Read Mizo Lushai CHANCHIN ṬHA LUKA ZIAK 16 Bible Online

CHANCHIN ṬHA LUKA ZIAK 16 - Mizo Lushai bible

CHANCHIN ṬHA LUKA ZIAK 16

¹Tin, a zirtîrte hnênah chuan, “Mi hausa pakhatin sum enkawltu a nei a, chu mi chuan a sum a khawhralsak mai mai a ni tiin, a hnênah an hêk a.

²Tichuan, ani chu a ko va, ‘I chungchâng thu ka hriat hi engtizia nge? I sum enkawl ziakna bu chu han la rawh; sum enkawltuah i ṭang thei tawh lo vang,’ a ti a.

³Chu sum enkawltu chuan a rilruin, ‘Ka puin sum enkawltu ka nihna mi bân dâwn hi, engtin nge ka tih ang? Lei laih ka peih si lo, kut dawh lah ka zak si.

⁴Sum enkawltua mi bân huna miten an ina mi awmtîr theih dân tûr ka hre ta,’ a ti a.

⁵Tichuan, a pu leibatute chu pakhat khatin a ko va, a hmasa ber hnênah chuan, ‘Ka pu hnênah eng zât nge i bat?’ a ti a. Ani chuan, ‘Hriak ṭîn za,’ a ti a.

⁶Ani chuan, ‘I ziakna lehkha hi la la, ṭhu la, sawmnga tih ziak rawh,’ a ti a.

⁷Mi dang hnênah, ‘Nang eng zât nge i bat kha?’ a ti a. Ani chuan ‘Buh ṭîn sânghnih leh zahnih leh sawmnga’ a ti a. Ani chuan, ‘I ziakna leh kha hi la la, ṭîn sâng khat leh zariat tih ziak rawh,’ a ti a.

⁸A pu chuan sum enkawltu sual fin thiamzia chu a fak ta a, êng fate aiin tûnlai mite hi khawvêl thilah chuan an fing zâwk a ni.

⁹“Ka hrilh a che u, khawvêl sum lem hian in tân ṭhian siam rawh u; sum a ral hnuah chatuan rama lawm luh in ni thei ang.

¹⁰Tlêm te chunga rinawm chu tam tak chungah pawh a rinawm ṭhîn; tlêm tê chunga rinawm lo chu tam tak chungah pawh a rinawm ṭhîn lo.

¹¹Khawvêl sum chungah mah in rinawm loh chuan, tu nge sum tak chu kawltîr ngam ang che u?

¹²Mi dang ta chungah mah rinawm lo chu, in ta tûr ngei pawh tu nge pe ang che u?

¹³Chhiahhlawh tu mahin hotu pahnih rawng an bâwl kawp thei lo; pakhat huain pakhat an duh emaw a ni ang a; a nih loh leh pakhat chu an ngaina ang a, pakhat an hmusit ang. Pathian rawng leh sum rawng in bâwl kawp thei lo ve,” a ti a.

¹⁴Farisai, tangka ngaihlututen chûng thu chu an hriatin Isua chu an nuihzat a.

¹⁵An hnênah, “Mi mit hmuha mi fel anga lang mai in ni e; mahse, Pathianin in rilru chhûng a hre si a. Mihringte ngaihsân hi Pathian hmuha tenawm a ni.

¹⁶Johana a lo kal hma zawng kha chuan Dân leh zâwlneite thu kha hman tûr a ni a; chuta chinah erawh chuan Pathian ram Chanchin Ṭha hril a ni a, mi tinin luh tumin an bawh ta huai huai a ni.

¹⁷Nimahsela, Dân thu pakhat tê pawh a bo ai chuan lei leh vân boral hi a awl zâwk ang.

¹⁸“Nupui maa, mi dang nei tawh phawt chu an uire a ni, mi nupui mâk hnu nei apiang pawh an uire a ni.

¹⁹“Mi hausa deuh pakhat hi a awm a, puan senduk leh puan zai sîn a inbel a, ni tin nuamsa takin a awm ṭhîn a.

²⁰A kawngkapui bulah chuan mi rethei tak pakhat, a hming Lazara, pân bawm khah lûk chu an muttîr ṭhîn a;

²¹mi hausa dawhkân ata ei nawi tlate chu ei a châk a, uite lah chuan a pân an rawn liahsak ṭhîn a.

²²Mi rethei chu a thi a, Abrahama ângchhûngah vântirhkohten an kalpui ta a. Mi hausa pawh chu a thi a, an phûm a.

²³Mitthi khuaah hrehawm tak a tuar a; a han vânvadâk a; hla takah, Abrahama chu, a ângchhûnga Lazara awm nên, a han hmu a.

²⁴Tin, a au va, ‘Ka pa Abraham, mi khawngaih la, Lazara kha, a kut zung hmâwr tuiah chiah se, ka lei tidai tûrin han tîr teh, he meialhah hian ka na êm êm a ni,’ a ti a.

²⁵“Abraham erawh chuan, ‘Ka fapa, nangin, i dam laiin thil ṭha hlîr i chang a, chutiang bawkin Lazaran thil ṭha lo hlîr a chan kha hre reng ta che; tûnah zawng ani chu thlamuang takin hetah a awm ta a, nang zawng i na a nih kha.

²⁶Chu lo rêngah, heta ṭanga nangni hnêna kal tumte emaw, kha lam aṭanga kan hnên lama lo kal tumte emaw, an kal kai theih loh nân leikak nasa tak kan inkârah a awm a ni,’ a ti a.

²⁷Ani chuan, ‘A nih leh, ka Pa, ani chu ka pa inah kaltîr tûr talin ka ngên a che.

²⁸Pianpui mipa panga ka nei a, he na tuarna hmunah hian an lo kal ve dah ang e, ṭhahnemngai takin hrilh teh se,’ a ti a.

²⁹Abrahama chuan, ‘Mosia leh zâwlneite an nei alâwm, an thu ngaithla ang hmiang,’ a ti a.

³⁰Ani chuan, ‘Ka Pa Abraham, ni lo ve, mitthi zînga mi meuh an hnênah kal sela an sim ang,’ a ti a.

³¹Ani chuan, ‘Mosia leh zâwlneite thu an awih loh chuan, mitthi zînga mi meuh tho leh thu pawh an awih chuang lo vang,’ a tihsan a,” a ti a.