Read Mizo Lushai CHANCHIN ṬHA MARKA ZIAK 9 Bible Online

CHANCHIN ṬHA MARKA ZIAK 9 - Mizo Lushai bible

CHANCHIN ṬHA MARKA ZIAK 9

¹“Thu dik ka hrilh a che u, heta dingho ṭhenkhatte hi, Pathian ram thiltihtheihna nêna lo thleng an hmuh hma loh chu thi lo tûr an awm,” a ti bawk a.

²Tin, ni ruk hnu chuan Isuan Petera te, Johana te leh Jakoba te chu tlâng sâng takah hruaiin anmahni chauh a chhohpui a; an hmaah chuan a hmêl lan dân a lo danglam ta a.

³A silhfênte pawh chu, leia puan su tu rêng rêngin an sûk vâr theih loh khawpin a lo vâr ta sur mai a.

⁴Elija leh Mosia chu an hnênah an rawn inlâr a, Isua nên an inbia a.

⁵Petera chuan Isua hnênah, “Rabi, heta kan awm hi a ṭha e; bâwktê pathum kan khawh ang e, i tân pakhat, Mosia tân pakhat, Elija tân pakhat,” a ti a.

⁶An hlauh êm avângin sawi tûr ahleih pawh an hre lo va ni.

⁷Tin, chhûm a lo zîng a, anniho chu a rawn khuh a, chhûm aṭang chuan aw a lo chhuak a, “Hei hi ka Fapa, ka Duhtaka chu a ni, ama thu hi ngai rawh u,” tiin.

⁸Tichuan, an han en vêl thuai a, an zîngah chuan Isua chauh lo chu tu mah dang an hmu ta lo va.

⁹Tlâng ata chu an chhuk laiin Mihring Fapa chu mitthi zîng ata a thawhleh hma chuan an thil hmuhte chu tu mah hrilh hauh lo tûrin a ti a.

¹⁰Tichuan, chu thu chu an vawng reng a, ‘Mitthi zîng ata thawhleh,’ tih chu eng tihna ni ang maw tiin an sawi ho ṭhîn a.

¹¹Anni chuan, “Engtizia nge Dân zirtîrtuten, ‘Elija a lo kal hmasa zet tûr a ni’ an tih le?” tiin Isua chu an zâwt a.

¹²Ani chuan, “Elija chu engkim siam ṭha tûra lo kal hmasa rêng tûr alâwm. Engtizia nge Mihring Fapa hi thil tam tak tuara hmuhsitin a awm dâwn a ni tih ziak a nih si le?

¹³Nimahsela, ka hrilh a che u, Elija chu a lo kal tawh a, a chanchin ziak ang ngei khân a chungah an duh duhin an tih kha,” a ti a.

¹⁴Tin, zirtîrte hnên an zu thleng a, an vêla mipui nasa tak chu an hmu a, Dân zirtîrtute nên an lo inhnial a.

¹⁵Amah an hmuh veleh mipui zawng zawng chuan mak an ti hle a; a hnên lamah an tlân a, chibai an bûk a.

¹⁶Ani chuan an hnênah, “Hêngho nên hian eng thu-ah nge in lo inhnial?” a ti a.

¹⁷Mipui zînga pakhat chuan a chhâng a, “Zirtîrtu, ka fapa, ramhuai ṭawngtheilo pai chu, i hnênah ka rawn hruai a;

¹⁸a man apiangin a paih tlu ṭhîn a; a chil phuante a tla a, a hâte a ṭhial a, a khawng tlat mai ṭhîn. I zirtîrte hi hnawt chhuak tûrin ka ti a, an thei si lo,” a ti a.

¹⁹Ani chuan a chhâng a, “Ṭhangthar, rinna tlachhamte u, eng chen nge in hnêna ka awm anga, eng chen nge ka dawh theih dâwn che u? Ka hnênah han hruai teh u,” a ti a.

²⁰A hnênah chuan an hruai a, ramhuai bawlhhlawh chuan Isua a hmuh veleh naupang chu a sawisa ta nghâl a; tichuan, leiah a tlu a, chilphuan tla zawih zawihin a tâl ta awrh awrh mai a.

²¹A pa chu, “Eng chen nge hetianga a awm tawh?” tiin a zâwt a. Ani chuan, “A naupan têt ata a ni.

²²Meiah te, tuiah te amah tiboral tûrin a nam thlu fo ṭhîn; nimahsela, nangin engtin emaw tal i tih theih chuan khawngaih takin mi pui ang che,” a ti a.

²³Isua chuan a hnênah, “I theih chuan â maw! Ringtu tân chuan engkim hi tih theih asin,” a ti a.

²⁴Naupang pa chuan, “Ka ring e. Rinna ka tlâkchham avâng hian min pui ang che,” tiin a au chhuak ta nghâl a.

²⁵Mipui an lo tlân khâwm tup tup chu a hmuhin Isua chuan ramhuai bawlhhlawh chu a hau va, “Nang, ramhuai ṭawngtheilo leh bengngawng, thu ka pe a che, a chhûng ata kha lo chhuak la, lût leh tawh suh,” a ti a.

²⁶Ramhuai chu a au chhuak a, a nghaisak nek hnuin a lo chhuak ta a. Naupang chu thi ang maiin a awm a, mi tam tak phei chuan, “A thi ta a ni,” an ti hial a.

²⁷Isua erawh chuan a kut a chelh a, a kai tho va, a lo ding chhuak ta mai a.

²⁸Isua chu inah a lût a, a zirtîrten, “Engati nge keinin kan hnawh chhuah theih loh le?” tiin a fâlin an zâwt a.

²⁹Ani chuan, “Hetiang hi zawng ṭawngṭaina chauh lo chuan engti dang mahin a hnawh chhuah theih loh,” a ti a.

³⁰Tin, chuta ta chu an chhuak a, Galili ram chu an kal tlang a; chu chu tu ma hriat a duh lo,

³¹a zirtîrte chu thil zirtîr a nei a ni; an hnênah chuan, “Mihring Fapa hi mihringte kutah mantîr a ni dâwn a, an tihlum ang; mahse, an tihhlum hnu ni thum chinah a tho leh ang,” a ti a.

³²Anni chuan a thu sawi chu a ngaihna an hre lo va, amah lah chu an zâwt ngam bawk si lo.

³³Kapernaum chu an lo thleng a, in chhûnga a luh hnu chuan an hnênah, “Kalkawngah khân eng thu-ah nge in inhnial le?” tiin a zâwt a.

³⁴Kawngah chuan, ‘kan zîngah tu nge ropui ber ang?’ tia an lo inhnial avâng khân an ngawi ta reng hlawm a.

³⁵Ani chu a ṭhu tê tê a, Sâwmpahnihte chu a ko va, an hnênah, “Tu pawh hmasa ber nih duh chu hnuhnûng berah an awm tûr a ni, mi zawng zawng rawngbâwltuah an awm bawk tûr a ni,” a ti a.

³⁶Naupang tê a kai a, an zîngah chuan a dintîr, a kuangkuah a, an hnênah,

³⁷“Tu pawh ka hming avânga hetiang naupang tê pakhat pawh lâwm chu kei mi lâwm an ni; tu pawh kei mi lâwm chu kei mi lâwm ni lovin mi tîrtu lâwm an ni zâwk,” a ti a.

³⁸Johana chuan, “Zirtîrtu, tu emaw i hminga ramhuaite hnawt chhuak kan hmu a, kan zînga a zui ve loh che avângin khap kan lo tum asin,” tiin a han hrilh a.

³⁹Isua erawh chuan, “Khap suh u, tu mah ka hminga thil mak ti si-a mi rêl zui nghâl thei an awm lo.

⁴⁰Min dodâl lo chu kan lamṭang an ni ngai e.

⁴¹Thu dik ka hrilh a che u, Krista mi in nih avânga tui in tûr no khat pe apiang che u chuan an lâwm man tûr an chân tawp lo vang.

⁴²“Tu pawh hêng ringtu zînga tê ber pakhat pawh titlu chu, an nghâwngah chhangphut râwtna lung lian pui awrhtîrin tuifinriatah thlâk ni se an tân a ṭha zâwk ang.

⁴³I kutin a tihtlûk che chuan tân mai rawh, kut pahnih neia Gehena mei mit thei lova kal ai chuan piangsuala nunnaa luh i tân a ṭha zâwk.

⁴⁴

⁴⁵I ke pawhin a tihtlûk che chuan tân mai rawh, ke pahnih neia Gehena-a paih nih ai chuan ke bûla nunnaa luh i tân a ṭha zâwk e.

⁴⁶

⁴⁷I mit pawhin a tihtlûk che chuan kher chhuak mai rawh, mit khing hnih neia,

⁴⁸thil lungin a kher rengna hmun leh meiin a kan rengna hmun Gehena-a paih nih ai chuan, mit khing dela Pathian rama luh chu i tân a ṭha zâwk e.

⁴⁹Mi tin meia tih thianghlim an ni dâwn si a.

⁵⁰Chi hi a ṭha e; nimahsela, chi pawh hi da ta se, engin nge in tihal leh ang? Nangmahni ngeiah chi nei ula; tichuan, inngeih dial dial rawh u,” a ti a.