal tlangin Galili dîl a lo thleng leh a.

³²Bengngawng pakhat, ṭawng pawh ṭawng fiah thei lo hi a hnênah an rawn hruai a, a chunga kut nghat tûrin an ngên a.

³³Isua chuan mipui zîng ata chu a hruai hrang a, a kut zung chuan a beng kuate chu a khawihsak a,

³⁴a leiah chil a hnawmsak a, vân lam enin a thaw huai a, a hnênah, “Effata,” a ti a, (chu chu ‘lo inhawng rawh,’ tihna a ni.)

³⁵Tichuan, a beng chu a lo vâr a, a lei phuarna te pawh chu a lo inphelh a, fiah takin a ṭawng thei ta a.

³⁶Tu mah hrilh lo tûrin anniho chu a ti tlat a; nimahsela, a khap nasat veleh an tlângaupui zual sauh zêl a.

³⁷Mak an ti nasa êm êm a, “Thil a va han ti ṭha ṭhîn tak êm! Bengngawng beng a tivâr a, ṭawngtheilote pawh a ṭawngtîr hi,” an ti a.