Read Mizo Lushai CHANCHIN ṬHA LUKA ZIAK 14 Bible Online

CHANCHIN ṬHA LUKA ZIAK 14 - Mizo Lushai bible

CHANCHIN ṬHA LUKA ZIAK 14

¹Sabat vawi khat chu Farisai-te zînga hotu lian pakhat inah chaw ei tûrin a kal a, an lo enthla reng a.

²Tin, ngai teh, a hmaah chuan damlo pakhat, vûng hi a awm a.

³Dân hremite leh Farisai-te chu a bia a, “Sabat ni hian tihdam a thiang nge thiang lo?” a ti a.

⁴Anni erawh chu an ngawi reng a. Ani chuan dam lo chu a chelh a, a tidam a, a kaltîr ta a.

⁵Anni chu a bia a, “Nangni zîngah in fapa emaw, sebâwng emaw tuichhunchhuahah tla sela, sabat ni pawhin tu nge la chhuak var lo vang che u?” a ti a.

⁶Chu pawh chu an chhâng thei lo bawk a.

⁷Chaw eia sâwm vete chuan ṭhutna ṭha ṭha an chuh zêl tih a hmuh chuan an hnênah tehkhin thu a sawi ta a.

⁸“Tu-in emaw lawichaw eiah a sâwm che u chuan, ṭhutna ṭha berah ṭhu suh ang che u; in aia mi lian a lo sâwm ve hlauh ang a,

⁹a sâwmtu chuan, ‘He mi ṭhutna tûr hi kian rawh,’ a rawn tih mai che u chuan zak takin ṭhutna ṭha lo berah in ṭhu mai tûr a nia.

¹⁰An sâwm che chuan ṭhutna ṭha lo berah ṭhu ang che; chutichuan, a sâwmtu che chu a lo kal ang a, i hnênah, ‘ṭhiana, lo ṭhu chho rawh khai,’ a ti ang a, chaw kîlpuite mit hmuhah chawimawiin i awm ang.

¹¹Inngaihlu apiang an tlâwm ang a, inngaitlâwm apiang chawimawiin an awm ang,” a ti a.

¹²Amah sâwmtu hnênah pawh chuan, “Chhûnah emaw, zânah emaw ruai i ṭhehin i ṭhian te, i unau te, i laichîn te leh i vêng hausa te chu sâwm suh ang che; chuti lo zawng an sâwm ve leh ang chia, an rûl leh kher dah ang che.

¹³Ruai i ṭheh hun chuan pachhia te, piangsual te, kebai te, mitdel te sâwm zâwk ang che;

¹⁴tichuan, malsâwmna i dawng ang, rulh vena tûr che an nei dâwn si lo va; mi felte thawhlehnaah chuan rulh leh i ni dâwn nia,” a ti bawk a.

¹⁵A chaw kîlpui pakhat chuan chu chu a hriatin a hnênah, “Pathian rama ruai ṭheh tûra chu a va nihlawh êm!” a ti a.

¹⁶Ani erawh chuan a chhâng a, “Mi tuin emaw zanriah ropui tak a buatsaih a, mi tam tak a sâwm a.

¹⁷A ei hun chuan a mi sâwmte hnênah, ‘Lo kal rawh u le, tûnah engkim peih a ni ta,’ ti tûrin a bawih a tîr a.

¹⁸An za chuan inthurual ang maiin an lo pha ṭheuh va.

¹⁹A hmasa ber chuan, ‘Lo ka lei a, a enin ka kal a ṭûl a ni; khawngaih takin mi han phatsak ang che,’ a ti a.

²⁰Mi dangin, ‘Sebâwng tuak nga ka lei a, enfiah tûrin kal ka lo tum a; khawngaih takin mi han phatsak ang che,’ a ti a. Mi dangin, ‘Nupui nei hlim ka ni a; chuvângin, lo kal thei ka ni lo ve,’ a ti a.

²¹Tin, bawih chu a hâwng a, chûng thu chu a pu a hrilh a. In neitupa chu a thinur ta a, bawih hnênah chuan, ‘Chhuak thuai la, kawtthlêrah te, kâwmkârah te kal la, pachhia te, piangsual te, mitdel te, kebai te hetah han hruai lût rawh,’ a ti a.

²²Tin, bawih chuan, ‘Ka pu, i thupêk ang khân tih a ni tawh a; mahse, hmun ruak a la awm ta fo mai,’ a ti a.

²³A pu chuan a hnênah ‘Chhuak leh la, lamlianah te, daiah te kal la, ka in khah nân mi han hruai lût hrâm rawh.

²⁴Ka hrilh a che, mi ka sâwmte pakhat mah khân ka ruai an ei lo vang,’ a ti a,” a ti a.

²⁵Tin, a rual chuan mipui nasa tak an kal ve a, a han lehhawi a, an hnênah,

²⁶“Ka hnêna lo kal apiang chuan an pa te, an nu te, an nupui te, an fa te, an unau te, an farnu te, leh, anmahni nun lam pawh an hawisan si loh chuan ka zirtîr an ni thei lo vang.

²⁷Mi zui duha mahni kraws pu si lo chu ka zirtîr an ni thei hek lo vang.

²⁸“In zînga mi hian in sâng sak tum sela, sak zawhna tûr sum a neih dâwn leh dâwn loh tu nge chhût hmasa tê tê lo vang?

²⁹Lungphûm dah zet si-a, a sak zawh theih si loh chuan, a en apiangin,

³⁰‘He pa hian a rel uaih a, a sa zo leh thei si lo,’ tiin an nuihzat ang asin.

³¹“Tin, lal pawh, lal dang do tûrin chhuak dâwn se, ṭhu-a, sipai sîng hnih nêna rawn bei tûr chu sipai sîngkhat nên a lo beih ngam dâwn leh dâwn loh tu nge ngaihtuah hmasa tê tê lo vang?

³²A beih ngam dâwn loh chuan hla fea an la awm laiin inremna sawi tûrin palai a tîr ngei ang.

³³Chutiang bawkin nangni zînga mi pawh neih zawng zawng kalsan vek lo apiang chu ka zirtîr an ni thei lo vang.

³⁴“Chi hi a ṭha e; nimahsela, chi chu da ta ang se, engin nge an tihal leh ang?

³⁵Lei tih ṭhat nân a tlâk loh vang a, êk dûra pawlh tlâk a ni hek lo vang a; paih ringawt tûr a ni mai. Ngaihthlâkna beng nei chuan ngaithla ngun rawh se,” a ti a.