Read Mizo Lushai CHANCHIN ṬHA LUKA ZIAK 22 Bible Online

CHANCHIN ṬHA LUKA ZIAK 22 - Mizo Lushai bible

CHANCHIN ṬHA LUKA ZIAK 22

¹Tin, chhang dawidim telh loh kût, Kalhlên Kût an tih chu a lo hnai ta a.

²Puithiam lalte leh Dân zirtîrtute chuan amah tihhlum dân tûr kawng an dap ta a; vântlâng an hlau si a.

³Sâwmpahnihte zînga chhiar tel, Juda, Iskariota an tiha chhûngah Setana a lût a;

⁴tichuan, a va kal a, puithiam lalte leh vêngtu sipai hotuten an man dân tûr a va sawipui ta a.

⁵Anni chu an lo lâwm hle a, pawisa pêk an tiam a.

⁶Ani pawh chuan a remti a, mipui awm loh laia mantîrna hun remchâng a zawng ta a.

⁷Chhang dawidim telh loh kût ni, Kalhlên Kût berâmno an talh ni chu a lo thleng a.

⁸Tichuan, Petera leh Johana chu a tîr a, “Kalhlên Kût chaw kan ei tûr va buatsaih rawh u,” a ti a.

⁹Anni chuan “Khawiah nge va buatsaih ila i duh?” an ti a.

¹⁰Ani chuan, “Ngai teh u, khawpuia in va luhin pa pakhat, hlumbêla tui chawiin a rawn tâwk ang che u, a luhna inah zui lût ang che u.

¹¹Tin, in neitupa hnênah, ‘Zirtîrtuin, ka zirtîrte nêna Kalhlên Kût chaw kan eina tûr pindan chu khawiah nge, a ti a che,’ ti ang che u.

¹²Ani chuan pindan chungnung zau tak, engkim awm a kawhhmuh ang che u; chutah chuan buatsaih rawh u,” a ti a.

¹³Tichuan an kal a, an hnêna a sawi ang ngei khân an va hmu a, Kalhlên Kût chaw chu an buatsaih ta a.

¹⁴Tin, a ei a lo hun chuan ani leh a zirtîrte chuan chaw chu an kîl ta a.

¹⁵An hnênah, “Ka tuar hmain he Kalhlên Kût chaw hi eipui che u ka duh tak meuh a ni.

¹⁶Ka hrilh a che u, Pathian rama a tak tak a thlen hma loh chu kût chaw hi ka ei leh tawh dâwn lo,” a ti a.

¹⁷Tin, no a la a, lâwmthu a sawi zawhin, “Hei hi la ula, in rawh u.

¹⁸Ka hrilh a che u, tûn a chinah Pathian ram a lo thlen hma loh chu grep rah tui hi ka in leh dâwn tawh lo,” a ti a.

¹⁹Tin, chhang a la a, lâwmthu a sawi zawhin a phel a, an hnênah a pe a, “Hei hi ka taksa a ni, in tâna pêk chu; min hriat reng nân hetiang hian ti ṭhîn rawh u,” a ti a.

²⁰Zanriah ei zawh chuan chutiang bawkin no chu a la a, “He no hi ka thisena thuthlung thar, in tâna chhuak chu a ni.

²¹“Nimahsela, ngai teh u, mi mantîrtu tûr chuan he dawhkân hi a kîl ve reng a ni.

²²Mihring Fapa hi Pathian ruat angin a kal dâwn; amaherawhchu, a mantîrtu tûr mihring chung chu a pik e,” a ti a.

²³Anni chuan an zîngah chutiang ti tûr chu tu tak ni ang maw, tiin an inzâwt a.

²⁴An zîngah tu nge ropui bera ngaih tûr ni ang tih inhnialna a lo chhuak bawk a.

²⁵Ani chuan an hnênah, “Jentail-ho lalte chu an intilal êm êm a, an chunga thuneitute lah chuan ‘Hotuṭhaa’ tih hming te an invuah a.

²⁶Nimahsela, nangni zîngah zawng chutiang tûr a ni lo ve. In zînga ropui ber chu tê ber angin awm sela, hotu ber chu rawngbâwltu angin awm zâwk rawh se.

²⁷Tu nge ropui zâwk, chaw kîltu nge a rawngbâwltu? Chaw kîltu chu a ni lo vem ni? Nimahsela, kei zawng in zîngah rawngbâwltu angin ka awm hi.

²⁸“Harsatna ka tawh chhûng zawng nangnin mi awmpui a.

²⁹Ka Pain ram mi ruatsak ang bawkin kei pawhin ram ka ruatsak a che u; tichuan, ka ramah chuan ka dawhkânah in eiin in bâr ang a,

³⁰lalṭhutthlênga ṭhuin Israel hnam sâwm leh pahnih ro in rêlsak ang.

³¹“Simon, Simon, ngai teh, Setanan buh thlei angin thlei a tum che u a ni; nimahsela, i rin a bo loh nân ka ṭawngṭaisak a che.

³²Tin, i lo hawi kîr leh hunah i unaute tinghet ang che,” a ti a.

³³Ani chuan, “Lalpa, i hnênah chuan tâng tûr leh thi tûr pawhin kal ve zêl ka inhuam asin,” a ti a.

³⁴Ani chuan, “Peter, ka hrilh a che, ‘Ani chu ka hre lo ve,’ tia vawi thum mi phat hma chu zâninah âr a khuang lo vang,” a ti a.

³⁵An hnênah, “Tangka ip te, iptê te, pheikhawk te keng lova ka tirh che u khân tlâkchham in nei rêng em?” a ti a. Anni chuan, “Nei hauh lo,” an ti a.

³⁶Ani chuan, “Tûnah zawng tangka ip nei chuan keng sela, iptê pawh keng rawh se; khandaih nei lo chuan a puan hralh sela, lei rawh se.

³⁷Ka hrilh a che u, ‘Ani chu mi sual zîngah an chhiar tel ta,’ tih Lehkha Thu kha ka chunga thleng ngei tûr a ni. Ka chungthu an ziak kha a thleng kim dâwn ta,” a ti a.

³⁸Anni chuan, “Lalpa, en teh, hei khandaih pahnih chu a awm e,” an ti a. Ani chuan, “A tâwk e,” a ti a.

³⁹Tin, ani chu a chhuak a, a dân pângngaiin Oliv tlângah chuan a kal ta a; a zirtîrte pawh chuan an zui ve a.

⁴⁰A hmun a va thlen chuan an hnênah, “Thlêmnaa in luh loh nân ṭawngṭai rawh u,” a ti a.

⁴¹Lung den phâk chin vêlah a va kal hrang a, a ṭhingṭhi a, a ṭawngṭai a.

⁴²“Ka Pa, rem i tih zâwng a nih chuan he no hi mi lâk sawnsak rawh; nimahsela, keima thu ni lovin, nangma thu ni zâwk rawh se,” a ti a.

⁴³Vân ata vântîrhkoh pakhat, a tiharh tûrin a hnênah a lo lang a.

⁴⁴A thlaphâng êm êm a, ṭhahnemngai lehzualin a ṭawngṭai a; a thlan chu thisen far lian tak angin a far a.

⁴⁵A ṭawngṭai zo chu zirtîrte hnênah a lo kal a, an lungngai tawngkhawng muthlu chu a rawn hmu a, an hnênah, “Engati nge in mutthlûk le?

⁴⁶Tho ula, thlêmnaa in luh loh nân ṭawngṭai rawh u,” a ti a.

⁴⁷Tin, a la sawi lai mêkin mipui an lo thleng a, Sâwmpahnihte zînga tel Juda an tih khân hma a rawn hruai a, fawh tumin Isua a rawn pan a.

⁴⁸Nimahsela, Isuan a hnênah, “Juda, Mihring Fapa hi fâwpin em ni i mantîr dâwn?” a ti a.

⁴⁹A vêla mite chuan thil lo thleng tûr chu an hmuhin, “Lalpa, khandaih kan lek mai dâwn aw?” an ti a.

⁵⁰An zînga pakhat chuan Puithiam lalber bawih chu a sât a, a beng ding lam a hlawisak a.

⁵¹Isua chuan a chhâng a, “Khaih khaih, a tâwk e,” a ti a. A beng chu a khawihsak a, a tidam ta a.

⁵²Puithiam lalte, Tempul pulis hotute leh upa lo kalte hnênah chuan Isuan, “Suamhmang man tûr ang ziazângin khandaih leh talhtum kengin in lo thawk a ni maw?

⁵³Ni tin Tempulah in zînga ka awm ṭhin lai khân mi man si lo; nimahsela, tûn hi in chêt hun a ni, thim lal chêt hun chu,” a ti a.

⁵⁴An man ta a, Puithiam lalber inah an hruai lût a.

⁵⁵Petera chuan hnung feah a zui a. Tin, in hual chhûng kawtlaiah mei an chhêm a, an ṭhu khâwm a, Petera pawh chu an zîngah chuan a ṭhu ve a.

⁵⁶Mei ênga a ṭhu chu chhiahhlawh nula pakhat hian a han hmu a, a en vang vang a, “He pa hi a hnêna awm ve kha a nih hi,” a ti a.

⁵⁷Ani erawh chuan, “Hmeichhia, ani chu ka hre lo ve,” a ti a, a phat ta a.

⁵⁸A hnu lawkah mi dangin a rawn hmu ve a, “Nang pawh an zînga mi i nih hi,” a ti a. Petera chuan, “Mihring, ka ni awzâwng lo mai,” a ti a.

⁵⁹Darkâr khat vêl hnuah chuan mi dangin, “He pa hi a hnêna tel kha a nih ngei hi maw, Galili mi a ni alâwm,” a ti tlat a.

⁶⁰Petera chuan, “Mihring, i thu sawi chu ka hre hauh lo,” a ti a. A ṭawng lai mêk chuan âr a lo khuang nghâl a.

⁶¹Lalpa chu a lo hawi a, Petera chu a en a. Petera chuan “Zâninah âr a khuan hmain vawi thum mi phat ang,” Lalpan a hnêna a tih kha a hre chhuak a.

⁶²Pâwnah a chhuak a, a ṭap ta zawih zawih a.

⁶³Isua chelhtute chuan nuihza siam nân an hmang a, an bêng sawk sawk a.

⁶⁴A mit an tuam a, “Tu nge bêng che, sawi teh,” te an ti a.

⁶⁵Ṭawng chhe pui puiin an hau va.

⁶⁶Tin, ni a lo chhuah chuan vântlâng upaho, puithiam lalte leh Dân zirtîrtute chu an ṭhu khâwm a; an Sanhedrin-ah chuan Isua chu an rawn hruai a. “Krista chu i nih leh nih loh min hrilh rawh,” an ti a.

⁶⁷Ani chuan, “Hrilh che u mah ila, in awih chuang lo vang;

⁶⁸zâwt che u mah ila mi chhâng chuang lo vang.

⁶⁹Nimahsela, tûn aṭang chuan Mihring Fapa hi Pathian thiltihtheihna ding lamah a ṭhu tawh ang,” a ti a.

⁷⁰An zavai chuan, “Chu, nang hi Pathian Fapa i ni maw?” an ti a. Ani chuan, “Nangman, ‘i ni’ min ti alâwm le!” a ti a.

⁷¹Anni chuan, “Hretu dang tu nge kan ngaih tawh ang? Keimahni ngeiin ama kamchhuak kan hre ta alâwm,” an ti a.