Read Mizo Lushai CHANCHIN ṬHA LUKA ZIAK 1 Bible Online

CHANCHIN ṬHA LUKA ZIAK 1 - Mizo Lushai bible

CHANCHIN ṬHA LUKA ZIAK 1

¹Kan zînga thil lo thleng chanchin, a tîr aṭanga mita hmutute leh thu rawngbâwltuten min hrilh chhâwn ang kha, mi tam takin ziak chhuah an tum ta a;

²chuvângin, Theofil zahawm ber, a bul aṭangin engkim ngun takin keimah ngeiin ka chhui a,

³mumal nei deuhvin ziaksak che ila a ṭha ang ka ti a ni,

⁴an thu zirtîr che kha a dikzia i hriat theih nân.

⁵Judai rama Heroda a lal lai khân Abija pâwla mi puithiam pakhat, a hming Zakaria a awm a; a nupui chu Arona thlah zînga mi a ni a, a hming chu Elizabeti a ni.

⁶An pahnih chuan Pathian mit hmuha mi fel an ni a, sawisêlbova Lalpa thupêkte leh a Dân zawng zawng zâwm mi an ni a.

⁷Nimahsela, Elizabeti chu a chin avangin fa an nei thei lo va, anmahni pawh an upa tawh hle a.

⁸An pâwl rawngbâwl huna Pathian hmaa puithiam hna a thawh ve lai chuan, puithiamte tih dân pângngai angin,

⁹Tempul chhûnga lûta, rimtui hâltu tûr ṭhumvâwra an en chu a chungah a tla a.

¹⁰Rimtui a hâl lai chuan mipui zawng zawng chu pâwnah an ṭawngṭai a.

¹¹Rimtui hâlna maichâm ding lama dingin Lalpa tirh vântirhkoh pakhat a hnênah a rawn inlâr a.

¹²Zakarian a hmuh chuan a phu zawk a, a hlau ta hle a.

¹³Nimahsela vântirhkoh chuan, “Zakari, hlau suh, i ṭawngṭaina chu hriat a ni e. I nupui Elizabeti chuan fapa a hrinsak ang che, a hmingah Johana i sa dâwn nia.

¹⁴Nang lâwmin i hlim ang a, mi tam tak pawh a lo pian avângin an lâwm bawk ang.

¹⁵Lalpa ngaihin mi lian a ni ang a, uain leh zu a in tûr a ni lo va; a nu pum chhûng aṭang rêngin Thlarau Thianghlimin a khat ang a.

¹⁶Israel thlahte zînga mi tam tak chu Lalpa an Pathian lamah a hawi kîrtîr leh ang.

¹⁷Pate chu an fate ngaihsaktîr tûr te, mi tihmawhte chu mi felte rilru put ang pu tûr te, Lalpa tâna mite inpeih tûra lo buatsaih tûrtein Elija thlarau dawn leh a thiltihtheihna neiin Lalpa hmaah chuan a lo kal hmasa dâwn a ni,” a ti a.

¹⁸Vântirhkoh hnênah Zakaria chuan, “Chu chu engtin nge ka hriat chian theih ang? Kei putar ka ni a, ka nupui pawh a upa hle tawh si a,” a ti a.

¹⁹Vântirhkoh chuan, “Kei hi Pathian hmaa ding ṭhîn Gabriela ka nih hi, nangmah be tûr leh chûng thu lâwmawm chu hrilh tûr che-a tirh ka ni.

²⁰Ngai rawh, a hun taka lo thleng ngei tûr thil ka sawite hi i awih lo vei a, a lo thlen tak tak hma chu i ngawi reng ang a, ṭawng pawh i ṭawng thei lo vang,” a ti a.

²¹Mipui chuan Zakaria chu an lo nghâk ṭhuap a. Tempul chhûnga chuti chen chen a awm ta chu mak an ti hle a.

²²A lo chhuah chuan an hnênah eng mah a sawi thei lo va, Tempul chhûngah inlârna a hmu a ni tih an hre ta a; an hnênah zaizirin thu a sawi a, a ṭawng thei ta hauh lo va.

²³A rawngbâwl hun bi a lo kim tâk hnu chuan in lamah a haw ta a.

²⁴Chûng hnu chuan a nupui Elizabeti chuan nau a pai ta a.

²⁵“Mi zînga ka hming chhia chhilh nân Lalpan mi khawngaih a, heti hian mi tihsak ta,” a ti a. Thla nga a inkhûrkhung a.

²⁶A thla ruknaah chuan Galili rama khaw pakhat Nazaret an tiha awm, nula thianghlim pakhat, Davida thlaha mi, Josefa nupui hual hnênah chuan.

²⁷Pathianin vântirhkoh Gabriela chu a tîr a; chu nula hming chu Mari a ni.

²⁸Inah chuan a va lût a, a hnênah, “Chibai, vohbîk, Lalpa i hnênah a awm,” a ti a.

²⁹A thu sawi chuan a timangang ta êm êm a, a chibai bûkna chu eng tihna tak ni ang maw tiin a inngaihtuah a.

³⁰Vântirhkoh chuan, “Mari, hlau suh, Pathian duhsakna i dawng e.

³¹Ngai teh, nau i pai ang a, fapa i hring ang; a hmingah Isua sa ang che.

³²Ani chu mi ropui tak a la ni ang a, Chungnungbera Fapa an ti ang; Lalpa Pathianin a thlahtu Davida lalṭhutthlêngah a ṭhuttîr ang a;

³³Jakoba thlahte chungah chatuanin a lal ang, a ramin kin ni a nei lo vang,” a ti a.

³⁴Mari chuan Vântirhkoh hnênah, “Pasal ka la nei si lo va, engtin nge ni ang?” a ti a.

³⁵Vântirhkoh chuan a chhâng a, “Thlarau Thianghlim chu i chungah a lo awm ang a, Chungnungbera thiltihtheihna chuan a hliahkhuh ang che; chuvângin, nau lo piang tûr chu mi thianghlim, Pathian Fapa an ti ang.

³⁶Tin, ngai teh, i laichînnu, a ching an tih ṭhin, Elizabeti pawhin a tar hnuin mipa a pai ta, tûn thla hi a thla rukna a ni tawh.

³⁷Pathian thuchhuak rêng rêngin tih theih loh a nei lo vang,” a ti a.

³⁸Mari chuan, “Ngai teh, Lalpa bawihnu ka ni, i thu ang chuan ka chungah lo thleng rawh se,” a ti a, vântirhkoh chuan a kalsan ta a.

³⁹Chûng lai chuan Mari chu a tho va, tlângrama Juda-ho khaw pakhat panin a chho ta vang vang a;

⁴⁰Zakaria in a han thlenga, Elizabeti chu chibai a bûk a.

⁴¹Mari chibai bûkna aw chu a hriatin a pum chhûnga nautê chu a lo chê a. Elizabeti chu Thlarau Thianghlimin a khat a, ring takin a au va,

⁴²“Nang hi hmeichhia azawngah i vânnei ber e; i rîla rah pawh a vânnei e;

⁴³Engtizia kher nge ka Lalpa nu ka hnênah i lo kal le?

⁴⁴Ngai teh, i chibai bûkna aw ka hriat veleh a lâwm avângin nautê pawh ka pum chhûngah a che asin.

⁴⁵I hnêna Lalpain thu a sawi kha a thleng ngei dâwn tih i rin avângin i nihlawh e,” a ti a.

⁴⁶Tin, Marin, “Thinlung takin Lalpa ka chawimawi a.

⁴⁷Min chhandamtu Pathian chungah ka lâwm êm êm a ni,

⁴⁸A bawihnu tlâwm tak hi a rawn ngaihsak a. Ngai rawh, tûn chinah chuan ṭhangthar zêl pawhin nihlawh min ti ang.

⁴⁹Thiltitheia khân thil ropui tak min tihsak ta. A hming pawh a thianghlim e.

⁵⁰A khawngaihna chu ṭhang lo thar zêl thlengin Amah ṭihtute tân a dai ngai lâwng.

⁵¹A bânin a chakzia a lantîr a, thinlunga chapote chu a vai darh a,

⁵²An ṭhutthlênga lal ṭhute chu a hnûk thla a, Rethei daikilkâra mite a chawi kâng a.

⁵³Rilṭâmte chu thil tui tinrêngin a hrai tlai a, hausate erawh chu kut ruakin a kaltîr a.

⁵⁴Min thlahtute hnêna a tiam ang khân a chhiahhlawh Israel-te pui tûrin a lo thawk ta.

⁵⁵Abrahama leh a thlahte a khawngaihna kha kumkhuain a hre reng a nih hi,” a ti a.

⁵⁶Mari chu thla thum lai a châm a, a haw leh ta a.

⁵⁷Elizabeti nau hrin chu a lo hun ta a, fapa a hring a.

⁵⁸A ṭhenawmte leh a laichînte chuan Lalpan a khawngaihzia an hriat chuan an lâwmpui hle a.

⁵⁹A ni riat ni chuan nausên serh tan tûrin an lo kal khâwm a, nau hmingah a pa hming vêk, Zakaria, sak an tum a;

⁶⁰mahse, a nu chuan, “Ni lo ve, Johana sak tûr a ni,” a ti a.

⁶¹Anni chuan, “I laichînte zîngah he hming pu hi tu mah an awm hlei nêm,” an ti a.

⁶²A pa chu a hmingah eng nge sak a duh tih zaizirin an zâwt ve a.

⁶³Ani chuan ziakna phêk a han dîl a, “A hming chu Johana a ni,” tiin a ziak a.

⁶⁴An za chuan mak an ti hle a. Chu veleh a ka leh a lei chu phelh a lo ni ta nghâl a. Pathian fakin a lo ṭawng chhuak thei leh ta a.

⁶⁵An ṭhenawm zawng zawng chuan an hlau va, chûng thu chu Judai tlângramah chuan an sawi ta huai huai a.

⁶⁶A hria apiang chuan an ngaihven a. “Chu nau chu engtin tak la awm ang maw!” an ti a. Lalpa pawhin amah a awmpui zêl a.

⁶⁷A pa Zakaria chu Thlarau Thianghlimin a lo khat a, heti hian a ti a:

⁶⁸“Lalpa, Israel-te Pathian chu fakin awm rawh se, A mite tlawhin a rawn tlan ta si a.

⁶⁹A chhiahhlawh Davida chhûngte zîngah Kan tân chhandamtu ropui tak a din ta.

⁷⁰Hmânlai zâwlnei thianghlimte kâa A sawi tawh ang khân.

⁷¹Kan hmêlmate leh min hawtute laka Min humtu tûr chu.

⁷²Min thlahtute a khawngaihzia a tilang a, a thuthlung thianghlim a hre reng a ni.

⁷³Kan pu Abrahama hnênah thu a tiam tlat a, kan hmêlmate laka min chhan a,

⁷⁴Thlaphâng lova a rawng kan bâwla, Kan dam chhûng zawng,

⁷⁵A hmaa thianghlim leh fel taka kan awm a tiam kha.

⁷⁶Mama, nang zawng chungnungbera zâwlnei i ni ang a, Lalpa kawng buatsaihin i kal hmasa dâwn a ni,

⁷⁷An sualte ngaidamin a mite a chhandam tih hriattîr tûrin.

⁷⁸Kan Pathian khawngaihna nasa tak avâng hian chung lam ni chhuak chuan mi rawn tlawh dâwn,

⁷⁹Thih hlau rêng rênga awmte leh thim zînga ṭhute chhun ênga, Thlamuanna kawnga kan kête pêntîr tûrin,” a ti a.

⁸⁰Nausên chu a lo ṭhang lian a, thlarau lamah a lo puitling deuh deuh va, Israel mipui hmuha a rawn lan hma kha chuan thlalêrah a awm reng a ni.