Read Mizo Lushai CHANCHIN ṬHA LUKA ZIAK 18 Bible Online

CHANCHIN ṬHA LUKA ZIAK 18 - Mizo Lushai bible

CHANCHIN ṬHA LUKA ZIAK 18

¹Tin, beidawng lova ṭawngṭai fan fan tûr a nihzia tehkhin thuin a hrilh a:

²“Khaw engah emaw rorêltu pakhat a awm a; Pathian a ṭih lo va, mihring lah a pawisa hek lo.

³Chumi khuaah chuan hmeithai pakhat a awm a, ‘Ka khingpui nêna kan thubuai min chinfelsak rawh,’ tiin a hnênah a lo kal chhên a.

⁴Ani chuan eng emaw chhûng chu a lo duh lo va, nakinah erawh chuan a rilruin, Pathian ṭih lovin mihring pawisa lo mah ila,

⁵he hmeithai hian mi tibuai êm a, ka tihfelsak mai teh ang; chuti lo chu a lo kal fo âwm si a, a ninawm lutuk dâwn,’ a ti a,” a ti a.

⁶Lalpa chuan a sawi zêl a, “Rorêltu fel lo thu sawi chu hre rawh u,

⁷A mi thlan, a chhûn a zâna amah autute thu chu Pathian chuan a chinfelsak thuai dâwn lâwm ni? A muangchâng dâwn em ni?

⁸Ka hrilh a che u, a rawn chinfelsak thuai ang. Amaherawhchu, Mihring Fapa hian a lo kal hunah khawvêlah rinna a rawn hmu ang em ni?” a ti a.

⁹Fel inti hlea, mi dangte hmusit ṭhînte hnênah he tehkhin thu hi a sawi a.

¹⁰“Mi pahnih tempulah ṭawngṭai tûrin an chho va; pakhat chu Farisai a ni a, pakhat chu chhiahkhawntu a ni.

¹¹Farisai chu a ding a, hetiang hian a ṭawngṭai a, ‘Aw Pathian, mi dang anga mi bum hmang, Dân bawhchhia, uire leh he chhiahkhawntu ang pawh hi ka nih loh avângin lâwmthu ka hrilh a che.

¹²Chawlhkâr tin vawi hnih chaw ka nghei ziah a, ka neih apiangah sâwma pakhat ka pe ṭhîn,’ tiin.

¹³Chhiahkhawntu erawh chu hnung feah a ding a, vân lam pawh a en ngam lo va, ‘Aw Pathian, kei mi sual hi mi khawngaih rawh,’ tiin a âwm a inchûm a inchûm ta zâwk a.

¹⁴“Ka hrilh a che u, a hmasa aiin chu mi zâwk chu thiam changin a in lamah a haw thla ta a. Inngaihlu apiang an tlâwm ang a, inngaitlâwm apiang chawimawi an ni ang,” a ti a.

¹⁵A deh atân nausênte lam pawh an rawn hruai a, zirtîrte erawh chuan an lo hnar a.

¹⁶Nimahsela, Isuan anni chu a ko va, “Naupangte ka hnênah han kaltîr ula, hnar tawh suh u; Pathian ram chu hetiang mite ta a ni si a.

¹⁷Thu dik ka hrilh a che u, Pathian ram chu naupang anga lâwm lo apiang tu mah a chhûngah an lût tawp lo vang,” a ti a.

¹⁸Tin, hotu pakhatin a hnênah, “Zirtîrtu Ṭha, chatuan nun ka chan theih nân eng nge ka tih ang?” tiin a zâwt a.

¹⁹Isuan, “Engati nge Ṭha mi tih? Tu mah ṭha an awm lo, Pathian chauh lo chu.

²⁰Thupêkte chu i hria alâwm uire suh, tual that suh, ru suh, dâwtin hêk suh, i nu leh i pa chawimawi rawh, tihte hi,” a ti a.

²¹Ani chuan, “Chûng zawng zawng chu ka tleirâwl chhuah tirh ata ka zâwm ṭhîn,” a ti a.

²²Chu chu a hriatin Isuan a hnênah, “Kawng khat i la bâk e; i neih zawng zawng hralh la, pachhiate sem rawh; chutichuan, vânah ro i nei dâwn nia; tin, lo kal la, mi zui ang che,” a ti a.

²³Chûng thu a han hriat chuan a lungngai ta hle a, mi hausa tak a ni si a.

²⁴Isuan ani chu a hmuhin, “Sum ngahte tân Pathian rama luh a va harsa êm!

²⁵Pathian rama mi hausa an luh aiin, hriau benga sanghâwngsei luh tlang a âwl zâwk si a,” a ti a.

²⁶A lo ngaithlatute chuan, “Chuti chu tu nge chhandam ni thei ang le?” an ti a.

²⁷Ani erawh chuan, “Mihring tih theih loh hi Pathian chuan a ti thei asin,” a ti a.

²⁸Petera chuan, “Ngai teh, kan in leh lo kalsanin kan zui ta che a,” a han ti a.

²⁹Isuan, “Thu dik ka hrilh a che u, Pathian ram avânga in emaw, nupui emaw, unaute emaw, nu leh pa emaw, fate emaw kalsan tawh phawt chuan tûnah ngei pawh hian,

³⁰a aia tam daih an hmu ngei ang, hun lo la thleng tûra chatuan nunna nên,” a ti a.

³¹Sâwmpahnihte chu a hruai hrang a, an hnênah, “Ngai teh u, Jerusalem-ah kan chhoh dâwn hi; Mihring Fapa chungchâng thu zâwlneite hmanga ziak zawng zawng kha a thleng kim dâwn.

³²Jentail-te hnênah an hlân ang a; anni chuan an lo nuihzat ang a, zahthlâk takin an sawisa ang; chil an chhâk ang a;

³³an vua ang a, an tihlum ang; ni thum ni-ah a tho leh ang,” a ti a.

³⁴Chûng thu chu a ngaihna an hre lo, an laka thup a ni a, a thu sawi chu an man lo va ni.

³⁵Jeriko khua a lo thlen dâwn chuan mitdel pakhat hi kawng sîrah kut dawhin a lo ṭhu a.

³⁶Mipui kal thâwm a hriat chuan eng nge ni ta tih a zâwt a.

³⁷“Nazaret Isua a lo kal a ni,” an ti a.

³⁸Tichuan, “Isu, Davida Fapa, mi khawngaih rawh,” tiin a au ta a.

³⁹Kal hmasate chuan an hau va, ngawi tûra an tih pawhin a hma aia ringin, “Davida Fapa, mi khawngaih rawh,” tiin a au zual sauh va.

⁴⁰Isua chu a ding a, a hnêna han hruai tûrin a hrilh a.

⁴¹A kiang hnai a lo thlen chuan, “Eng nge tihsak che ila i duh?” a ti a. Ani chuan, “Lalpa, hmuh theih ka duh,” a ti a.

⁴²Tichuan Isuan, “Hmu thei tawh ang che, i rinna hi i dam phah a ni e,” a ti a.

⁴³Thâwklehkhatan khua a hmu thei ta a. Pathian fak chung zêlin amah chu a zui ve ta a. Mi zawng zawngin chu chu an hmuhin Pathian an fak a.