Read Mizo Lushai CHANCHIN ṬHA LUKA ZIAK 11 Bible Online

CHANCHIN ṬHA LUKA ZIAK 11 - Mizo Lushai bible

CHANCHIN ṬHA LUKA ZIAK 11

¹Vawi khat chu hmun pakhatah a ṭawngṭai a. A han bân chuan a zirtîrte zînga pakhatin a hnênah, “Lalpa, Johanan a zirtîrte ṭawngṭai dân a zirtîr ang khân min zirtîr ve ta che,” a ti a.

²An hnênah chuan, “In ṭawngṭaiin heti hian ti ang che u: ‘Kan Pa, I hming zahin awm rawh se, I ram lo thleng rawh se,

³Ni tin ei tûr chaw min pe ang che,

⁴Kan sualte min ngaidam la, Keini pawhin kan chunga tisual apiang kan ngaidam ṭhîn. Thlêmnaah min hruai lût suh ang che,’ tiin,” a ti a.

⁵An hnênah, “In zînga mi pakhatin ṭhian nei sela, zânlaiah a hnêna va kalin, ‘ṭhiana, chhang tlang thum min pûktîr teh,

⁶ka ṭhian zinin mi rawn tlawh thut a, a hmaa hlui tûr eng mah ka nei lo,’ va ti sela,

⁷in chhûnga mi chuan, ‘Mi rawn tibuai suh, tûnah zawng kawng pawh kan kalh diam tawh a, ka fate nên khumah kan mu tawh, thovin ka rawn pe thei lo che,’ tihsan sela;

⁸ka hrilh a che u, a ṭhian a nih avângin thovin va pe lo mah se, a dîl ngut ngut avângin thovin a duh zât zât a pe ang.

⁹“Chutichuan, ka hrilh a che u, dîl ula, pêk in ni ang; zawng ula, in hmu ang; kik ula, hawnsak in ni ang.

¹⁰A dîl apiangin an dawng ṭhîn, a zawng apiangin an hmu bawk ṭhîn. Tu pawh a kik chu an hawnsak dâwn a ni.

¹¹In zînga pa, a fapain sangha dîl sela, tu nge sangha aiah rûl pe ang?

¹²Artui aiah pawh tuin nge khawmualkaikuang pe ang?

¹³Chutichuan, nangni mi sual mahin in fate thil ṭha pêk nachâng in hriat si chuan, in Pa vâna mi chuan a dîltute chu Thlarau Thianghlim a va pe dâwn êm!” a ti a.

¹⁴Ramhuai ṭawngtheilo pakhat hi a hnawt chhuak a, ramhuai chu a lo chhuah hnu chuan ṭawng thei lo chu a lo ṭawng thei ta a, mipui chuan mak an ti hle a.

¹⁵An zînga ṭhenkhat chuan, “Ramhuai lal Belzebula vâng alâwm ramhuaite a hnawh chhuah le,” an ti a.

¹⁶A ṭhen erawh chuan amah fiah nân vân ata chhinchhiahna thil mak entîr an phût a.

¹⁷Ani chuan an tih chhan a lo hria a, “Khawii ram pawh mahni indo chu an ṭiau ṭhîn: chhûngkua pawh mahni indo chu a kehchhe ṭhîn.

¹⁸Setana pawh mahni a indo chuan engtin nge a ram chu a din theih ang? Belzebula vângin ramhuaite hnawt chhuakah min puh si a.

¹⁹Keiin Belzebula vângin hnawt chhuak ni ila, in mite khân tu vângin nge ramhuai an lo hnawh chhuah ṭhin? Tichuan, anni khân asin thiam loh chantîr zâwk dâwn che u.

²⁰Pathian kut avânga ramhuai hnawt chhuak ka nih si chuan in hnênah Pathian ram chu a lo thleng ta tihna a ni.

²¹“Mi chak chuan hriam famkim nên a in a vên chuan, a sum chu a him ṭhîn;

²²amaherawhchu, a aia chak zâwkin a rawn beiha, a rawn hneh chuan, a rin chhan râlthuam chu a chhuhsak ang a, a sum pawh a lâksak ang a, a duh duhin a sem darh mai ang.

²³Ka lama ṭang lo tawh phawt chuan mi do a ni, mi lâk khâwmpui lo chuan a tidarh a ni.

²⁴“Thlarau bawlhhlawh chu mi kawchhûng ata a chhuahin chawlhhmun zawngin tui awm lohna hmunahte a vâk a vâk a; mahse, a hmuh loh avâng chuan, ‘Ka in, ka chhuahsan tâkah khân ka kîr leh mai teh ang,’ a ti a.

²⁵Tin, a va thlen chuan phiah faia tihfel diamin a va hmu a.

²⁶Tichuan, a kal a, a aia sual hlîr thlarau dang pasarih a hruai a, an lo lût a, tah chuan awmhmun an khuar ta a; chu mihring awmze hnuhnûng zâwk chu a hmasa aiin a lo chhe daih ṭhîn a ni,” a ti a.

²⁷Chûng thu chu a sawi laiin mipui zînga nu pakhat a lo au chhuak a, “I paina pum chu a nihlawh e, i hnute hnêk pawh,” a ti a.

²⁸Ani erawh chuan, “A ni, mahse, Pathian thu hriaa zâwmte hi mi nihlawh an ni zâwk e,” a ti a.

²⁹Tin, mipui an lo pung khâwm chiam a, Isuan, “Tûnlai mite hi sual tak an ni; chhinchhiahna thil mak an phût a, Jona chhinchhiahna chauh lo chu chhinchhiahna thil mak rêng entîr an ni lo vang;

³⁰Jona chu Ninevi mite tân chhinchhiahna a ni ang khân, Mihring Fapa hi tûnlai mite tân chhinchhiahna a ni ang.

³¹“Chhim lam lalnu kha Rorêl ni-ah chuan tûnlai mite rual hian a tho ve ang a, thiam loh a chantîr ang: Solomona finna ngaithla tûr mahin kâwlkil ata a lo kal si a; ngai teh u, Solomona aia ropui zâwk hetah hian a awm asin.

³²Ninevi mite chu Rorêl ni-ah tûnlai mite nên hian an ding za ang a, thiam loh an chantîr ang. Jona thu hril avângin an sim si a; ngai teh u, Jona aia ropui zâwk hetah hian a awm a ni.

³³“Tu man an khâwnvâr hâl chu hmun biru takah an dah ngai lo va, khovin an khuh ngai hek lo, a lo lûtten khua an hmuh theih nân a dahnaah an dah zâwk ṭhîn.

³⁴“I mit hi i taksa tân khâwnvâr ang a ni; i mit a dik chuan i taksa pum chu a êng vek ang, a dik loh erawh chuan i pumin a thim vek ang.

³⁵Fîmkhur rawh, nangmaha êng awm chu thim a lo ni hlauh dah ang e.

³⁶Thim lai awm lova, i taksa pum a ên vek erawh chuan khâwnvâr êngin a chhun êng che ang hian i pumin i êng ang,” a ti a.

³⁷Chûng thu a sawi lai chuan Farisai pakhatin chaw eiah a sâwm a; tichuan, a zui lût a, chaw chu a kîl ta a.

³⁸Farisai chuan chaw ei dâwna kut a sil lo chu mak a ti hle a.

³⁹Lalpa chuan a hnênah, “Nangni Farisai-te hian no leh thlêng pâwn lam in sil fai ṭhîn tak a, in chhûng lam erawh chu duhâmna leh suahsualnain a khat si a.

⁴⁰In va â êm! Pâwn lam siamtuin chhûng lam pawh a siam a ni lâwm ni?

⁴¹No leh thlêng chhûnga thil awm chu mi rethei pe ula chuan, in tân engkim a thianghlim mai tûr.

⁴²“A ni, nangni Farisai te u, in chung a pik e; lêngmasêr te, pudina te leh thlai tinrêng sâwma pakhat in pe ṭhîn, dik taka tih leh Pathian hmangaih erawh chu in ngaihthah si ṭhîn; chu chu asin in tih ngei ngei tûr chu, a dangte pawh khi tih ṭhulh chuang lovin.

⁴³Nangni Farisai-te u, in chung a pik e, sunagog-a ṭhutna hmasa berte leh dâwr hmuna chibai bûk te in ngaina si ṭhîn a.

⁴⁴In chung a pik e, thlân tih hriat loh, a chunga hre lova mi an kal ṭhinna ang hi in ni e,” a ti a.

⁴⁵Dânhremi pakhat chuan, “Zirtîrtu, hêng thu i sawi hian keini pawh min dem tel a nih hi,” tiin a lo chhâng a.

⁴⁶Ani chuan, “Dânhremite u, nangni pawh in chung a pik e; phur hrehawm tak tak mite in bel ṭhîn a, nangniho lah chuan in kutzungṭang tê pawhin in khawih duh si lo.

⁴⁷In chung a pik e, in pate thah zâwlneiho thlân inte in sa a;

⁴⁸in thlahtute thil tih chu in hriatpui a, in remtihpui tihna a ni; annin a thah an tum a, nangnin an thlân in sak in tum a.

⁴⁹Chuvângin alâwm, Pathian Finna bu-ah pawh, ‘An hnênah zâwlneite leh tirhkohte ka tîr ang, a ṭhen an that ang a, a ṭhen an tiduhdah ang,’ tih ziak a nih kha.

⁵⁰Chutichuan, Abela thah aṭanga maichâm leh Hmun Thianghlim inkâra Zakaria thah thleng khân, leilung pian tirh aṭanga zâwlnei zawng zawng thah thisen phuba chu tûnlai mite chungah hian lâk tûr a ni.

⁵¹A ni, ka hrilh a che u, tûnlai mite chungah hian phuba chu lâk a ni dâwn.

⁵²Nangni Dânhremite u, in chung a pik e, Finna chabi chu in kawl bo daih a, nangni lah lût duh si lovin, a lût tûrte in khap bawk si,” a ti a.

⁵³Chuta ṭang chuan a chhuak a, Dân zirtîrtute leh Farisai-te chuan an tai ṭan ta a; thu tam tak an zâwt sek a,

⁵⁴a ṭawng sual palh man tumin an châng ta reng a ni.