Read Mizo Lushai CHANCHIN ṬHA LUKA ZIAK 15 Bible Online

CHANCHIN ṬHA LUKA ZIAK 15 - Mizo Lushai bible

CHANCHIN ṬHA LUKA ZIAK 15

¹Vawi khat chu chhiahkhawntute leh mi sual tam takin a thu ngaihthlâk tumin an rawn pan a.

²Farisai-te leh Dân zirtîrtute chuan, “He pa hian mi sualte a kâwm a, chaw te pawh a eipui ṭhîn,” tiin an phunnawi a.

³Ani chuan an hnênah he tehkhin thu hi a sawi a,

⁴“Nangni zîngah tuin emaw berâm za neiin, an zînga pakhat bo ta sela, phûlah sawmkua leh pakua te chu hnutchhiahin, a bo chu a hmuh leh hma chu tu nge zawng lo vang?

⁵A hmuh leh chuan lâwm takin a kokiah a pu ang a,

⁶in a va thlen chuan a ṭhiante leh a ṭhenawmte a ko khâwm ang a; ‘Ka berâm bo kha ka hmu leh ta, hawh u, i lâwm ang u,’ a ti ang.

⁷Ka hrilh a che u, chutiang bawkin mi fel sawmkua leh pakua sim chuan tûr nei lote chungah ai chuan mi sual pakhat sim chungah vâna mite lâwmna a nasa zâwk a ni.

⁸“Tin, hmeichhia tu pawh duli sâwm neiin pakhat chu hloh ta se, khâwnvâr hâla hmun phiatin, a hmuh leh hma chu tu nge ngun taka zawng lo vang?

⁹A hmuh leh chuan a ṭhiante leh a ṭhenawmte chu a ko khâwm ang a, ‘Ka duli hloh ka hmu leh ta e, hawh u, i lâwm ang u,’ a ti ang.

¹⁰Ka hrilh a che u, chutiang bawkin Pathian vântirhkohte zîngah chuan mi sual pakhat sim chungah lâwmna a nasa ṭhîn,” a ti a.

¹¹A sawi zêl a, “Mi pakhat hian fapa pahnih a nei a;

¹²a naupang zâwk chuan a pa hnênah, ‘Ka pa, ka ro chan ai chu mi pe rawh,’ a ti a. Tichuan, a sum chu an hnênah a sem ta a.

¹³Tin, ni rei lo tê-ah a fapa naupang zâwk chuan a chan ai zawng zawng chu a la khâwm vek a, ram dang hla takah a kal ta a; chutah chuan nuam tâwlin a intlakral ta mai mai a.

¹⁴A sum neih a deh ral vek hnuin chu ramah chuan ṭâm nasa tak a lo tla a, ei tûr a tlachham ta a.

¹⁵Tichuan, chumi rama chêng mi pakhat a bêl ta a, ani chuan a lo lamah vawk rual enkawl tûrin a tîr a.

¹⁶Tin, vawk chawte chu ei tak a nâp a, tu man ei tûr an pe si lo.

¹⁷“Tin, a han inhriat chhuah veleh, ‘Ka pa hlawhfate ei sên loh nei an tam tehlul vei nên, kei lah hetah rilṭâmin ka thi mai dâwn si a.

¹⁸Ka tho vang a, ka pa hnênah ka kal ang a, a hnênah, ‘Ka pa, vâna mi chungah leh i chungah ka lo tisual ta a ni e.

¹⁹I fapaa vuah tlâk ka ni ta lo, i hnêna inhlawhfa pakhat angin mi chhawr ve rawh, ka ti ang,’ a ti a.

²⁰“Tichuan, a tho va, a pa hnênah a kal ta a. Hla taka a la awm laiin a pa chuan a lo hmu a, a khawngaih ta êm êm a, a tlân a, a va pawm a, a fâwp ta ngawih ngawih a.

²¹A fapa chuan, ‘Ka pa, vâna mi chungah leh i chungah thil ka tisual a ni e, i fapaa vuah tlâk ka ni ta lo,’ a ti a.

²²A pa erawh chuan a bawihte hnênah, ‘Kawr ṭha ber kha han la thuai ula, hâktîr rawh u, zungbun buntîr ula, pheikhawk pawh buntîr rawh u;

²³bâwngno châwmthau kha han kai ula, talh rawh u; hlim takin ruai i ṭheh ang u.

²⁴He ka fapa hi a thi a, a lo nung leh ta a; a bo va, kan hmu leh ta a nih hi,’ a ti a. Tichuan, hlim takin an awm ṭan ta a.

²⁵“A fapa upa zâwk chu lovah a feh a, a lo haw a, in a thlen dâwn chuan thil tum ri leh lâm thâwm chu a hre ta a.

²⁶Chhiahhlawh pakhat a ko va, ‘Chu, eng nge ni ta?’ tiin a zâwt a.

²⁷Ani chuan, ‘I nau a lo hâwng a, dam taka a hmuh leh avângin i pain bâwngno châwmthau a talh a ni,’ a ti a.

²⁸Tichuan, a thinur a, inah chuan a lût duh ta lo va. A pa chu a va chhuak a, a rawn thlêm a.

²⁹A pa chu a chhâng a, ‘Ngai rawh, kumkhaw hei leh chen sal chhawrin mi chhawr a, i thupêk lah ka awih lo ngai hek lo; chuti chung pawhin ka ṭhiante nêna intihhlimna tûr kêltê takngial pawh mi pe ngai si lo.

³⁰Nimahsela, he i fapa, nawhchizuarte hnêna i sum khawhral vektu hi a lo hâwng a, bâwngno châwm thau i lo talhsak si,’ a ti a.

³¹“Tin, ani chuan a chhâng a, ‘Ka fapa, ka hnêna awm reng i ni a, ka neih zawng zawng hi i ta alâwm.

³²He i nau, thi tawh kha a lo nung leh ta a ni, a bo tawh kha kan hmu leh ta a nih hi; hlim tak leh lâwm taka awm tûr rêng alâwm,’ a ti a,” a ti a.