Read Mizo Lushai CHANCHIN ṬHA LUKA ZIAK 20 Bible Online

CHANCHIN ṬHA LUKA ZIAK 20 - Mizo Lushai bible

CHANCHIN ṬHA LUKA ZIAK 20

¹Ni khat chu Tempula Chanchin Ṭha hrila a zirtîr lai chuan puithiam lalte leh Dân zirtîrtute chu, upate nên a hnênah an lo chho va.

²“Eng thuneihnain nge hêng thil hi i tih? Tu-in nge thu pe che min hrilh rawh,” an rawn ti a.

³Ani chuan a chhâng a, “Kei pawhin thu ka zâwt ve ang che u:

⁴Johana baptisma kha, vâna mi thu nge mihring thu, min hrilh rawh u,” a ti a.

⁵An inberâwn a, ‘Vâna mi thu kan tih chuan, ‘engah nge a thu in awih loh,’ min ti si ang a,

⁶‘leia mi thu,’ kan tih lahin mipui hian an za-in lungin min dêng mai awm si a, Johana chu zâwlnei ni ngeiah an pawm tlat hlawm si,” an ti a.

⁷Tichuan, “Khawi lam zâwk thu nge kan hre lo,” an ti a.

⁸Isua chuan, “Kei pawhin tu thuin nge hêng thil hi ka tih ka hrilh bîk lo vang che u,” a ti a.

⁹Vântlâng hnênah he tehkhin thu hi a hrilh ta a: “Mi pakhatin grep huan a siam a, huan enkawltute a thlawh hlawhtîr a; ram dangah rei tak a thang bo va.

¹⁰A lawh hun chuan a chan ai la tûrin bawih pakhat huan enkawltute hnênah chuan a tîr a; nimahsela, huan enkawltute chuan an lo vêl a, kut ruakin an hâwtîr a.

¹¹Bawih dang a tîr leh a, chu pawh chu an lo vêl a, zahthlâk takin an sawisa a, kut ruak bawkin an hawtîr leh ta a.

¹²A ṭum thumnaa a tirh lek phei chu, thisen an lo chhuahsak a; huan ata an theh chhuak a.

¹³“Grep huan neitupa chuan, ‘Engtin nge ka tih ang aw? Ka fapa duh tak hi ka tîr mai teh ang; ani hi zawng an lo zah êm ang chu maw,’ a ti a.

¹⁴Huan enkawltute chuan an lo hmuhin, ‘He mi hi ro luahtu tûr chu a ni, i that ang u khai, keinin a ro chu kan nei hlauh dâwn nia,’ an ti hlawm a.

¹⁵Grep huan ata chu an theh chhuak a, an tihlum ta a.

¹⁶Tichuan, grep huan neitupa chuan engtin nge anni chu a rawn tih ang? A lo kal ang a, huan enkawltute chu a rawn tiboral ang a, huan chu mi dangte a pe ang,” a ti a. Thu ngaithlatute chuan, “Chu êm chu ni lo ve!” an ti a.

¹⁷Nimahsela, anniho chu a en a, “In satute lung duh loh kha, Chu ngei chu a kil lung ṭangkai ber a lo ni si,’ tih ziak hi eng tihna nge ni?

¹⁸Chu lung chunga tlu apiang an keh sawm ang a, a delh lek phei chu a râwt dip ang,” a ti a.

¹⁹Chutih lai chuan Dân zirtîrtute leh puithiam lalte chuan, chu tehkhin thu chu anmahni demin a sawi tih an hriat avângin man nghâl mai an duh a; amaherawhchu, vântlâng an hlau si.

²⁰Tichuan, remchâng an melh ta rân a: Ramawptu rorêlna leh a thuneihnaah an thlen theih nân a ṭawng sual palh man tûrin enthlatu, mi dik anga lang tûrin an tîr a.

²¹Chûng mite chuan, “Zirtîrtu, i thu sawi leh i thu zirtîr hi a dik tih kan hria; tu mah zah bîk nei chuang lovin Pathian thu dik tak i zirtîr ṭhîn.

²²Kaisara hnênah chhiah chawi tûr kan ni nge ni lo?” tiin an zâwt a.

²³An ngamthlêm a ni tih a hmu tlang a, an hnênah,

²⁴“Duli mi han entîr teh u. Tu lem leh tu hming nge chuang?” a ti a. Anni chuan, “Kaisara,” an ti a.

²⁵Ani chuan, “A nih ahnu, Kaisara ta chu Kaisara pe ula, Pathian ta chu Pathian pe ta che u,” a ti a.

²⁶Tichuan vântlâng hmaa a thu sawia man an tum chu an hlawhchham ta a; a chhânna chu mak an ti hle a, an ngawi ta daih a.

²⁷Sadukai-ho, ‘thawhlehna a awm lo,’ tite zînga ṭhenkhat Isua hnênah an lo kal a.

²⁸“Zirtîrtu, Mosian, ‘Tu pawh nupui nei si, fa nei lovin thi sela, a unaupa chuan a nupui chu rochungin a unaupa tân chi a thlahsak tûr a ni,’ tiin min ziaksak a.

²⁹Aw le, unau mipa pasarih an awm a, a upa ber chuan nupui a nei a, fa nei lovin a thi a;

³⁰a pahnihna chuan a rochung a,

³¹pathumna pawhin; chutiangin pasarihte chuan an rochung ṭheuh va, fa nei lovin an thi zêl a.

³²Chumi hnu chuan hmeichhia pawh chu a thi ve ta a;

³³tichuan, thawhlehnaah chuan chu nu chu tu nupui ber nge ni ang? An pasarih khân nupuiah an nei ṭheuh si a?” tiin an zâwt a.

³⁴Lalpan an hnênah, “He khawvêl mite hi nupui pasal an innei ṭhîn a;

³⁵khawvêl lo la awm tûra thawhlehnaa tel tlâka ruatte erawh chu nupui pasal an innei dâwn tawh hlei nêm;

³⁶thih pawh an thi leh thei dâwn tawh lo, vântirhkohte ang an ni; thawhlehna changtute an ni a, Pathian fate an ni.

³⁷Mitthi kaihthawh thu chu Mosia pawhin a tilang alâwm. Hnimbuk meialh thu-ah khân Lalpa chu, ‘Abrahama Pathian, Isaka Pathian, Jakoba Pathian,’ tia a sawi kha.

³⁸Ani chu mitthite Pathian a ni lo va, mi nungte Pathian a ni zâwk e. Ani tân chuan an nung vek a ni,” a ti a.

³⁹Dân zirtîrtu ṭhenkhat chuan, “Zirtîrtu, i sawi dik hle e,” an lo ti bawk a,

⁴⁰thu dang chu an zâwt ngam tawh lo.

⁴¹An hnênah, “Krista chu Davida fapa engtiziaa ti nge an nih?

⁴²Fakna Hla bu-ah Davida ngeiin:

⁴³‘Lalpa chuan ka Lalpa hnênah, ka ding lamah lo ṭhu rawh, I hmêlmate i ke nghahchhanah ka han siam ang e,’ a ti a.

⁴⁴Davidan ani chu, ‘Lalpa,’ a tih si chuan, engtin nge a fapa a nih theih ang?” a ti a.

⁴⁵Vântlâng hriatin a zirtîrte hnênah chuan,

⁴⁶“Dân zirtîrtute lakah fîmkhur rawh u. Anni chuan kawrfual haa lên vêl an chîng a, dâwr hmuna chibai bûk an ngaina a, sunagog-a ṭhutna langsâr ber leh ruai ṭhehna hmuna ṭhutna ṭha ber an ngiat ṭhîn.

⁴⁷Hêngho, hmeithai sum ei zawhsaka, mi hmuh atân maia rei tak tak ṭawngṭai chîng site hian hremna an tuar nasa ber ang,” a ti a.