Read Mizo Lushai CHANCHIN ṬHA LUKA ZIAK 23 Bible Online

CHANCHIN ṬHA LUKA ZIAK 23 - Mizo Lushai bible

CHANCHIN ṬHA LUKA ZIAK 23

¹An za chuan an tho va, Pilata hnênah an hruai ta a.

²“He mi hian kan chite hel tûrin a fuih a, Kaisara hnêna chhiah chawi a khap a, amah hi Lal, Krista chu niin a insawi tih kan hre chhuak a ni,” tiin an hêk a.

³Pilata chuan a hnênah, “Juda-te lal i ni maw?” a ti a. Ani chuan a chhâng a, “Chu, i tih chu,” a ti a.

⁴Pilata chuan puithiam lalte leh mipuite hnênah chuan, “He mi chungah hian thu pawi eng mah ka hmu lo ve,” a ti a.

⁵Nimahsela, anni chuan, “Hel tûra mite fuihpawrhin Judai ram khaw tinah mi a zirtîr ṭhîn tih kan hria, Galili ramah a ṭan a, hetah pawh a lo thlen tâk hi,” tiin an bei lehzual sauh va.

⁶Pilatan chu chu a han hriat chuan Galili mi a nih leh nih loh a zâwt a:

⁷Heroda biala mi a ni tih a hriat chuan Heroda hnênah a tîr ta a; ani pawh chu Jerusalemah a lo awm lai tak a ni.

⁸Herodan Isua a lo hmuhin a lâwm hle a, a chanchin a hriat fo avângin hmuh a châkna a rei hle tawh rêng a; a thil mak tih eng emaw tal hmuh pawh a beisei a.

⁹Thu tam tak a zâwt a; nimahsela, a eng mah a chhâng lo.

¹⁰Puithiam lalte leh Dân zirtîrtute pawh chu an ding ve a, an hêk chiam a.

¹¹Tin, Heroda pawh chuan, a sipaite nên, Isua chu an hmusit hle a, nuihza siam nân an hmang a, puan ropui tak an sintîr a, Pilata hnênah a tîr kîr leh ta a.

¹²Pilata leh Heroda chu tûn hma chuan an intai hle ṭhîn a, chumi ni aṭang chuan an inngeih leh ta a.

¹³Pilata chuan puithiam lalte leh Dân zirtîrtute leh vântlângho chu a ko khâwm a, an hnênah,

¹⁴“He mi hi mite hel tûra fuihah in rawn puh a, in hma ngeiah ka chhuahchhâl a, in hêkna thu-ah thil pawi eng mah a khawih ka hmu lo.

¹⁵Heroda pawhin a hmu hek lo, kan hnênah a rawn tîr kîr leh ta mai a nih hi. Ngai rawh u, thihna khawp meuh eng mah tih a nei lo va;

¹⁶tichuan, ka han zilh hlek ang a, ka chhuah mai dâwn a ni,” a ti a.

¹⁷

¹⁸Nimahsela, an za chuan an au rual a, “He mi hi chu tiboral la, Baraba kha min chhuahsak rawh,” an ti a.

¹⁹Chu mi chu khawpuia helna avâng leh tual thah avânga tân ina tâng a ni.

²⁰Pilata chuan Isua chu chhuah a duh a, an hnênah thu a sawi leh a;

²¹mahse, “Khêngbet rawh, krawsah khêngbet rawh,” tiin anniho chu an au ta tuar tuar a.

²²Tin, ani chuan a vawi thumnaah, “Engah maw? Eng nge a tihsual? Thihna khawp meuh eng mah pawi a khawih ka hmu lo; ka zilh ang a, ka chhuah mai dâwn,” a ti a.

²³Anni chu ring takin an au va, krawsa khêngbet tûrin an ngên lui tlat a, an aw chuan a vau dai ta a.

²⁴Pilata chuan an ngên ang chuan thu a titlu ta a.

²⁵Helna leh tual thah avânga tân ina mi tâng an dîl kha a chhuah a, Isua erawh chu an duh duha tih tûrin a pe ta a.

²⁶Tichuan, an hruai ta a; Simona, Kurini khaw mi, thingtlâng lam aṭanga lo kal chu an man a, Isua hnungah kraws chu an puttîr a.

²⁷Tin, vântlâng mipui nasa tak leh lungchhiaa ṭap ṭap hmeichhiaten an zui dûl dûl a.

²⁸Isua chuan an lam a hawi a, “Jerusalem nute u, mi ṭah suh u, nangmahni leh in fate tân ṭap zâwk rawh u.

²⁹‘Hmeichhe ching te, nau pai ngai lo pum te, nau hnêk loh hnute te chu a nihlawh e,’ an tih hun a lo thleng dâwn.

³⁰Chûng hunah chuan tlâng hnênah, ‘min delh rawh,’ an ti ang a, mual hnênah pawh, ‘min khuh rawh,’ an la ti ang.

³¹Thinghring mah hetiang hian an ti a, a ro chu engtin tak la ti ang maw,” a ti a.

³²Tihhlum tûr mi dang, mi sual pahnih a rual chuan an hruai ve a.

³³Luruh an tih hmun chu an va thleng a; mi sualte pawh chu a ding lamah pakhat, a vei lamah pakhat an khêngbet bawk a.

³⁴Isuan, “Ka Pa, anniho hi ngaidam rawh, an thiltih hi an hre lo a ni e,” a ti a. A silhfênte chu ṭhumvâwrin an insem a.

³⁵Vântlângho chuan dingin an thlîr a. Hotute pawh chuan, “Mi dang mah a tidam ṭhîn a, Pathian mi ruata, Krista chu a nih meuh chuan amah pawh intidam ang hmiang,” tiin an ṭawng el a.

³⁶Sipaihote pawh chuan an nuihzat a, a hnênah an kal a, uain thûr an pe a,

³⁷“Juda-te lal i nih zet chuan intidam ta che,” an ti a.

³⁸A chungah chuan, “He mi hi Juda-te lal a ni,” tih ziak an târ a.

³⁹An khenbeh ve mi sual pakhat zâwk pawh chuan a ân khum a, “Krista chu i ni lo vem ni? Intidam la, keini pawh min tidam ve ta che,” a ti a.

⁴⁰Nimahsela, pakhat chuan a lo khak a, a zilhhau va, “Pathian meuh pawh i hlau na nge, thuhmun renga an hrem che hi?

⁴¹Keini pahnih hi zawng hrem âwm rêng kan ni, kan thiltih man kan hmu a nih hi; he mi hi zawngin eng mah a tisual si lo,” a ti a.

⁴²Tichuan, “Isu, i ram i thlen hunah mi hre reng ang che,” a ti a.

⁴³Ani chuan a hnênah, “Thu dik ka hrilh a che, ka hnênah vawiinah hian paradis-ah i awm ve ang,” a ti a.

⁴⁴Chhûn dâr sâwm leh pahnih vêl aṭanga tlai dâr thum thlengin khawvêl a lo thim ta vek a;

⁴⁵ni a êng ta lo va, Tempul chhûng puanzâr chu a laiah a thlêr thla a.

⁴⁶Isua chu ring takin a au va, “Ka pa, ka thlarau i kutah ka kawltîr a che,” a ti a. Chu chu a sawi zawh chuan a hnuk a chat ta a.

⁴⁷Sipai za hotu chuan thil lo thleng chu a hmuhin Pathian a fak a, “He mi hi mitakzet a ni phawt mai,” a ti a.

⁴⁸Chûng thil en tûra mipui lo kal khâwmte chuan thil lo thleng chu an hmuhin an lungngai a, an âwmte chûm chûmin an haw leh ta a.

⁴⁹A hmêlhriathote erawh chu hla feah an ding reng a, Galili ram aṭanga amah zuitu hmeichhiate nên khân chûng thil chu an thlîr ho va.

⁵⁰Tin, mi pakhat, a hming Josefa, rorêltu zînga tel, mi dik leh ṭha tak a awm a.

⁵¹Ani chuan an rorêl leh an thil tih chu a remtihpui ve lo rêng a. Juda-te khua Arimathai-a awm a ni, Pathian ram beisei ve ṭhîntu a ni bawk a.

⁵²Chu mi chu Pilata hnênah a kal a, Isua ruang a va dîl a.

⁵³Tin, a la thla a, puan zai sînin a tuam a, tu mah la zalh ngai lohna lung ker thlânah a zalh ta a.

⁵⁴Chumi ni chu Juda-te Inrinni a ni a; mahse, Juda-te sabat ni a inṭan lek lek tawh a.

⁵⁵Galili ram aṭanga rawn zuitu hmeichheho pawh chuan an zui ve zêl a, thlân leh a ruang an zalh dân chu an en a.

⁵⁶Tin, an haw a, rimtuite leh hriak rimtuite an siam a.