Read Mizo Lushai CHANCHIN ṬHA LUKA ZIAK 13 Bible Online

CHANCHIN ṬHA LUKA ZIAK 13 - Mizo Lushai bible

CHANCHIN ṬHA LUKA ZIAK 13

¹Chutih lai tak chuan tute emaw an lo kal a, Galili rama mi, Pathian be lai, an inthawina ran thisen leh an thisen inpawlh nuaia Pilatan a thah thu an rawn hrilh a.

²Isuan a chhâng a, “Chûng Galili mite chu, chutiang thil an tuar avângin Galili mi dang zawngte aia sual bîk niin in ring êm ni?

³Sual bîk suh e, ka hrilh a che u, nangni pawh in sim loh chuan chutiang bawkin in boral ve ang.

⁴A nih leh, Siloam in sângin a delh hlum mi sâwm leh pariatte pawh kha, Jerusalem-a chêng zawngte aia sual bîk niin in ring êm ni?

⁵Sual bîk suh e, ka hrilh a che u, nangni pawh in sim loh chuan chutiang bawkin in boral ve ang,” a ti a.

⁶He tehkhin thu hi a sawi bawk a: “Mi pakhatin grep huanah theipui kûng khat a phun a, a rah a zawng ṭhîn a, pakhat mah a hmu ngai lo va.

⁷Grep huanpu hnênah chuan, ‘En teh, kum thum zet he theipui rah hi ka zawng tawh a, ka hmu ngai lo. Hmun a awh mai mai a ni lâwm ni? Kit mai rawh,’ a ti a.

⁸Ani chuan, ‘Ka pu, kumin tal hi chu awm leh teh se, a vêlin ka lai ang a, êk dûrin ka vûr rih ang e;

⁹a rah tâk leh a ṭha ang a, a rah loh leh kit mai ang che,’ a ti a,” tiin.

¹⁰Sabat vawi khat chu sunagog pakhatah mi a zirtîr a.

¹¹Hmeichhe pakhat, kum sâwm leh pariat thlarau sualin a tihnat tawh a lo awm a, a kun reng a, a ding char thei tawh hauh lo va.

¹²Isuan ani chu a han hmuhin a ko va, “Hmeichhia, i natna chuan a thlah ta a che,” a ti a.

¹³A chungah chuan a kut a nghat a, a ding char thei ta nghâl a. Pathian a fak ta a.

¹⁴Isuan sabat nia mi a tihdam avâng chuan sunagog hotu chu a thinur hle a, mite hnênah chuan, “Hna thawhna tûr ni ruk a awm a, chumi chhûngin lo kal ula, intidam ta che u, sabat ni ber kher ni lovin,” a ti a.

¹⁵Lalpa erawh chuan an hnênah, “Nangni vervêkte u, sabat ni pawha mahni sebâwng emaw, sabengtung emaw phelha, a thlunna hmun ata tui in tûra hruai chhuak lo tu nge awm che u?

¹⁶He nu pawh hi Abrahama fanu a ni si a. Setanan kum sâwm leh pariat zet a lo phuar tawh a, chu phuarna chu sabat ni pawhin phelhsak tûr a ni dâwn lâwm ni?” a ti a.

¹⁷Chûng thu chu a han sawi chuan a hmêlmate chu an zak hle a, mipui erawh chu a thiltih ropui takte avâng chuan an lâwm a.

¹⁸Chutichuan, ani chuan, “Pathian ram chu eng ang nge ni?

¹⁹Anṭam chi fang khat miin a lâka, huana a theh ang hi a ni; a lo ṭiak a, thing a lo ni a, chunglêng savate a zârah an riak ṭhîn,” a ti a.

²⁰“Pathian ram chu eng nên nge ka han tehkhin leh ang?

²¹Dawidim hmeichhiain a lâka, chhangphut fawng thum zînga a zavaia fan chhuak vek tûra a phul ang chu a ni,” a ti a.

²²Ani chuan zirtîr chung zêlin Jerusalem a pan a, khaw lian leh khaw tête a tlawh zêl a.

²³Tu-in emaw, “Lalpa, chhandamte chu an tlêm hle elo?” a ti a.

²⁴Ani chuan an hnênah, “Kawngka zîmah chuan luh tum hrâm rawh u; ka hrilh a che u, mi tam takin luh an tum ang a, an thei lo vang.

²⁵In neitupa a thawha, kawng a kalh tawh hnu chuan, nangnin pâwna dingin, ‘ka pu, kawng min hawn rawh,’ tiin va kik mah ula, ani chuan, ‘Khawi lama mi nge in nih ka hre lo va che u,’ tiin a lo chhâng dah ang che u.

²⁶Nangnin, ‘I hovin kan eia kan in ṭhin kha, kan kawtthlêrahte pawh i zirtîr ṭhin kha,’ in la ti ang a;

²⁷ani erawh chuan, ‘Ka hrilh a che u, khawi lama mi nge in nih ka hre lo a che u; nangni thil sual ti zawng zawngte u, ka hnên ata kal bo vek rawh u,’ a la ti ang che u.

²⁸Nangni pâwna paih chhuah in ni ang a, Abrahama te, Isaka te, Jakoba te leh zâwlnei zawng zawngte Pathian ram chhûnga awm in hmu si ang a, chutih hunah chuan in ṭap ang a, ha in ṭhial ang.

²⁹Tin, chhak leh thlang, chhim leh hmâr aṭangin mi an lo kal ang a, Pathian ram ruai chu an rawn kîl ang.

³⁰Ngai teh u, hnuhnûng berte pawh la hmasa ber tûr an awm a, hmasa berte pawh la hnuhnûng ber tûr an awm,” a ti a.

³¹Chutih lai tak chuan Farisai ṭhenkhat an lo kal a, a hnênah, “Chhuak la, heta ta hi kal bo teh, Herodan tihhlum che a tum a ni,” an rawn ti a.

³²Ani chuan an hnênah, “Chu sihal chu heti hian va hrilh rawh u, ‘Ngai rawh, vawiin leh naktûkah hian ramhuaite ka hnawt chhuakin nâte pawh ka tidam ang a, ni thum ni-ah ka zo vang, a ti,’ tiin.

³³Eng pawh ni se, vawiinah nên, naktûkah nên, a tûk leh thlengin ka ti zêl tûr a ni; Jerusalem pâwn lamah zâwlnei thih theih a ni lo ve.

³⁴Aw, Jerusalem, Jerusalem, zâwlneite thattu, i hnêna tirhte lunga lo dêng hlumtu! Arpuiin a note a thla hnuaia a awp khâwm angin i fate vawi eng zât nge awp khâwm ka tuma, in duh loh kha?

³⁵Ngai teh u, in in chu rauhsan a ni ta. Ka hrilh a che u, ‘Lalpa hminga lo kal chu fakin awm rawh se,’ in tih hma chuan mi hmu leh tawh lo vang,” a ti a.