Read Mizo Lushai CHANCHIN ṬHA LUKA ZIAK 2 Bible Online

CHANCHIN ṬHA LUKA ZIAK 2 - Mizo Lushai bible

CHANCHIN ṬHA LUKA ZIAK 2

¹Chûng lai chuan Kaisara, Augasta chuan khawvêl zawng zawnga mite hming ziak vek tûrin thu a pe a.

²Chu chu Suria ram awptu Kurinia a nih laia chhiarpui hmasa ber a ni.

³Tichuan, mi zawng zawng mahni khua ṭheuhvah hming ziak tûrin an kal ta a.

⁴Josefa pawh, Davida chhûngte leh a thlah a nih avângin, Galili ram Nazaret khua aṭang chuan, a nupui hual Mari, rit tawh tak nên chuan, hming ziak tûrin Judai rama Davida khua Bethlehem an tihah chuan an kal ve ta a.

⁵

⁶Chuta an awm lai chuan a hrin a lo hun ta a; fa tîrah mipa a hring a.

⁷Puanin a tuam a, khualbûka an len ve tâk loh avângin ran chaw pêkna thlêngah a muttîr a.

⁸Chu lai ramah chuan berâmputen berâm an vêng a, zânah an riah chilh a.

⁹Lalpa tirh vântirhkoh an hmaah a lo ding a, Lalpa ropuina chuan an vêl chu a chhun êng ta pup a; an hlau êm êm a.

¹⁰Vântirhkoh erawh chuan an hnênah, “Hlau suh ula, ngai rawh u, mi tin tân Chanchin Ṭha lâwmawm êm êm ka rawn thlen che u a ni.

¹¹Vawiin hian in tân Davida khuaah Chhandamtu a piang ta, Lalpa Krista chu.

¹²Nausên, puana tuam, ran chaw pêkna thlênga mu in va hmuh chuan ani chu a ni tih hria ang che u,” a ti a.

¹³Thâwklehkhatan vântirhkoh kiangah chuan vân mipuiho an lo awm ta chiam a, Pathian an fak a:

¹⁴“Chungnung berah khian Pathian chu ropui takin awm sela, Leiah hian a lawm êm êm mihringte zîngah rem lêng rawh se,” an ti a.

¹⁵Vântirhkohten vâna an kalsan tâk veleh berâmpute chuan, “Hawh u, Bethlehem-ah kal ila, Lalpa thu min hrilh lo thleng chu i va en ang u,” an ti a.

¹⁶Tichuan, hmanhmawh takin an kal a, Mari te, Josefa te, ran chaw pêkna thlenga nausên mu te chu an va hmu a.

¹⁷An va hmuh chuan nausên chanchin vântirhkoh sawi kha an hrilh a.

¹⁸A hria apiang chuan berâmpute thu sawi chu mak an ti hle a;

¹⁹Mari chuan chûng chu a vawng reng a, a ngaihtuah neuh neuh ṭhîn a.

²⁰Vântirhkoh hrilh ang ngeia engkim an hmuha an hriat avâng chuan berâmpute chu Pathian chawimawi leh fak chung zêlin an kîr leh ta a.

²¹Tin, ni riat a lo tlina a serh an tan ni chuan, a hmingah, chhûla a awm hma rênga vântirhkoh sak tawh sa Isua an sa a.

²²Mosia Dân anga an inthenna ni a lo thlen chuan nausên chu Lalpa hnêna hlân tûrin Jerusalem-ah an chhohpui a.

²³Lalpa Dân thu-ah, “Fa tîr mipa tawh phawt chu Lalpa chanvo tûr a ni,” tih a ni a.

²⁴Tin, Lalpa Dân angin ṭhuro pahnih emaw, pârva no pahnih emaw inthawi nân an hlân tûr a ni.

²⁵Jerusalem-ah chuan mi pakhat, a hming Sumeona a awm. Ani chu mi fel leh sakhaw mi tak a ni a, Israel thlamuantu tûr chu a thlîr reng a; a chungah Thlarau Thianghlim a awm a.

²⁶Lalpa Hriakthiha chu a hmuh hma chuan a thi lo vang tih Thlarau Thianghlimin a lo hrilh tawh rêng a.

²⁷

²⁸Thlarau hruaiin tempulah chuan a lo kal a, nausên Isua chu a nu leh pain Dânin a phût tihsak tûra an rawn hruai luh lai chuan a lo pawm a, Pathian a fak a:

²⁹“Aw Lalber, tûnah i thu ang ngeiin I bawih hi thlamuang takin i chhuahtîr dâwn ta a,

³⁰I chhandamna mi tin hmuha i siam kha,

³¹ka mit hian a hmu ta e.

³²Jentail-te hnêna i êng tilang tûr leh I mi Israel-te ropuina tûr chu,” a ti a.

³³A nu leh pa chuan nausên chungchâng a sawi chu mak an ti hle a.

³⁴Sumeona chuan anni chu mal a sâwm a, a nu Mari hnênah: “Ngai rawh, Israel zînga mi tam tak Tlûkchhiat nân leh din chhuah nân He nautê hi ruat a ni, Chhinchhiahna, an hnial luai luai tûra chu.

³⁵Nang pawh, ngûnhnâma chhun angin i thin a la nâ ang, Mi tam tak rilru chhûngril tihlan a ni dâwn si a,” a ti a.

³⁶Zâwlnei pakhat, Annii, Fanuela fanu, Asera hnam, tar tawh tak a awm bawk a. A pasal nên kum sarih an inneih hnuin,

³⁷kum sawmriat leh pali a hmeithai tawh a. Ani chuan Tempul kalsan lovin chaw te a nghei ṭhîn a, a chhûn a zân ṭawngṭaiin Pathian a be ṭhîn a.

³⁸Chutih lai chuan ani chu a lo kal a, Pathian hnênah lâwmthu a sawi a, Jerusalem chhanchhuahna beiseitu apiang hnênah nausên chanchin chu a sawi ta a.

³⁹Lalpa Dân ang zêla thil an tih zawh vek hnu chuan Galili ramah, an khua Nazaret-ah chuan an haw leh ta a.

⁴⁰Nausên pawh chu a ṭhang lian zêl a, a fing deuh deuh va, Pathian khawngaihna a chungah a awm reng a.

⁴¹A nu leh pate chu kum tin Jerusalem-ah Kalhlên Kût hmang tûrin an kal ṭhîn a.

⁴²Ani chu kum sâwm leh pahnih a nihin dân pangngai anga Kût hmang tûrin an chhohpui a.

⁴³Kût an ṭiak a, an hâw ta a, naupang Isua erawh chu a nu leh pa te hriat lohvin Jerusalem-ah a châm a.

⁴⁴An pâwlte zîngah a awm a ni ang chu tiin ni khat an kal hman tawh a, an laichînte leh an hmêlhriatte zîngah an han zawn chuan an hmu ta lo va.

⁴⁵Zawng zêl chungin Jerusalem-ah an kîr leh ta a.

⁴⁶Ni thum ni chuan tempulah, zirtîrtuho bula a lo ṭhu ve chu an han hmu ta a; an thu a lo ngaithla a, thute a lo zâwt bawk a.

⁴⁷Anni chuan a finzia leh a chhân thiamzia an hriatin mak an ti hle hlawm a.

⁴⁸A nu leh a pa chuan an han hmuh chuan mak an ti êm êm a, a nu chuan, “Mama, engati nge hetia min tih? I pa nên thlaphâng takin kan zawng kan zawng che asin le,” a ti a.

⁴⁹Ani erawh chuan, “Engah nge mi zawn? Ka Pa ina awm ngei tûr ka ni tih in hre lâwm ni?” a ti a.

⁵⁰An hnêna a thu sawi chu a ngaihna an hre lo va.

⁵¹An rual chuan a haw ve ta a, Nazaret an thleng a, an thu a awih êm êm zêl a; tin, a nu chuan chûng thu zawng zawng chu a rilruah a vawng reng a.

⁵²Tin, Isua chu a lo ṭhang lian telh telh a, a fing deuh deuh va, Pathian khawngaihna leh mite duhsakna a dawng zêl a.