Read Mizo Lushai CHANCHIN ṬHA MARKA ZIAK 8 Bible Online

CHANCHIN ṬHA MARKA ZIAK 8 - Mizo Lushai bible

CHANCHIN ṬHA MARKA ZIAK 8

¹Chutih lai vêl chuan mipui nasa tak an lo pung khâwm leh a, ei tûr eng mah an nei lo va. A zirtîrte chu a ko va,

²“Mipuiho hi ka khawngaih êm êm a ni, ka hnênah ni thum an awm tawh a, ei tûr lah an nei ta si lo;

³rilṭâma ka hawtîr mai chuan kawng lakah an ṭâmchhâwl mai ang, ṭhenkhatte phei chu an lo kalna a hla hle si a,” a ti a.

⁴A zirtîrte chuan, “Tu nge hetiang hmun thlalêrah hêngho puarna khawp chhang hmu thei ang?” tiin an chhâng a.

⁵Ani chuan, “Chhang eng zât nge in neih?” a ti a. Anni chuan, “Pasarih,” an ti a.

⁶Tichuan, mipui chu leia ṭhu tûrin thu a pe a, chhang pasarih chu a la a, lâwmthu a sawi zawhin a phel a, an hnêna sem tûrin a zirtîrte a pe a; mipui chu an sem ta a.

⁷Nghatê tlêm an nei bawk a, chûng pawh chu malsâwmna a sawi zawhin a semtîr a.

⁸Tichuan, an ei a, an tlai ta hlawm a. An sem bâng chu bâwm sarihah an dah khat a.

⁹Mipuite chu sângli lai an ni; anniho chu a ṭîntîr a,

¹⁰ani pawh chu a zirtîrte nên lawngah an chuang ve nghâl a, Dalmanutha ram an va thleng a.

¹¹Farisai-te an lo kal a, an rawn hnial a. Amah fiah nân vân ata chhinchhiahna thil mak an phût a.

¹²Thaw ipikthlâk a ti hle a, “Engati nge tûnlai mite hian chhinchhiahna thil mak an zawn? Thu dik ka hrilh a che u, tûnlai mite hi chhinchhiahna thil mak rêng rêng entîr an ni lo vang,” a ti a.

¹³Anni chu a kalsan a, lawngah chuan a chuang leh a, râl lehlam panin a kal ta a.

¹⁴A zirtîrte chuan chhang an lo ken theihnghilh a, lawngah chuan chhang tlang khat chauh lo chu a dang rêng an nei lo.

¹⁵Ani chuan, “Farisai-te dawidim leh Heroda dawidim lakah chuan invêng ula, fîmkhur rawh u,” tiin anni chu a han zilh a.

¹⁶“Chhang kan nei hauh lo mai le,” tiin an inbia a.

¹⁷Isuan a lo hriatin, “Engati nge chhang in neih loh thu ngawt in buaipui tâk? In la man lovin in la hrethiam lo ta cheu a ni maw? In va ngawng ve maw le!

¹⁸Mit nei siin in hmu lo maw? Beng nei siin in hre lo maw? In theihnghilh ta em ni?

¹⁹Chhang pangaa mi sângnga ka hrai ṭum khân eng zât nge bâng kha?” a ti a.

²⁰“Bâwm sâwm leh pahnih,” an ti a. “A nih leh, mi sângli chhang pasariha ka hrai khân eng zât nge bâng kha?” a ti a. “Bâwm sarih,” an ti a.

²¹Tichuan, an hnênah, “In la hrethiam lo ta cheu maw?” a ti a.

²²Bethsaida chu an lo thleng a, a hnênah mitdel an rawn hruai a, amah dek tûrin an ngên a.

²³Ani chuan mitdel kut chu a chelh a, khua ata chu a kai chhuak a. A mitah chil a chhâk a, a khawih a, “Khua i hmu thei em?” tiin a zâwt a.

²⁴Ani chu a han dâk a, “Mi ka hmu, thing angin an kal zut zut mai,” a ti a.

²⁵A mit chu a khawihsak leh a, a han meng vak a, a lo dam felin engkim fiah takin a hmu thei ta a.

²⁶“Khuaah pawh lût lovin haw nghâl rawh,” a ti a.

²⁷Isua leh a zirtîrte chu Filipa Kaisari chhehvêl khuaahte chuan an kal ta a. Kawngah chuan a zirtîrte hnênah, “Miten tu nge nia mi sawi?” tiin a zâwt a.

²⁸Anni chuan, “ ‘Baptistu Johana,’ ti che an awm a, a ṭhenin ‘Elija,’ an ti che a, ṭhenkhat erawh chuan, ‘Zâwlnei tu-a emaw’ te an ti che,” tiin an chhâng a.

²⁹Ani chuan, “A nih, nangnin tu nge nia mi hriat?” tiin a zâwt a. Petera chuan, “Krista chu i ni,” a ti a.

³⁰Tichuan, a chanchin chu tu mah hrilh tawp lo tûrin a ti a.

³¹Tin, Mihring Fapa chuan thil tam tak tuar ngei tûr a nih thu te, upate, puithiam lalte leh Dân zirtîrtuten an duh loh tûr thu te, an thah ngei tûr thu te, ni thum china a thawhleh ngei tûr thu te chu a zirtîr ṭan ta a.

³²Chûng thu chu chiang takin a sawi a. Petera erawh chuan ani chu a hruai hrang a, a zilhhau ta a.

³³Ani chuan a hawisan a, a zirtîrte lam chu a hawi a, “Setan, kal bo daih rawh, Pathian duh dâna ngaihtuah lovin mihring duh dânin i ngaihtuah a nih hi,” tiin Petera chu a hau ve ta thung a.

³⁴Mipui chu a zirtîrte nên chuan a ko va, an hnênah, “Tu pawh mi zui duh chuan mahni inngaihtuah chang lovin mahni kraws puin mi zui rawh se.

³⁵Tu pawh mahni nun humhim tum chuan an chân ang a, tu pawh keimah avâng leh Chanchin Ṭha avânga nun chân chuan an humhim ang.

³⁶Miin khawvêl hi a pumin nei vek sela a nun chân si se, a tân eng nge sâwt ang?

³⁷Miin a nun aiah eng nge a pêk theih ang?

³⁸Tûnlai mi, uire hmang leh sual tak zînga ka thu leh kei mi zahpui apiang chu Mihring Fapa pawh hian Vântirhkoh thianghlimte nêna a Pa ropuina nên a lo kal hunah chuan anni chu a zahpui ve ang,” a ti a.