Read Mizo Lushai CHANCHIN ṬHA LUKA ZIAK 10 Bible Online

CHANCHIN ṬHA LUKA ZIAK 10 - Mizo Lushai bible

CHANCHIN ṬHA LUKA ZIAK 10

¹Chumi zawhah chuan Lalpan mi dang sawmsarih a ruat a, an kalna tûr khaw tinah leh hmun tinah lo kal hmasa tûrin pahnih zêlin a tîr a.

²An hnênah, “Buh seng tûr a tam tehlul nên, thawktu lah an tlêm si. Chutichuan, a buh seng tûra mi tîr tûrin buh Neitupa dîl rawh u.

³“Kal ta ula, chinghne zînga berâmno lût angin ka tirh che u hi.

⁴Tangka ip te, iptê te, pheikhawk te keng suh u; kalkawngah tu mah chibai bûk hek suh ang che u.

⁵In thlen in apiangah, ‘He inah hian thlamuanna thleng rawh se,’ ti hmasa zêl ang che u.

⁶Chu inah chuan thlamuanna ngaina mi an lo awm chuan, in thlamuanna thu chu an chungah awm sela, an awm loh erawh chuan in hnênah lo kîr leh rawh se.

⁷Chumi in hlîrah chuan chêng ula, an pêk apiang che u eiin in ang che u, hnathawktu chu hlawh hmu tlâk a ni. In hrang hrangah thleng lâwr suh u.

⁸“Tin, khua in luhna apiangah an lo lawm che u chuan, an hlui che u apiang ei ula,

⁹damlo awmte pawh tidam ula, an hnênah, ‘Pathian ram chu in hnênah a lo thleng ta,’ ti ang che u.

¹⁰In luhna khuaten an lo ngaihsak loh che u chuan, in chhuahsan pahin an kawtlaiah,

¹¹‘In khaw vaivut takngial pawh hi kan kai duh lo ve, kan kephah ata kan vuak fai hi; Pathian ram in hnênah a lo thleng ta tih erawh chu lo hre rawh u,’ in ti dâwn nia.

¹²Ka hrilh a che u. Rorêl ni-ah chuan chu khaw tuar tûr ai chuan Sodom khaw tuar tûr chu a ziaawm zâwk ang.

¹³“Nang Korazin, i chung a pik e. Nang Bethsaida, i chung a pik e; in zînga thil mak tihte kha Tura leh Sidona tih ni sela, saiip puan sina vaivut zîngah ṭhuin an simzia an tilang daih tawh tûr.

¹⁴Rorêlnaah chuan in tuar tûr aiin Tura leh Sidon tuar tûr chu a ziaawm zâwk ang.

¹⁵Nang pawh, Kapernaum, vân thlenga chawisân i ni dâwn êm ni? Mitthi khaw thlenga nam thlâk asin i nih dâwn!

¹⁶“In thu awih chuan ka thu pawh an awih ang, a hnâwl che u chuan kei pawh mi hnâwl a ni; tin, kei mi hnâwltu chuan mi tîrtu pawh a hnâwl a ni e,” a ti a.

¹⁷Sawmsarihte chu hlim takin an lo haw leh a, “Lalpa, ramhuaite pawh i hming avângin kan thu thuin an awm,” an rawn ti a.

¹⁸Ani chuan an hnênah, “Vân ata ṭêk anga Setana tla ṭhuai kha ka lo hmu reng asin.

¹⁹Ngai teh u, rûl te, khawmualkaikuang te, hmêlmapa chakna zawng zawngte rah beh theihna thu ka pêk che u hi, eng mahin a tina hauh lo vang che u.

²⁰Amaherawhchu, thlaraute in thu thu-a an awm avâng hian lâwm suh u, vâna in hming ziak a nih avângin lâwm zâwk rawh u,” a ti a.

²¹Chumi lai tak chuan Thlarau Thianghlimah a lâwm ta êm êm a. “Aw ka Pa, lei leh vân Lalpa, nangin mi fingte leh mi thiamte lakah hêng thu hi i thup tlat a, mi mâwlte hnêna i puan avângin ka fak a che; a ni, ka Pa, chutiang chu ṭha i tih zâwng tak a ni.

²²Ka pain engkim mi kawltîr tawh; Fapa hi tu nge a nih Pa chauh lo chuan tu man an hre lo; Pa pawh chu tu nge a nih, Fapa leh an hnêna Fapain a puan duhnate chauh lo chuan tu man an hre lo,” a ti a.

²³Tin, a zirtîrte lam a hawi a,

²⁴Ka hrilh a che u, zâwlneite leh lal tam takte pawhin in thil hmuhte hi hmuh an lo duh ṭhîn a, an hmu si lo; in ngaihthlâkte hi ngaihthlâk an duh a; mahse, an ngaithla si lo,” a ti a.

²⁵Ṭum khat chu Dânhremi pakhat hi a ding a, amah fiah nân, “Zirtîrtu, chatuan nun nei tûrin eng nge ka tih tûr?” a ti a.

²⁶Ani chuan, “Dân bu-ah eng nge chuang? A eng lai nge in chhiar ziah ṭhin kha?” a ti a.

²⁷Ani chuan, “ ‘Lalpa i Pathian chu i thinlung zawng zawngin, i nunna zawng zawngin, i chakna zawng zawngin, i rilru zawng zawngin i hmangaih tûr a ni; nangmah i inhmangaih angin i vêngte pawh i hmangaih tûr a ni,’ tih hi,” a ti a.

²⁸Isua chuan, “I chhâng dik e, chutiang chuan ti la, i nung ang,” a ti a.

²⁹Ani erawh chuan thiam inchantîr a duh a, Isua hnênah, “A nih leh ka vêngte chu tute nge?” a ti a.

³⁰Isuan a chhâng a, “Mi pakhat, Jerusalem aṭanga Jeriko khuaa kal tûr chu, kawng lakah suamhmanghovin an lo bei a, a silhfênte chu an hlihsak a, an vaw nek a, thi chhâwngin an kalsan ta a.

³¹Chumi kawngah chuan puithiam pakhat a zu kal hlauh va, ani chu a han hmuh chuan a hêl ta mai a.

³²Chutiang bawkin Levia chi mi pakhat pawhin chumi hmun chu a lo thleng a, ani chu a han hmuh chuan a hêl ve ta mai a.

³³Samari mi pakhat zin kal chuan a awmna chu a lo thleng ve a, ani chu a han hmuh chuan a khawngaih ta êm êm a;

³⁴a va pan a, a pemte chu hriak leh uain hnawihin a tuamsak ta a; ama sabengtung chungah a chuantîr a, khualbûkah a kalpui a, a enkawl ta a.

³⁵A tûkah chuan duli pahnih a phawrh a, khualbûk enkawltu chu a pe a, ‘Lo enkawl la, hemi bâka i sên zawng chu ka lo kîr leh hunah ka rawn rûl ang che,’ a ti a.

³⁶“Aw le, chûng mi pathum zînga tu ber chu nge suamhmang tâwktu vêngte nia i rin?” a ti a.

³⁷Ani chuan, “A khawngaihtu chu,” a ti a. Isuan, “Nang pawh chutiang bawk chuan va ti ve rawh,” a ti a.

³⁸An kal pah chuan khaw pakhatah an lût a, hmeichhe pakhat Marthii an tih chuan a lo thleng a.

³⁹Laizâwn pakhat, Mari an tih chu a nei a. Mari chuan Lalpa ke bula ṭhuin a thu a ngaithla a.

⁴⁰Marthii erawh chu ei tûr buatsaihin a indaih lo hle a, a hnênah a lo kal a, “Lalpa, ka laizâwnnuin keimah chauh che tûra mi ring mai hi ṭha i ti em ni? Mi rawn pui se a ṭha lâwm ni?” a ti a.

⁴¹Lalpa chuan a chhâng a, “Marthi, Marthi, ngaihtuah i ngah a, i buai hle tak e; mahse, thil ṭûl tak pakhat a awm.

⁴²Mari chuan chan ṭha a thlang a, chhuhsak tûr a ni lo ve,” a ti a.