Read Mizo Lushai CHANCHIN ṬHA LUKA ZIAK 21 Bible Online

CHANCHIN ṬHA LUKA ZIAK 21 - Mizo Lushai bible

CHANCHIN ṬHA LUKA ZIAK 21

¹Thawhlâwm bâwma mi hausate thawhlâwm thlâk chu a thlîr reng a.

²Hmeithai rethei tak pakhatin dâr pawisa pahnih a rawn thlâk ve chu a hmu a.

³Tichuan, “Thu dik ka hrilh a che u, he hmeithai rethei tak hian mi dang zawng ai khân a thlâk tam a ni.

⁴Mi dangte hi chuan an neih liama mi an rawn thlâk a, ani erawh hi chuan tlachham chungin, intunnunna tûra a neih chhun chu a rawn thlâk a nih hi,” a ti a.

⁵Lung mawi tak tak leh thilpêk khâwma Tempul an chei mawizia thu mi ṭhenkhatin an sawi laiin Isuan,

⁶“Hêng in thil hmuhte hi, lung intiang rêng rêng hi pakhat mah tihchim lohva hnutchhiah a awm loh hun a lo thleng dâwn,” a ti a.

⁷Anni chuan a hnênah, “Zirtîrtu, chûng chu engtikah nge a lo awm ang? Chûng lo thlen dâwn hun chhinchhiahna thil mak eng eng nge awm ang?” tiin an zâwt a.

⁸Ani chuan, “Hruai bo in nih loh nân fîmkhur rawh u. Ka hming chhâlin, ‘Keimah hi ka ni,’ ‘a hun a thleng dâwn ta,’ tiin mi tam tak an lo chhuak ang; an hnung zui suh ang che u.

⁹Indo ri te leh hel vânga buai thâwmte in hriat hunin, hlauvin mangang suh ang che u; chûng chu thleng hmasa tûr rêng a ni, hun tâwp erawh chu a ni nghâl mai lo vang,” a ti a.

¹⁰Tin, an hnênah, “Hnam hrang hrang an indo vang a, sawrkâr hrang leh sawrkâr hrang an indo bawk ang.

¹¹Lîr a nghîng vak vak ang a, hmun hrang hrangah ṭâm a tla ang a, hrite a lêng bawk ang; vân ata hlauhawmte leh chhinchhiahna mak tak tak a lo awm ang.

¹²Nimahsela, chûng thilte chu a lo thlen hmain an man ang che u a, sunagog-ah te hruaiin tân inah te an khung ang che u a, an tiduhdah dâwn che u a ni. Ka hming avângin lalte leh Ramawptute hmaah an hruai ang che u.

¹³Ka thuhretute in nih târlanna remchâng a ni hlauh dâwn.

¹⁴Chhânna tûr ngaihtuah lâwk a ngai lo tih hre sa rawh u;

¹⁵in khingpuite tluk loh tûr leh hnial theih loh tûr finna leh mi chhân thiamna keiin ka pe dâwn si che u a.

¹⁶In nu leh pate, in unaute, in laichînte leh in ṭhiante hial pawhin an mantîr ang che u a; a ṭhen phei chu an tihlum ang che u.

¹⁷Ka hming avângin mi tinin an hua ang che u.

¹⁸Nimahsela, in samzai pakhat pawh a boral lo vang.

¹⁹Chhel takin ding tlat ula; tichuan, in him ang.

²⁰“Sipaihoten Jerusalem an hual in hmuh hun chuan, a chhiat a hnai ta tih hria ang che u.

²¹Chutih hunah chuan Judai rama awmte chu tlângramahte tlân se; khawpui chhûnga awmte chuan chhuahsan sela, thingtlânga awmte chu a chhûngah lût suh se.

²²Chûng nite chu hremna ni chu a ni e, thu ziak zawng zawng a thlen kim nân.

²³Chûng huna nau paite leh nauno pawmte chu an va khawngaihthlâk dâwn êm! He ramah hian hrehawm nasa tak a thleng dâwn si a, he chite chungah hian thinurna a lo thleng dâwn a ni.

²⁴Khandaiha sâm an ni ang a, Jentail ram tinah sala hruai darhin an awm ang; tin, Jentail-te hun a tâwp hma zawng Jerusalem hi Jentail-te rah beh a ni ang.

²⁵“Tin, ni-ah te, thlaah te, arsi-ah te khian chhinchhiahna mak tak tak a lo awm ang a; leiah pawh tuifinriat fâwn leh rûm hum hum an hriatin hnam tin tihngaihna hre lovin an mangang ang a;

²⁶Vân thiltihtheihnate chu tihnghîn a ni ang a, khawvêla thil hlauhawm lo thleng tûr an suangtuahin, hlauva thlabârin mite an thidang ang.

²⁷Chutih hunah chuan Mihring Fapa hi thiltihtheihna leh ropuina nasa tak nên chhûm zînga lo kal an hmu ang.

²⁸Chûng thil chu a lo thlen chuan en chho ula, dâk chhuak ang che u; in tlanna chu a lo hnai ta a ni,” a ti a.

²⁹An hnênah tehkhin thu a sawi bawk a, “Theipui kûng leh thing dangte pawh hi en teh u.

³⁰A lo chawr no in hmuhin nipui a lo thaw ṭan ta tih in hre mai ṭhîn.

³¹Chutiang bawkin nangni pawhin chûng zawng zawng lo thleng in hmuh hun chuan, Pathian ram chu a lo hnai ta tih hre mai ang che u.

³²Thu dik ka hrilh a che u, chûng thil zawng zawng chu a lo thlen hma loh chuan tûnlai mite hi an ral hman lo vang.

³³Lei leh vân a ral ang a, ka thu erawh chu a ral tawp lo vang.

³⁴“Tichuan, nawmsak bâwl te, zu ruih te, ni tin khawsak engtona te in rilrua a khah lutuk loh nân fîmkhur rawh u.

³⁵Thanga âwk phut ang maiin a rawn nang dah ang che u. Lei pum pui chunga chêngte chungah chutiangin a lo thleng dâwn si a.

³⁶Chûng thil lo thleng tûrte tuar chhuaka, Mihring Fapa hmaa in din theih nân eng lai pawhin ngaihvenin ṭawngṭai rawh u,” a ti a.

³⁷Chhûnah chuan Tempulah a zirtîr a, zânah erawh chuan a chhuak a, Oliv tlâng an tihah chuan a riak ṭhîn.

³⁸Mi zawng zawng pawh a thu ngaithla tûrin zîngah Tempulah an lo kal ṭhîn.