Read Mizo Lushai CHANCHIN ṬHA LUKA ZIAK 19 Bible Online

CHANCHIN ṬHA LUKA ZIAK 19 - Mizo Lushai bible

CHANCHIN ṬHA LUKA ZIAK 19

¹Jeriko-ah chuan a lût a, a chhûnpelh dâwn a.

²Chutah chuan pa pakhat, a hming Zakaia a awm a; chhiahkhawn hotu a ni a, mi hausa tak a ni.

³Isua chu tu nge ni tih hmuh a tum a, mipui avâng chuan a hmu thei lo va, pa tawi tak a ni si a.

⁴Tichuan, a kalna tûr kawngah a tlân khalh a, a en tûrin theipui kûngah a lâwn a.

⁵Chumi hmun Isuan a va thlen chuan a dâk a, a hnênah, “Zakai, lo chhuk thuai rawh, vawiin hian i inah ka thleng dâwn a ni,” a ti a.

⁶A lo chhuk ta sawk sawk a, hlim takin amah chu a thleng ta a.

⁷Chu chu an hmuhin an za chuan, “Mi sual hnêna thleng tûrin a luh tâk saw,” tiin an phunnawi a.

⁸Zakaia chu a ding a, Lalpa hnênah chuan, “Ngai teh, Lalpa, ka sum zâtve pachhiate ka pe ang a; tu thil pawh dik lo taka lâksak ka lo neih chuan a lêt liin ka rûl leh ang,” a ti a.

⁹Isuan a hnênah, “Vawiinah he inah hian chhandamna a lo thleng ta, ani pawh Abrahama fapa a ni si a.

¹⁰Mi bote zawnga chhandam tûrin Mihring Fapa hi a lo kal a ni rêng a ni,” a ti a.

¹¹Chûng thu chu an ngaihthlâk lai chuan Jerusalem pawh an hnaih tâk avâng leh, Pathian ram chu lo thleng mai dâwna an rin avângin tehkhin thu a sawi ta a:

¹²Heti hian a sawi a, “Mi lian pakhat, a lal theihna tûr thu laa lo kîr leh tûrin khaw lam hla takah kal a tum a.

¹³A bawihte sâwm a ko va, rangkachak tangka pakhat a pe ṭheuh va, an hnênah, ‘Ka thang chhûngin lo peipung rawh u,’ a ti a.

¹⁴Tin, chu khuaa mite chuan an hua a, ‘He pa hi lal atân kan duh lo ve,’ ti tûrin palai an tîr zui ve nghâl a.

¹⁵“Lalna thu chu laa a lo kîr leh chuan, tangka a pêk a bawihte kha, an peipun zât hriat nân a kohtîr a.

¹⁶A lo kal hmasa ber chuan, ‘Ka pu, i rangkachak tangka kha sâwmin a pung e,’ a ti a.

¹⁷Ani chuan, Bawih ṭha, i ti ṭha e, tlêm tê chungah i rinawm a, khaw sâwm chunga hotu-ah ṭhu ang che,’ a ti a.

¹⁸A dawta lo kal pawh chuan, ‘Ka pu, i rangkachak tangka kha pangain a pung e,’ a ti a.

¹⁹Ani chuan, ‘Nang pawh, khaw nga chunga hotu-ah ṭhu rawh,’ a ti a.

²⁰“A dang pawh a lo kal a, ‘Ka pu, en teh, i rangkachak tangka kha, thlanhrûkna puanin ka lo fûn ṭha khiau asin.

²¹Mi khirh tak i nih avângin ka hlau che a ni; i dah loh pawh i la ṭhîn a, i tuh loh pawh i seng ṭhîn si a,’ a ti a.

²²“Ani chuan, ‘Bawih sual, i ṭawngka chhuak aṭang ngeiin ka thiam lo va che. Mi khirh tak ka niha, ka dah loh pawh ka lâk ṭhina, ka tuh loh pawh ka seng ṭhin i hria maw?

²³Chuti a nih ahnu, ka tangka chu engah nge tangkaa sumdâwngtute hnênah i dah mai loh? Ka lo hâwnin a pung nên keiin ka rawn ṭhîng tûr alâwm,’ a ti a.

²⁴Tin, a kianga dingte hnênah, ‘A rangkachak tangka kha lâksak ula, rangkachak tangka sâwm neitu kha pe rawh u,’ a ti a.

²⁵Anni chuan, “Ka pu, ani zawngin sâwm a nei alâwm,’ an ti a.

²⁶Ka hrilh a che u, a nei apiang an pêk belhchhah ang a, a nei lo chu a neih chhun pawh lâksak a ni ang.

²⁷Tin, hêng, ka hmêlma, an lal atâna mi duh lotute hi, rawn hruai ula, ka hmaah that rawh u,’ a ti a,” a ti a.

²⁸Chûng thu chu a sawi zawh chuan Jerusalem panin hma a hruai chho ta a.

²⁹Oliv tlâng an tiha awm Bethfage leh Bethani khua a thlen dâwnin zirtîrte zînga pahnih a tîr a.

³⁰“Kan hma zâwn khuaah sâwn va kal ta ula, in va luhin sabengtung no thlun, tu ma la chuan ngai lohna in va hmu ang; phelh ula, han kai rawh u.

³¹Miten, ‘Engah nge in phelh tâk mai?’ an tih che u chuan, ‘Lalpan a mamawh a ni,’ tiin chhâng ang che u,” a ti a.

³²Tichuan, a tirhte chu an kal ta a, an hnêna a sawi ang ngeiin an va hmu a.

³³Sabengtung chu an phelh lai chuan a neitute chuan, “Sabengtung kha engah nge in phelh tâk mai?” an ti a.

³⁴Anni chuan, “Lalpan a mamawh a ni,” an ti a.

³⁵Isua hnênah an rawn kai a, sabengtung chungah chuan an puante an phah a, a chungah Isua chu an chuantîr ta a.

³⁶A kalkawngah chuan an puante an phah zêl a.

³⁷Jerusalem thlen dâwn hnaih, Oliv tlâng liam thlâk dâwnah chuan zirtîrho zawng zawng chu thil mak an hmuh zawng zawngte avângin an lâwm a, aw ring takin an au va, Pathian an fak ta a.

³⁸“Lalpa hminga lal lo kal chu Fakin awm rawh se, Vânah rem lêng sela, Chungnungbera hnênah ropuina awm rawh se,” an ti a.

³⁹Mipui zînga Farisai ṭhenkhat erawh chuan a hnênah, “Zirtîrtu, i zirtîrte hi khap rawh,” an ti a.

⁴⁰Ani chuan a chhâng a, “Ka hrilh a che u, hêngho hi an ngawih chuan hêng lung tal hi an au chhuak ang,” a tihsan a.

⁴¹Tin, a lo hnaih deuhva, khawpui a han hmuh chuan a ṭah ta a,

⁴²“Aw, nang lul hian vawiinah tal hian muanna kawng hi hre hman hrâm la ṭha tûr!

⁴³I râlten leikulh an siam hnan hun che a lo thleng dâwn, an hual ang chia, kil tin aṭangin an bei dâwn a che;

⁴⁴i chhûnga fanaute nên lam an paih thal dêr ang che u; i chhûngah lung intiang rêng rêng an zuah lo vang, Pathianin a rawn kan lai che i hriat loh avângin chûng chu i chungah a lo thleng dâwn,” tiin.

⁴⁵Tempulah chuan a va lût a, englo zuartute chu a hnawt chhuak a,

⁴⁶an hnênah, “ ‘Ka in chu ṭawngṭaina in a ni ang,’ tih ziak a ni a, nangni erawh chuan suamhmangte pûkah insiam tâk zâwk hi,” a ti a.

⁴⁷Ni tin Tempulah chuan a zirtîr ṭhîn a, puithiam lalte leh Dân zirtîrtute chuan, vântlâng hotute nên, amah tihboral an tum a;

⁴⁸nimahsela, mipuiten a thu ngaihthlâk an kham theih loh avângin a tih dân tûr an hre thei lo a ni.