Read Mizo Lushai CHANCHIN ṬHA LUKA ZIAK 17 Bible Online

CHANCHIN ṬHA LUKA ZIAK 17 - Mizo Lushai bible

CHANCHIN ṬHA LUKA ZIAK 17

¹Tin, a zirtîrte hnênah, “Tlûknate hi awm lo thei a ni lo; nimahsela, a awmtîrtu chung chu a pik e.

²Hêng mi tête zînga pakhat pawh hi a tihtlûk ai chuan chhangphut râwtna lung lian pui a nghâwngah awrhtîra, tuifinriata thlâk ni se a tân a ṭha zâwk ang.

³“Fîmkhur rawh u, i unauvin i chunga thil a tihsual chuan zilh rawh, a sim chuan ngaidam rawh.

⁴Ni khatah i chunga vawi sarih thil a tihsualin vawi sarih, ‘ka sim e,’ tia i lam a lo hawi chuan i ngaidam tûr a ni,” a ti a.

⁵Tirhkohten Lalpa hnênah chuan, “Kan rinna min tihpunsak rawh,” an ti a.

⁶Lalpa chuan, “Anṭam chi fang khat tluk rinna nei ula chuan, he thingtheihmu kûng hnênah hian, ‘Inphawi la, tuifinriatah insawn rawh,’ in ti ang a, in thu a awih mai tûr.

⁷“Nangni zîngah tu hian nge bawih neia, lei leta feh emaw, berâm vênga kal emaw, a lo hâwn veleh, ‘Lo kal la, chaw rawn kîl nghâl rawh,’ lo ti ang?

⁸‘Ka ei tûr siam rawh, inthuam la, ka ei kham hma chu mi lo vil rawh; chumi hnuah nangin i la ei ve ang chu,’ a ti zâwk dâwn lâwm ni?

⁹In thu anga a tih avângin in bawih chu lâwmthu in hrilh ngai êm ni?

¹⁰Chutiang bawkin nangni pawh thupêk zawng zawng in tih zawh vek hnuin, ‘Bawih ṭangkai lo kan ni e, kan tih tûr rêng chauh kan ti a nih hi,’ ti ang che u,” a ti a.

¹¹Jerusalem a pan pah chuan Samari leh Galili inrinaah a kal a.

¹²Khaw pakhata a luh dâwnin phâr sâwm a lamah an lo kal a; hla feah an ding a;

¹³an au va, “Isu, Hotupa, min khawngaih rawh,” an ti a.

¹⁴Anni chu a han hmuh chuan, “Kal ta ula, puithiamte va inentîr rawh u,” a ti a. Chutia an kal lai chuan an lo thianghlim ta hlâwm a.

¹⁵An zînga pakhat chuan a dam ta tih a inhriat veleh aw ring taka Pathian fak chungin a kîr leh a;

¹⁶Isua ke bulah chuan a va bawkkhup a, lâwmthu a hrilh ta a. Chu mi chu Samari mi a ni.

¹⁷Isua chuan a lo bia a, “Mi sâwm kha in lo thianghlim ta vek a ni lâwm ni?

¹⁸Pakuate kha khawiah nge? He awze mi chauh lo hi Pathian fak tûra lo kîr leh pakhat mah an awm na nge?” a ti a.

¹⁹Tichuan, a hnênah, “Tho la, kal rawh, i rinna hi i dam phah ta a nih hi,” a ti a.

²⁰Farisai-ten Pathian ram lo thlen hun tûr an zawh chu a chhâng a, an hnênah, “Pathian ram lo thleng chu mita hmuh chi a ni lo ve.

²¹‘En teh u, heta hi,’ emaw, ‘sawta saw,’ emaw an ti hek lo vang. Ngai teh u, Pathian ram chu in zîngah hian a awm zâwk a ni,” a ti a.

²²A zirtîrte hnênah chuan, “Mihring Fapa dam lai hunte hi ni khat tal hmuh in duh ni a lo la thleng dâwn; nimahsela, in hmu si lo vang.

²³In hnênah, ‘En teh u, sawta saw le,’ emaw, ‘en teh u, heta hi le,’ emaw an la ti ang; kal chhuak suh ula, zui duh hek suh u.

²⁴Mihring Fapa lo kal ni chuan, kâwlphein kâwlkil a dêt tawn zawr zawr ang hi a la ni dâwn.

²⁵Amaherawhchu, tûnlai mite hian an hnâwl ang a, thil tam tak a tuar hmasa zet tûr a ni.

²⁶“Nova hun laia thil awm dân ang khân Mihring Fapa lo kal ni-ah pawh a la awm ve ang.

²⁷Nova lawnga a luh ni thleng khân mite chuan an eiin an bâr a, nupui pasal an innei a; tui a lo lian a, an zaa a rawn tihboral tâk kha.

²⁸“Chutiang bawkin Lota dam laiin thil a awm kha; an eiin an in a, an leiin an hralh a, thil an phun a, in an sa a;

²⁹nimahsela, Sodom khua ata Lota a chhuah ni chuan vân aṭangin mei leh kât a sûr a, an za-in a tihhlum vek kha.

³⁰Mihring Fapa lo kal hun chuan chutiang bawk chu a la ni ang.

³¹Chumi hunah chuan in chungah mi an awm chuan, in chhûnga sum chuh tûrin chhuk suh se.

³²Lova awm chu hâwng hek suh se. Lota nupui hre reng rawh u.

³³“Mahni nun chhan tum apiang chuan an chân ang a, mahni nun chân apiang chuan an hum ang.

³⁴“Ka hrilh a che u, chumi zânah chuan mi pahnih khum khatah an mu ang a, pakhat chu kal bopui a ni ang a, pakhat chu hnutchhiah a ni ang.

³⁵Hmeichhe pahnihin buh an dêng ang a, pakhat chu lâk a ni ang a, pakhat chu hnutchhiah a ni ang,” a ti a.

³⁷Anni chuan an lo chhâng a, “Lalpa, khawiah maw?” an ti a. Ani chuan, “Sa ruang awmna apiangah mulukawlhte pawh an awm khâwm ang,” a ti a.